Biblia/Vetule Testamento/Job/Job 4

←Job 3

Le Biblia in Interlingua Job

Job 5→

Job

4

Eliphaz comencia parlar

¹Alora Eliphaz le Themanita respondeva a Job e le diceva: ²“Si alicuno essayarea dicer te un parola, considerarea lo tu qualcosa de moleste? Ma qui poterea tacer? ³Ecce, tu instrueva multes, tu reinfortiava manos laxe. ⁴Tu parolas supportava illes que impingeva e tu reinfortiava genus debile. ⁵Ma nunc que le mesmo occurre a te tu es discoragiate, le disgratia te frappa e tu es turbate^[1]? ⁶Esque tu sperantia non es plus in tu pietate, in tu fide^[2] e in tu conducta irreprochabile? ⁷Recorda, io te obsecra, que le innocente nunquam peri e que le personas recte nunquam es annihilate. ⁸Ben lo videva io mesme: illes qui opera iniquitates^[3] e semina dolores recolta le mesmo. ⁹Quando Deo solmente suffla illes peri; illes es consumite per un colpo de su ira. ¹⁰Il ha le rugito del leon e le grunnimento del juvene leon, ma a rumper se es le dentes del juvene leones! ¹¹Le potente leon peri per manco de predas, e le leoninos^[4] es dispergite.

Impie plangitores provoca le ira de Deo

¹²Ora, un parola me esseva secretemente apportate e mi aures captava un susurro de illo. ¹³In le pensamentos anxiose del sonios^[5] nocturne, quando le sopor^[6] cade super homines, ¹⁴un tremor me sasiva - e un pavor! - que faceva tremer tote mi osteos. ¹⁵Alora un sufflo de aere transiva per mi facie: illo faceva ericiar le pilos de mi carne. ¹⁶Illo stava, ma io non poteva recognoscer su facie, un imagine esseva coram mi oculos e io audiva un voce que murmurava: ¹⁷“Poterea unquam un homine mortal esser considerate juste ante Deo, o un homine esser considerate pur ante su Creator? ¹⁸Ecce, in su servitores ille non ha fiducia e ille trova pravitate mesmo in su angelos; ¹⁹quanto plus illes qui habita in domos de argilla, cuje fundamentos es in le sablo^[7], que es fullate como un tinea! ²⁰De mane usque ad vespere illes es pulverisate, in eterno illes peri, e nemo pote impedir lo. ²¹Nonne lor benes es levate de illes? Illes mori, ma sin consequer sapientia”.

Notas

1. O “le terror te sasi”.
2. O “confidentia”.
3. Litt. “ara”.
4. Litt. “filios del leonessa”.
5. O “visiones”.
6. O “un somno profunde”.
7. O “pulvere”.