Biblia/Vetule Testamento/Job/Job 3

←Job 2

Le Biblia in Interlingua Job

Job 4→

Job

3

Prime oration de Job

¹Finalmente Job rumpeva le silentio e malediceva le die de su nascentia. ²Ille diceva:

³“Que dispare del existentia le die de mi nascentia e le nocte in le qual io esseva concipite^[1]. ⁴Que de supra Deo non require plus ille die; que illo sia revertite in tenebra e que nulle lumine fulge super illo. ⁵Que lo reclama le tenebras e le umbra del morte, que un nebula spisse lo coperi, que le obscuritate lo terrifica! ⁶Que ille nocte sia delite del calendario, que illo non sia plus computate inter le dies del anno, e nunquam plus appare inter le menses. ⁷Que ille nocte sia solitari ni digne de laude^[2]. ⁸Que le incantatores^[3], qui es preste a suscitar le monstro Leviathan, maledice ille die! ⁹Que le stellas del crepusculo matinal dispare in le tenebras; que le expectation del lumine sia frustrate; que nunquam vide le palpebras del aurora. ¹⁰Proque tu non claudeva le porta del ventre de mi matre^[4]? Proque permitteva me nascer solmente pro vider tote iste affliction?

¹¹Quare io non nasceva morte? Proque io non moriva durante que io sortiva del utero? ¹²Quare le gremio de mi matre me recipeva? Proque esseva io allactate a su mamillas? ¹³Si io moriva al nascentia, nunc io poterea dormir in pace e mi somno me facerea reposar. ¹⁴Io reposarea con le reges e le governantes del terra que habeva se edificate mausoleos^[5]. ¹⁵Io reposarea con princes, ric de auro, cuje palatios esseva plenate de argento. ¹⁶Quare io non esseva interrate como un aborto o como un infante que nunquam vive pro vider le lumine? Alora io non existerea. ¹⁷In le pais del mortos le impies cessa lor tumultos e ibi trova lor pace qui es fatigate. ¹⁸Mesmo le captivos ibi non es plus molestate e non audi plus le voce de lor carcereros. ¹⁹Ibi se trova riccos e povres insimul e le servo es libere de su patron.

²⁰Quare dar lumine a qui es misere e vita a qui es in amaritude? ²¹Illes expecta le morte, ma illo non veni. Illes quere le morte con anxietate plus que un tresor celate. ²²Quando finalmente illes mori, ille es plen de gaudio; se allegra quando illes trova le sepulcro. ²³Quare le lumine es date a un homine que non ha futur^[6], a illes que Deo circumfere de tenebras? ²⁴Io non ha alcun desiro de mangiar tanto que io es afflicte: mi gemitos se effunde como aqua. ²⁵Il me eveniva lo que io semper timeva; lo que me dava apprehension me accideva. ²⁶Io non pote trovar ulle pace, nulle alleviation; io non trova reposo, e super me veni solmente le confusion.

Notas

1. O “que le nocte in le qual se diceva: “un homine esseva concipite”.
2. O “Que ille nocte non vide alicun nascentia e que le gaudio non pote entrar in illo”.
3. Le professionistas de maledictiones.
4. O “que me portava”.
5. O “cuje grande edificios jace nunc in ruinas”.
6. O “cuje vita es celate”.