Biblia/Vetule Testamento/Job/Job 36

←Job 35

Le Biblia in Interlingua Job

Job 37→

Job

36

Quarte elocution de Elihu

¹A su previe argumentationes, Elihu addeva istos alsi: ²“Sustene me ancora un poco e io te dara instructiones ulterior, quia io ancora ha cosas a dicer te in favor de Deo. ³Io te presentara argumentos profunde que demonstra le rectitude^[1] de mi Creator. ⁴Mi parolas es nihil altere que le veritate, quia io es un homine de grande cognoscentia.

⁵Deo es potente, ma ille non disprecia alicuno! Ille es potente e firme in su propositos. ⁶Ille non face viver le impios, ma ille rende justitia al pauperes. ⁷Ille nunquam distrahe su reguardo ab le justes, ma ille les pone sur thronos con reges e les exalta pro semper. ⁸Si illes es incatenate e trappate in un tela de afflictiones, 3⁹ille les monstra le rationes proque illes se trova in tal condition. Ille les monstra lor transgressiones, lor peccatos de orgolio. ¹⁰Ille les lo revela ut disciplinar les, e les dice que illes debe repentir se del mal que illes committeva. ¹¹Si illes ascolta e obedi a Deo, illes essera benedicite con prosperitate durante lor vita integre. Tote lor annos essera placente. ¹²Si illes tamen, refusa ascoltar, illes transira le fluvio del morte e se consumera in le stultitia. ¹³Le impios es plen de resentimento. Mesmo quando Deo les castiga, illes refusa invocar su adjuta. ¹⁴Lor anima es jam morte durante lor juventute e dissipa lor vita in immoralitates. ¹⁵Per le medio de lor afflictiones ille salva le suffrentes. Ille se revela a illes per le medio de lor suffrentias. ¹⁶Deo, igitur, te trahe foras del periculo, Job, e te porta a in un loco libere de angustias, al conforto de un tabula implite de ric alimentos.

¹⁷Tu tamen, es obsedite con le question si le impios essera judicate. Non te preoccupa: le judicio e le justitia essera honorate. ¹⁸Face attention que le abundantia non te seduce, Non permitter que un grande offerta a scopo de corruption te disvia. ¹⁹Poterea tu ricchessa o tu grande effortios sustener te in tempores de angustia? ²⁰Non anhelar al copertura del nocte, quia illo es quando le populos essera trahite foras de lor domos. ²¹Face attention! Reverte te ab le iniquitate, quia Deo mandava iste suffrentia pro subtraher te ab un vita de mal.

²²Ecce, Deo es excelse in su fortitude. Qui es simile a un tal doctor? ²³Nemo pote dicer le que facer, o dicer le: ‘Tu faceva lo que es mal’. ²⁴Al contrario, glorifica su obras potente e eleva canticos de laude. ²⁵Omnes videva iste cosas, benque solmente ab procul.

²⁶Si, Deo es grande - ultra omne nostre cognoscentia! Le numero de su annos es inestimabile. ²⁷Ille hauri vapor de aqua e pois ille lo distilla in pluvia. ²⁸Le pluvia se effunde ex le nubes e benefica omnes. ²⁹Qui pote comprender le diffusion del nubes e le tonitros que echoa de su pavilion? ³⁰Vide quomodo ille diffunde le fulgures circum se, e quomodo ille texeva le fundamentos del mar. ³¹Il es per le medio de iste actos potente que ille nutri le populos^[2] e supple alimentos in abundantia. ³²Ille imple su manos con fulgures e los dirige contra lor scopo. ³³Su tonitro annuncia su presentia^[3]; le tempesta annuncia su ira indignate^[4].

Notas

1. O “pro render justitia”.
2. O “judica le nationes”.
3. O “veniente tempesta”.
4. O “mesmo le bestial sape quando veni le tempesta”.