Biblia/Vetule Testamento/Job/Job 31

←Job 30

Le Biblia in Interlingua Job

Job 32→

Job

31

Le ultime auto-defensa de Job

¹Io faceva un pacto con mi oculos ut nunquam reguardar con concupiscentia un juvene femina^[1].

²Qual, ergo, es le hereditage que nos recipe ab le Omnipotente in le excelse celos? ³Esque non illo es le perdition pro le personas inique, e disgratia pro illes qui face le mal? ⁴Esque non Deo vide tote lo que io face e observa tote mi conducta^[2]? ⁵Esque io unquam mentiva o decipeva alicuno? ⁶Que Deo me pesa sur le balancias del justitia, quia Deo cognosce mi integritate. ⁷Si io errava lontan de su via, o si mi corde unquam concupisceva lo que io videva, o si io es culpabile de qualcunque altere peccato^[3], ⁸alora que alicun altere gaude del messes que io plantava e que tote lo que io plantava sia eradicate.

⁹Si mi corde habeva essite seducite per un femina, o si io ha habeva concupiscite^[4] le sponsa de un mi amico, ¹⁰alora que mi uxor deveni le serva^[5] de un altere homine e que altere homines committe adulterio con illa. ¹¹Tunc io haberea committite un peccato vergoniose, un iniquitate que debeva esser punite. ¹²Illo esserea un igne devorante usque a mi complete perdition e io meritarea esser private de tote lo que io possede^[6]. ¹³Si io faceva abstraction del derectos de mi servitores o servitrices quando illes se plangeva de me, ¹⁴alora que facerea io quando Deo se confrontara con me in judicio; quando ille intervenira, quid io le respondera? ¹⁵Quia Deo creava sia me sia mi servitores. Nos omnes esseva formate in le ventre de un matre.

¹⁶Esque io habeva unquam denegate dar al pauperes quod illes desirava o unquam disappunctate viduas in lor sperantias? ¹⁷Esque io habeva nunquam mangiate mi pan sin considerar le necessitates de orphanos e participate lo con illes? ¹⁸No, quia de facto ab mi juventute io respiceva orphanos sicut un patre e per tote mi vita io respiceva viduas in lor necessitates. ¹⁹Quandocunque io videva vagabundes que non habeva alco pro coperir se e personas necessitose sin alco a vestir se, ²⁰esque non illes me benediceva quia io les habeva providite vestimentos de lana pro calefacer les? ²¹Si io levava mi mano pro votar contra un orphano, sapiente que le judices haberea prendite mi parte, ²²alora que mi spatula cade ab su juncturas e que mi bracios sia infringite ab su alveolos! ²³Quia io semper timeva calamitates ab Deo e sapeva que contra su majestate nemo pote subsister!

²⁴Esque io unquam poneva mi securitate in le auro o dicite al ricchessas: 'Mi fiducia se funda in vos'? ²⁵Esque io unquam me complaceva de mi grande fortunas o del ricchessas que io succedeva acquirer? ²⁶Esque io unquam reguardava le Sol que brilla in le celo o le Luna que procede per su via argentee ²⁷tanto que mi corde esseva seducite secretemente render los homages religiose? ²⁸Si isto eveniva, io deberea esser justemente condemnate per le judices, quia io haberea denegate le Deo del excelse celos.

²⁹Esque io unquam me allegrava quando le ruina colpava mi inimicos o esque io exultava quando illes incontrava le infortuna? ³⁰No, io nunquam peccava maledicente qualcuno o invocante le vengiantia super illes. ³¹Mi servitores nunquam diceva: 'Ille permitteva que alteres suffreva le fame'. ³²Nulle estranieros esseva fortiate passar le nocte in le aere libere, ma io aperiva mi portas al viagiatores. ³³Esque io unquam essayava celar mi peccatos sicut altere gente, occultante mi culpas in mi corde? ³⁴Esque io timeva le turba o le contempto del gente tanto que io remaneva silente e non sortiva de mi porta?

³⁵Oh, si solmente alicuno me prestava attention! Ecce, isto es mi signatura – que le Omnipotente me responde! Que le accusator scribe clarmente le acto de incrimination contra me. ³⁶Alora io lo portara con feritate pendite a mi collo o in alto sur mi capite como un corona. ³⁷Quia io le dicerea exactemente lo que io faceva. Io le accederea como un prince.

³⁸Si mi terra me accusa e tote su sulcos crita insimul adverso me, ³⁹o si io mangiava su fructos sin pagar los, o causava le morte de su proprietarios, ⁴⁰alora que le cardos cresce su celle terra in vice de frumento, e mal herbas in vice de hordeo”. Le parolas de Job termina hic.

Notas

1. O “virgine”.
2. O “le passos que io face”.
3. O “si qualcosa pollueva mi manos”.
4. Litt. “si io ha insidiate le sposa de un mi amico expectante la a su ostio”.
5. Litt. “gira le mola”.
6. Litt. “eradicarea tote mi messes”.