Biblia/Vetule Testamento/Job/Job 19

Job

19

Replica de Job a Bildad

¹Alora Job respondeva: ²Quanto longemente vos va affliger mi anima e va opprimer me con vostre parolas? ³Jam dece vices vos me insultava e vos non ha vergonia de maltractar me. ⁴Tamen, mesmo si io errava, mi error reguarda me solmente! ⁵Vos reputa esser melio que me e emplea mi disgratia contra me^[1]. ⁶Comprende, tamen, que il es Deo que me ha facite un torto e que me cingeva con su rete.

⁷Io crita: “Adjuta!^[2]” ma nemo me responde. Io protesta, ma pro me il non ha ulle justitia. ⁸Ille ha blocate mi via e io non pote transir, ille ha immergite mi sentiero in le obscuritate. ⁹Ille me spoliava de mi honor^[3] e remove va le corona de mi capite. ¹⁰Ille me percute de omne latere pro abatter me^[4]; ille evelle mi sperantia como on evelle un arbore. ¹¹Il es assi que su furor arde contra me; ille me considera un su inimico! ¹²Su truppas avantia insimul; ille erige contra me rampas de assedio e ille se campa circa mi tenta.

¹³Mi parentes me evita, mi amicos recede se ab me. ¹⁴Mi familia me ha derelinquite, e qui me cognosce oblidava se de me. ¹⁵Le hospites de mi domo e mi servitrices me considera un estraniero. ¹⁶Quando io voca mi servitor, ille non veni, mesmo si io le implora. ¹⁷Mi halito es repulsive pro mi uxor. Io es rejectate per mi familia ipse. ¹⁸Mesmo infantes me disprecia. Quando io me leva pro parlar, illes se reverte. ¹⁹Mi amicos le plus car me detesta; illes qui io amava me adversa. ²⁰Mi osteos adhere a mi pelle e a mi carne; io escappava vive solmente con le cute circa mi dentes.

²¹Misera me, amicos mie, misera me, quia le mano de Deo me percuteva. ²²Quare vos me perseque como face Deo ipse? Esque vos non ha satis de morder mi carne? ²³Oh, si solmente mi parolas esseva registrate! Oh si solmente illos esseva scribite in un libro! ²⁴Oh si solmente illos esseva gravate in un rocca pro semper con un stilo ferree e le plumbo los poneva in evidentia!

²⁵Io sape, tamen, que mi redemptor vive: ille se levera al fin e stara super le pulvere. ²⁶E mesmo quando mi carne essera destruite, io videra Deo. ²⁷Io ipse le videra. Si, io le videra con mi proprie oculos, e non como un su inimico. Mi corde se consuma in mi pectore. ²⁸Como hardi vos continuar persequer le dicente: “Le radice de su problemas es ille mesme!”. ²⁹Vos ipse deberea timer un punition, quia vostre attitude merita le punition^[5]. Tunc vos va cognoscer que il ha un judicio!”.

Notas

1. O “mi humiliation”.
2. O “violentia”.
3. O “gloria”.
4. O “pro facer me perir”.
5. Litt. “Vos ipse debe timer le gladio, quia le ira va emplear le gladio”.