Biblia/Vetule Testamento/Jeremia/Jeremia 42

←Jeremia 41

Le Biblia in Interlingua Jeremia

Jeremia 43→

Jeremia

42

Advertimento a remaner in Juda

¹Alora omne officieros del armea, includite Johanan filio de Karea e Jezania figlio de Hoshaia, e tote le vulgo, ab le minime usque al magne, accedeva ²le propheta Jeremia e le diceva: “Per favor accorda nostre requesta e preca le Senior tu Deo pro nos. Como tu pote vider, nos es solmente un parve residuo in comparation a lo que nos esseva antea. ³Quere que le Senior tu Deo dice nos ubi nos deberea vader e que nos deberea facer”. ⁴Alora le propheta Jeremia les respondeva: “De accordo! Ecce, io precara le Senior vostre Deo secundo vostre parolas, Io dicera vos quecunque le Senior respondera pro vos. Io vos lo facera saper sin omitter alco”. ⁵Illes respondeva a Jeremia: “Que le Senior sia un teste fidel contra nos si nos non face justo como le Senior tu Deo te manda dicer nos. ⁶Non importa si illo placera a nos o no, nos obedira a lo que ille dice nos de facer ut toto vade ben pro nos”.

⁷Dece dies plus tarde le Senior dava su replica a Jeremia. ⁸Assi Jeremia vocava Johanan filio de Karea e tote le officieros del armea qui esseva con ille e tote le populo ab le minime usque al magne. ⁹Ille les diceva: “Vos me mandava al Senior, le Deo de Israel, con vostre requesta, e isto es su replica: ¹⁰Remane hic in iste pais. Si vos lo face, io edificara e non abattera vos; io vos plantara e non extirpara vos. Quia io es plen de affliction propter le disastro que io faceva cader super vos. ¹¹Non time plus le rege de Babylon - dice le Senior - quia io es vostre salvation: io liberara vos de su potentia. Io, le Senior lo declara! ¹²Io habera compassion de vos per render le misericordiose, tanto que ille vos permittera de remaner hic in iste pais”.

¹³“Ma si vos refusa obedir al Senior vostre Deo, e si vos dice: ‘Nos non remanera in iste pais, ¹⁴ma, al contrario, nos vadera in Egypto ubi nos non videra le guerra o audira le sono del trompa del inimico, o morira de fame pro manco de nutrimento’, ¹⁵alora audi le parola del Senior, residuo de Juda. Isto es lo que le Senior del universo, le Deo de Israel, dice: ‘Si vos ha le determination de vader in Egypto e de habitar ibi, ¹⁶le mesme guerra e fame que vos time hic sasira vos ibi e ibi vos morira. ¹⁷Illo essera le fato que expectara cata un de vos qui insiste vader viver in Egypto. Si, vos morira de guerra, fame e maladias, Nemo inter vos escappara le disastro que io facera cader ibi super vos.

¹⁸Quia le Senior del universo, le Deo de Israel, dice: ‘Si vos vade in Egypto, io effundera mi ira super vos justo como io ha effundite mi ira e indignation super le habitantes de Jerusalem. Vos devenira un objecto de horror e de ridiculo, un exemplo pro illes qui esseva maledicite e que le gente empleara pro pronunciar un malediction. Vos nunquam plus videra vostre patria’”.

¹⁹Le Senior ha vos dicite, residuo de Juda: ‘Non vade in Egypto’. Non oblida le advertimento que io vos ha date hodie. ²⁰Quia vos non esseva honeste quando vos me mandava a precar le Senior vostre Deo pro vos. Vos diceva: ‘Preca le Senior tu Deo pro nos. Dice nos quid le Senior nostre Deo dice, e nos lo facera’. ²¹In iste die io vos diceva quid ille diceva. Ma vos non vole obedir al Senior vostre Deo e facer lo que ille me mandava dicer a vos. ²²Nunc ergo vos pote esser secur que vos morira de guerra, fame e maladias in Egypto, ubi vos insiste vader”.