Biblia/Vetule Testamento/Isaia/Isaia 33

Isaia

33

Le Senior restablira Sion

¹Guai a te, oh predator^[1], qui nemo ancora te depredava! Tu es un devastator e nemo ancora te devastava. Quando, tamen, tu cessara de depredar, tu essera depredate; quando tu cessara de devastar, tu essera devastate.

²Senior, sia misericordiose con nos, quia nos te expecta. Da nos fortia cata matino; libera nos in le tempore del tribulation. ³Le populos fugi quando illos audi le sono de tu menacias^[2], le nationes se disperge quando tu surge in action. ⁴Justo como le erucas e le locustas spolia le campos e le vinias, assi le battite armea de Assyria essera spoliate.

⁵Le Senior es sublime, quia ille habita in le excelse celos; ille implera Sion de justitia e rectitude. ⁶In ille tempore, ille essera tu firme fundation e te providera generosemente de salvation, de sapientia e de cognoscentia. Le timor del Senior ipse essera tu tresor.

⁷Nunc, tamen, tu brave guerreros plora in publico. Tu ambassadores de pace lacrima in amar disappunctamento. ⁸Tu vias es vacue, il ha nulle viagiatores ibi. Le Assyros ha infringite lor tractatos de pace e non plus respecta le promissas que ille faceva ante testes; illes non ha respecto pro alicuno^[3]. ⁹Le terra de Israel luge e langue; le forestas del Libano marcesce e decade. Le plana de Sharon es nunc un deserto. Bashan e Carmel esseva depredate.

¹⁰Ma le Senior dice: “Nunc io va surger; nunc io va ostender mi fortia e potentia^[4]. ¹¹Vos, Assyros produce solmente herba sic e stupula. vostre halito es sicut igne que consumera vos ipse. ¹²ostre populo essera comburite completemente sicut spinos taliate e jectate in un fornace. ¹³Audi in re lo que io faceva, vos nationes lontan! E vos qui es proxime: recognosce mi potentia!”.

¹⁴Le peccatores in Jerusalem^[5] treme de pavor. Le terror sasi le imios. Illes crita: “Qui potera viver con iste igne devorante? Qui potera superviver a iste ardor sempiterne?”. ¹⁵Illes qui es honeste e juste, qui refusa facer profitos per fraudes, qui refusa acceptar de esser corrumpite, qui refusa audir qui conjura homicidios, qui claude lor oculos ante omne escas pro facer le mal: ¹⁶stes-ci habitara in locos excelse. Le roccas del montanias essera lor fortalessas. Les essera providite a mangiar e illes habera aqua in abundantia.

¹⁷Vostre oculos videra le rege in tote su splendor, e vos videra un terra que se extende a distantia. ¹⁸Vostre cordes inquirera con timor: “Ubi es le officieros de Assyria qui numerava nostre turres? Ubi es le contabiles qui registrava le piliage sasite de nostre cadite citates? ¹⁹Vos non videra plus iste gente impudente con lor estranie lingua inintelligibile, cuje lingua barbare vos non comprende. ²⁰Al contrario, vos videra Sion que solemnisara nostre sacre festas. Vos videra Jerusalem, un citate quiete e secur. Illo essera sicut un tenta, cuje cordas es tense e cuje palos ha essite fixate firmemente. ²¹Quia le Senior dominara ibi quam nostre potente rege. Ille essera sicut un ample fluvio de protection que nulle inimico potera transversar e super illo nulle galea potera navigar. ²²Le Senior, de facto, es nostre judice, nostre legifero e nostre rege: ille va salvar nos. ²³Quanquam in le tempore presente vostre cordas es laxe, le mast non es securmente fixate e le vela non es displicate, in ille tempore vos dividera inter vos un grande quantitate de spolias; mesmo le stropiatos trainara lor piliage. ²⁴Nulle residente de Sion dicera “Io es malade”; le gente qui vivera ibi videra lor iniquitates pardonate.

Notas

1. O “destructor”.
2. O “le sono de tumultos”.
3. O “le sono de tumultos”.
4. Litt. “me exaltara, nunc io me magnificara”.
5. Litt. “Sion”.