Biblia/Vetule Testamento/Ezra/Ezra 7

Ezra

7

Le arrivata de Ezra in Jerusalem

¹Post tote iste evenimentos, durante le regno de Rege Artaxerxes de Persia, Ezra ascendeva^[1] de Babylonia.

Ezra esseva le filio de Seraiah, que esseva le filio de Hilkiah, ²que esseva le filio de Shallum, que esseva le filio de Zadok, que esseva le filio de Ahitub, ³que esseva le filio de Amariah, que esseva le filio de Azariah, que esseva le filio de Meraioth, ⁴que esseva le filio de Zerahiah, que esseva le filio de Bukki, ⁵que esseva le filio de Abishua, que esseva le filio de Finehas, que esseva le filio de Eleazar, que esseva le filio de Aaron, le summe sacerdote.

⁶Iste Ezra esseva le homine qui ascendeva de Babylonia. Ille esseva un scriba experte in le Lege de Moses, date del Senior Deo de Israel. Le rege le suppliva de toto lo que ille requireva, quia le mano del Senior esseva super ille. ⁷In le septime anno de Rege Antaxerxes, Ezra faceva ascender a Jerusalem alicun Israelitas e alicun sacerdotes, le Levitas, le attendentes, le porteros, e le servitores del Templo. ⁸Ille entrava in Jerusalem in le quinte mense del septime anno del rege. ⁹In le prime die del prime mense ille decideva de ascender a Jerusalem, e in le prime die del quinte mense ille arrivava a Jerusalem, quia le bon mano de Deo esseva super ille. ¹⁰Ezra habeva applicate su corde in investigar le Lege del Senior e a obedir lo; a su observantia e a docer in Israel su preceptos e judicios.

Antaxerxe da su approbation official al mission de Ezra

¹¹Lo que seque es un exemplar del epistola que Rege Antaxerxe dava a Ezra, le sacerdote e le scriba erudite in le commandamentos e preceptos del Senior pro Israel:

¹²“Antaxerxe, rege del reges, a Ezra, un scriba del Lege del Deo del celo. Salutes. ¹³Io decreta que quicunque in mi regno pertine al populo de Israel - includite sacerdotes e Levitas - es autorisate, si illes vole, a retornar con te a Jerusalem. ¹⁴Le rege e su septe consilieros autorisa vos inquirer super le situation in Judea e in Jerusalem, fundate super le lege de vostre Deo, que es in vostre manos. ¹⁵Nos alsi commissiona vos prender con vos argento e auro, que nos sponte presenta qua offerta al Deo de Israel que vive in Jerusalem. ¹⁶Item, vos pote prender omne argento e auro qui vos pote obtener in tote le provincia de Babylonia, como alsi le contributiones voluntari del populo e del sacerdotes pro le templo de lor Deo que es in Jerusalem. ¹⁷Iste donationes debera esser empleate specificamente pro le emption de tauros, arietes, agnos, e le offertas appropriate de frumento: tote isto debera esser offerite sur le altar del Templo de vostre Deo in Jerusalem. ¹⁸Le argento e le auro que remane potera esser empleate in qualcunque maniera que vos e vostre collegas reputa esser le voluntate de vostre Deo. ¹⁹Pro lo que concerne le vasos que nos committe a vos pro le servicio del Templo de vostre Deo, delivra los omnes al Deo de Jerusalem. ²⁰Le cetero que vos necessita pro le Templo de vostre Deo, o pro omne simile necessitates, vos essera date del tresor regal.

²¹Io, Rege Antaxerxes, con le presente acto, emitte le ordine pro tote le tresoreros que es trans le fluvio Euphrate, a que vos exeque toto lo que Ezra, le sacerdote e scriba del Lege del Deo del celo, poterea requirer, ²²usque a cento talentos de argento e usque ad cento coros de frumento, e usque a cento batos de vino, e usque a cento batos de oleo, e sal sin mensura. ²³Toto lo que le Deo del celo va requirer debera esser exequite con precision pro le templo del Deo del celo, a que ille non va fortemente irascer contra le regno del rege e su filios. ²⁴Item, sia cognite a omnes que vos ha nulle autoritate de imponer taxas, tributos, o pedages a alcunos del sacerdotes, del Levitas, del musicos, del porteros, del servitores del templo o del attendentes al templo de iste Deo.

²⁵Ora tu, Ezra, secundo le sapientia que tu Deo te ha date, appuncta judices e officieros del corte que pote arbitrar causas in le nomine de tote le populo que es trans le fluvio Euphrate e que cognosce le leges de tu Deo. Doce le lege a quicunque non lo cognosce. ²⁶Quicunque refusa obedir al lege de tu Deo e al lege del rege essera del toto passibile del appropriate penalitate, sive le morte, sive le exilio, sive le confiscation de su proprietates, o detention in carcere”.

Ezra lauda le Senior

²⁷Benedicite sia le Senior, Deo de nostre ancestres, qui talmente moveva le corde del rege a tanto honorar le templo del Senior que es in Jerusalem! ²⁸Ille alsi me confereva su favor coram le rege, su consilieros, e tote le influente capites del rege. Io esseva confortate quia le mano gratiose del Senior mi Deo esseva super me, e que io poteva congregar le capites de Israel a ascender con me Jerusalem.

Notas

1. Iste verbo compare solmente in verso 6, ma on lo debeva poner hic pro claressa.