Le Cantico del canticos

8

Canto de desiro

[Le amata a su amante:] ¹Oh, io vole que tu esserea mi parve fratre allactate al mamillas de mi matre; si io te trova foras, io poterea basiar te - certo nemo me dispreciarea pro isto! ²Io te prenderea con me e te ducerea al domo de mi matre, illa qui me educava. Io te darea a biber vino speciate, le nectare de mi granatas.

[Le amata in re su amante:] ³Su mano leve es sub mi capite, e su mano dextere me imbracia.

[Le amata al juvenettas:] ⁴Io adjura vos, oh juvenettas de Jerusalem: “Non evelia nos da nostre amor o molesta nos donec le tempore es juste.

[Le juvenettas in re su amato:] ⁵Qui es ista, qui ascende del deserto e qui se appoia super su amato?

[Le amata a su amante:] Sub un arbore de pomos io te eveliava; ibi te concipeva tu matre, ibi te parturiva tu genitrice.

[Le amata a su amante:] ⁶Pone me sicut un sigillo super tu corde, sicut un sigillo super tu brachio. Quia le amor es tanto forte quanto le morte; le passion es tanto inexorabile quanto le inferno. Su flamma erumpe; illo es un deflagrante flamma. ⁷Multe aquas non pote extinguer le amor, nec fluvios pote disbordar lo. Si alicuno voleva offerer tote su possessiones pro emer amor, un tal offerta esserea absolutemente dispreciate.

[Le fratres del amata:] ⁸Nos ha un parve soror, tro juvene pro haber mamillas. Que va facer nos pro nostre soror si alicuno volerea maritar se con illa? ⁹Si illa esseva sicut un muralia nos lo custodiarea con turres de argento; ma si illa esseva un porta, nos lo barrerea con plancas de cedro.

[Le amata:] ¹⁰Io esseva un muralia, e mi mamillas esseva sicut le turres de un fortalessa. Quando mi amante me reguarda, ille es incantate per lo que ille vide.

[Le amata a su amante:] ¹¹Salomon habeva un vinia in Baal-hamon; ille lo locava a illes que lo custodiava. Cata uno de illes debeva portar mille shekel pro su fructos. ¹²Mi vinia, que me pertine, es solmente a mi disposition. Le mille shekel pertine a te, oh Salomon, e duo centos shekel pertine a illes que custodia su fructo.

Epilogo

[Le amante a su amata:] ¹³Oh tu qui habita in le jardinos, mi companiones ascolta attentivemente a tu voce: face me audir tu voce!

[Le amante a su amata:] ¹⁴Hasta te, mi amata! Sia como un gazella o un juvene cervo sur le montes del aromas.