Biblia/Vetule Testamento/Isaia/Isaia 1

←Cantico 8

Le Biblia in Interlingua Isaia

Isaia 2→

Isaia

I

Titulo

¹Isto es le message re Juda e Jerusalem revelate in vision a Isaia, filio de Amoz, durante le tempore^[1] de Uzziah, Jotham, Ahaz, e Hezekiah, reges de Juda.

Deo accusa Israel de rebellion

²Audi, oh celo! Face attention, oh terra! Le Senior parla: “Io generava filios e les educava excellentemente, ma illes rebellava se contra me! ³Un bove recognosce su possessor, un asino recognosce le stabulo^[2] de su patron, ma Israel non me recognosce e mi populo non comprehende”. ⁴Guai! Nation de peccatores, populo gravate de iniquitates^[3], racia perverse, filios scelerate! Illes abandonava le Senior, dispreciava^[4] le Sancto de Israel, se alienava^[5] de ille.

⁵Proque persiste vos ancora a rebellar vos e de consequentia a patir castigamentos? Vostre testa es plen de feritas a causa del percussiones que vos recipeva, e le fortias de vostre corpore se extingueva quasi completemente^[6]. ⁶Ab le planta de vostre pedes usque a vostre testa, il ha nihil que restava san. Vostre corpore es plen de contusiones, talios e feritas aperte, e illos nunquam esseva lavate ni bandate, ni tractate con oleo de oliva.

⁷Vostre pais es devastate, vostre citates esseva comburite. Sub vostre oculos ipse vostre messes esseva devorate per invasores estranie. Illes se lassava retro devastation e destruction. ⁸Le citate^[7] de Sion remaneva isolate^[8] como un cabana in un vinea, como un tecto protective in un campo de cucumbres; illo es un citate assediate.

⁹Si le Senior del universo^[9] non habeva relinquite poc superviventes, nos haberea rapidemente devenite como Sodoma, nos haberea devenite exactemente como Gomorrah.

Un culto sin justitia ha nulle valor

¹⁰Audi le parola del Senior, vos le governantes de Sodoma. Presta attention al inseniamento corrective de nostre Deo, vos le populo de Gomorrah. ¹¹Ille dice nos: “Proque vos me offere assi multe sacrificios? Jam io ha satis de holocaustos de arietes e de grassia de bovellos. Io non vole plus altere sanguine de tauros, agnos e capras. ¹²Quando vos veni a presentar vos coram me con vostre animales, esque vos vermente pensa que io lo comandava - pedes de animales que calca mi cortes? ¹³Non porta plus ad me sacrificios sin valor; io considera un detestabile abomination vostre incenso. Vos festea le dies del nove luna, le Sabbatos e sancte convocationes, ma io non pote plus supportar celebrationes maculate de peccatos. ¹⁴Io odia vostre festas del luna nove e vostre solemnitates; illos deveniva moleste pro me, un onere que io es fatigate de portar. ¹⁵Quando vos extende vostre manos pro pregar, io averte mi oculos pro non vider lo; quando vos multiplica vostre orationes io non los exaudi, proque vostre manos es plen de sanguine.

¹⁶Lava vos! Purifica vos! Amove vostre actiones dolente ab mi vista! Cessa de facer le mal! ¹⁷Apprende a facer le ben: promove le justitia, da al opprimite rationes pro festear! Sustene le causa del orphanos! Defende le derectos del vidua! ¹⁸Deinde veni e vamos considerar vostre optiones^[10]” - dice le Senior. “Quamquam vostre peccatos maculava vos como le scarlato, vos potera devenir blanc como le nive; quamquam illos es facile a vider como le color rubie, vos potera devenir como le villo del lana. ¹⁹Si vostre attitude es ben disposite e obediente, tunc vos mangiara de novo le bon messe del terra. ²⁰Ma si vos declina e rebella vos provocante me ad ira, le spada vos devorara. Io mesme, le Senior, ha parlate”.

Jerusalem le citate infidel

²¹Ah, qual tragedia! Le citate que un vice esseva fidel, ha devenite un prostituta! Un vice le justitia habitava ibi, e gente honorate albergava ibi; ma nunc illo es plen de homicidas. ²²Tu argento deveniva scorias, e tu vino esseva diluite con aqua. ²³Tu governantes rejectava me e se associava a fures; omnes ama le corruption e solmente cerca profitos personal. Illes non defende le orphanos e non se carga del causas del viduas.

²⁴Ergo, le Senior Deo del universo, le Omnipotente de Israel, assere: “Io trahera mi consolation in vengiar me contra mi adversarios, mi inimicos lo pagaran. ²⁵Io te colpara con mi mano, io purificara tu metallo con fluxante, io amovera tote tu scorias. ²⁶Io restabilira judices honeste como il habeva in passato, sage consilieros como il habeva in principio. Alora tu essera appellate: ‘Le citate juste’ le urbe fidel’. ²⁷Sion essera liberate gratias al derecto, e su habitantes penitente gratias al justitia. ²⁸Tote le peccatores rebelle essera fracassate; illes que quita le Senior perira. ²⁹Sin dubita illes se vergoniara del arbores sacre que illes trovava tanto desiderabile, tu essera embarassate pro le hortos sacre que tu seligeva de render le culto. ³⁰Tu essera como un arbore cuje folios marcesce, como un horto non irrigate. ³¹Qui se credeva forte essera como un filo de glomere, lor operas como scintillas; ambes ardera insimul e nemo extinguera le foco.

Notas

1. O “dies”.
2. O “le loco ubi su patron pone le alimentos”.
3. O “culpas”.
4. O “blasphemava”.
5. O “estraniava”.
6. O “vostre corde es debile”.
7. Let. “le filia de Sion”.
8. O “derelinquite”.
9. O “le Senior que commanda armeas”.
10. O “vamos considerar qui ha ration”.