Biblia/Vetule Testamento/Cantico/Cantico 7

←Cantico 6

Le Biblia in Interlingua Cantico

Cantico 8→

Le Cantico del canticos

7

[Le amante a su amata:] ¹Que belle es tu pedes in lor sandalias, oh filia de principe! Tu ronde coxas es sicut joieles fabricate per le mano de un artifice. ²Tu umbilico es un cuppa ronde pro miscer, sicut un calice que nunquam care de vino miscite. Tu ventre es sicut un monticulo de frumento bordate de lilios. ³Tu duo mamillas es sicut duo cervinos, cervinos gemine de un gazella. ⁴Tu collo es sicut un turre eboree. Tu oculos es sicut le piscinas scintillante de Heshbon que es al portas de Bath-rabbim. Tu naso es sicut le turre de Libano prospicente Damasco. ⁵Tu capite te corona sicut le monte Carmel. Le buclas de tu capillos es sicut le tapetes regal - le rege es captivate in su tressas! ⁶Como tu es belle! Como desirabile tu es, oh amor con tu delicias!

Le palma e su scanditor

[Le amante a su amata:] ⁷Tu statura es simile a un palma, e tu mamillas es sicut racemos de dattilos^[1]. ⁸Io vole ascender le palma e prender su pedunculos de fructos. Que tu mamillas sia sicut racemos de uva, e que le olentia de tu halito sia sicut malos! ⁹Que tu basios^[2] sia sicut le vino melior que flue suavemente pro mi amato, glissante dulcemente sur nostre labios e dentes.

[Le amata re su amante:] ¹⁰Io pertine a mi amor e ille me desira!

Viage al campania

[Le amante a su amata:] ¹¹Veni, amor mie, vamos in campania; vamos passar le nocte in un village. ¹²Vamos levar nos de bon hora e vader al vinias pro vider si le vites ha pullulate, pro vider si le flores se aperiva, si le granatas floresce - ibi io te dara mi amor. ¹³Le mandragoras emitte lor olentia; e le fructos le plus delicate es a nostre porta, sia nove que vetule: illos es tote pro te, mi amor.

Notas

1. O “uva”.
2. O “bucca”.