Biblia/Nove Testamento/Tito/Tito 3

←Tito 1

Le Biblia in Interlingua Epistola a Tito

Philemon→

Epistola a Tito

Capitulo 3

Le conducta christian verso illos foras del Ecclesia

¹Rememora les a esser subjecte al magistratos e al autoritates, a esser obediente, disponibile a facer omne obra bon. ²Illes non debe parlar mal de alicuno, ma esser pacific, gentil, monstrante complete cortesia^[1] verso omnes. ³Etiam nos, de facto, esseva un vice insensate, rebelle, disviate, subjugate a varie passiones e desiros. Nos conduceva nostre vita con malitia e invidia, esseva odiose e odiava le unes le alteres. ⁴Quando, tamen, le benignitate de Deo nostre Salvator e su amor verso le homines se manifestava a nos, ⁵Deo salvava nos non a causa del operas juste que nos faceva, ma sur le fundamento de su misericordia, per le lavage del regeneration^[2] e le renovation operate per le Spirito Sancte, ⁶que ille copiosemente effundeva super nos per le medio de Jesus Christo, nostre Salvator. ⁷Assi, pois que nos esseva justificate per su gratia, nos deveniva heredes secundo le sperantia del vita eterne.

Summario del epistola

⁸Certe es iste parola, e io vole que tu insiste super tal veritates^[3], de sorta que illes qui poneva lor fide in Deo pote ingagiar se in complir obras bon. Iste cosas es bon e utile pro omnes. ⁹Evita, tamen, futile controversias^[4], genealogias, contentiones, e disputas circa le lege, proque illos es inutile e van. ¹⁰Le persona sectari, post un prime e un secunde admonition, evita^[5] le. ¹¹Tu sape que le peccato perverteva un tal persona e ille es mesmo consciente de isto^[6].

Instructiones final e salutation

¹²Quando io te habera mandate Artemas o Tychico, face tu melior pro venir a me a Nicopoli, pois que io decideva passar le hiberno ibi. ¹³Face tote lo que te es possibile pro adjutar Zenas, le legista, e Apollos, a fin que nihil les manca. ¹⁴Ecce un altere maniera per le qual nostre gente pote apprender a ingagiar se in bon obras pro provider a necessitates pressante a que illes non sia infructuose. ¹⁵Tote illes qui es con me te saluta. Saluta illes qui ama nos in le fide^[7]. Le gratia sia con tote vos.

Notas

1. O “omne mansuetude”.
2. O “nove nascentia”.
3. O “super iste cosas”.
4. O “questiones stulte”.
5. O “rejecta”.
6. O “ille condemna se ipse”.
7. O “fidelmente”.