Biblia/Nove Testamento/Tito/Tito 1

←2 Timotheo 4

Le Biblia in Interlingua Epistola a Tito

Tito 2→

Epistola a Tito

Capitulo 1

Salutation

¹Paulo, servitor de Deo e apostolo de Jesus Christo, al servicio del fide del electos de Deo e del cognoscentia del veritate secundo le pietate, ²in le sperantia del vita eterne que Deo, le qual non menti, promitteva jam ante le comenciamento del etates^[1], ³ma que, in le tempore establite^[2], esseva manifestate in su Parola per le medio del predication que me esseva confidite per mandato de Deo, nostre Salvator. ⁴A Tito, mi ver filio secundo le fide commun. Gratia e pace de Deo le Patre e Christo Jesus nostre Salvator!

Le deberes de Tito a Creta

⁵Le ration pro le qual io te lassava in Creta esseva pro arrangiar le cosas que remane a facer e nominar ancianos in omne citate, secundo le directiones que io te dava. ⁶Un anciano debe esser irreprochabile, fidel a su sposa^[3], con filios fidel^[4] qui non sia accusabile de dissipation o de esser insubordinate. ⁷Pois que le supervisor^[5] debe esser irreprochabile como un valente administrator de Deo, non arrogante^[6], non irascibile o bibule, non violente, non cupide de vil lucro. ⁸Al contrario, ille debe esser hospital, devote a lo que es bon, sensibile^[7], recte, sancte, e disciplinate^[8]. ⁹Ille debe tener se firmemente al parola fidel que le esseva inseniate, a que ille pote sia exhortar con le san doctrina, sia persuader^[9] illes que parla contra illo^[10].

¹⁰Il ha, de facto, multe personas rebelle^[11], confabulatores e seductores^[12], specialmente inter le partisanos del circumcision^[13]. ¹¹Illes debe esser facite tacer, proque illes disvia integre familias inseniante cosas non necessari, pro un lucro dishoneste. ¹²Uno de istes, de facto, un de lor prophetas, diceva: “Le creteses es semper mendace, bestias malefic, e pigre gluttones^[14]”. ¹³Un tal testimonio es ver. Pro iste ration reprimenda les severmente a que illes sia san in lor fide, ¹⁴e a que illes non presta attention a mythos^[15] judaic e commandamentos de homines qui rejecta le veritate. ¹⁵Toto es munde pro illes que es munde. Pro illes, tamen, qui es corrupte^[16] e incredule, nihil es munde. Mesmo lor mentes e conscientias es corrupte. ¹⁶Illes assere^[17] cognoscer Deo, ma con lor obras illes le denega, proque illes es detestabile^[18], disobediente e incapace de alicun obra bon.

Notas

1. O “ante le tempores eterne”.
2. O “in su proprie tempore”.
3. O “marito de un sol uxor”, o “monogame”.
4. O “credente”.
5. Le terminos “anciano” e “supervisor” es intercambiabile. On poterea traducer “supervisor” con “episcopo”.
6. O “superbe”.
7. O “benigne”.
8. O “temperante”.
9. O “refutar”.
10. O “illes que lo contradice”.
11. O “insubordinate”.
12. O “deceptores”.
13. Judeos qui se converteva al christianismo.
14. Un dicto attribuite al poeta Epemenide de Creta (6e seculo a. C.).
15. O “fabulas”.
16. O “polluite”.
17. O “professa”.
18. O “abominabile”.