Biblia/Nove Testamento/Timotheo/2Timotheo 4

←2 Timotheo 3

Le Biblia in Interlingua Secunde Epistola a Timotheo

Tito 1→

Secunde epistola a Timotheo

Capitulo 4

Le cargas de Timotheo repetite

¹Io te incarga solemnemente, coram Deo e Christo Jesus, qui debe judicar le viventes e le mortos, e per su apparition e per su regno: ²Predica le Parola, persiste in omne circumstantia a facer lo^[1], admonesta, reprimenda, exhorta^[2] con grande patientia e doctrina. ³Pois que venira le tempore quando on non plus supportara le san doctrina. Al contrario, multes, con insatiabile curiositate de audir^[3], se circumferera^[4] de maestros^[5] complacente pro satisfacer lor proprie desiros. ⁴E illos avertera lor aures ab le veritate e se tornara a mythos^[6]. ⁵Tu, tamen, sia disciplinate^[7] in omne cosas, supporta le difficultates^[8], face le obra de evangelista, perseque tu ministerio. ⁶Pois que io es preste a esser sacrificate^[9] e le tempore de mi partita es proxime. ⁷Io competeva ben, io terminava le cursa e ha conservate le fide! ⁸A me es reservate le corona del justitia que le Senior, le juste judice, me dara^[10] in ille die - e non solmente a me, ma alsi a tote illes qui desidera^[11] su venita^[12].

Planos de viage e salutation conclusive

⁹Face omne effortio de vider me tosto. ¹⁰Nam Dema me abandonava proque ille amava le presente etate, e ille vadeva a Thessalonica. Crescente vadeva a Galatia, e Tito a Dalmatia. ¹¹Solmente Luca es con me. Prende Marco e apporta le con te proque ille me es multo utile pro le ministerio. ¹²Ora, io inviava Tychico a Epheso. ¹³Quando tu veni, apporta le mantello que io ha lassate a Troade apud Carpas, e le libros, specialmente le pergamenas. ¹⁴Alexandro, le cuprero, me ha facite multo mal. Le Senior le pagara conforme a su actiones^[13]. ¹⁵De ille guarda te etiam tu, proque ille se opponeva fortemente a nostre parolas. ¹⁶In mi prime defensa, nemo appareva in mi supporto ma omnes me abandonava: que isto non sia imputate a illes! ¹⁷Ma le Senior esseva con me e me fortificava a fin que le evangelio esseva per le medio de me plenmente proclamate e tote le gentiles lo audiva. Assi io esseva liberate ex le bucca del leon! ¹⁸Le Senior me liberara ex omne mal action e me portara in securitate^[14] in su regno celestial. A ille sia le gloria in le seculos del seculos. Amen. ¹⁹Saluta Prisca, Aquila e le familia de Onesiphoro. ²⁰Erasto remaneva a Corintho e io lassava Trophimo malade a Mileto. ²¹Face omne effortio de venir ante le hiberno. Te saluta Eubulo, Prudente, Lino, e Claudia, insimul a tote le fratres e le sorores. ²²Le Senior sia con tu spirito. Le gratia sia con vos.

Notas

1. O “a tempore e foras de tempore”, illo es: sia quando il es conveniente o non conveniente.
2. O “incoragia”.
3. O “con aures pruriginose”, o “per prurito de audir”.
4. O “accumulara pro se”.
5. O “doctores”.
6. O “fabulas”.
7. O “sobrie” o “temperate”.
8. O “suffre le afflictiones”.
9. O “offerite como libation”.
10. O “adjudicara”.
11. O “ama”.
12. O “apparition”.
13. Allusion a Psalmo 28:4.
14. O “me salvara”,