Biblia/Nove Testamento/Timotheo/2Timotheo 3

←2 Timotheo 2

Le Biblia in Interlingua Secunde Epistola a Timotheo

2 Timotheo 4→

Secunde epistola a Timotheo

Capitulo 3

Le ministerio in le ultime dies

¹Tu debe saper isto: tempores difficile^[1] venira in le ultime dies. ²Pois que le gente essera amante de se mesme^[2], amante del pecunia^[3], arrogante, blasphematores, disobediente al proprie genitores, ingrate, irreverente^[4], ³sin amor^[5], disloyal, calumniatores, sin disciplina^[6], salvage, oppositores de lo que es bon, ⁴perfide^[7], impulsive^[8], vanitose, amante del placeres plus tosto que amante de Deo. ⁵Illes conservara le apparentia^[9] exterior del religion^[10], ma habera repudiate^[11] su fortia. Assi, evita gente como istes. ⁶Pois que alicun de istes se insinua jam in le casas e captiva feminas debile^[12] cargate de peccatos e pulsate per varie passiones. ⁷Tal feminas semper desira apprender cosas nove, ma illas nunquam perveni al cognoscentia del veritate. ⁸E sicut Jannes e Jambres^[13] se opponeva a Moses, in le mesme maniera istes - le quales ha mentes corrupte e es disqualificate^[14] in lo que concerne le fide - se oppone alsi al veritate. ⁹Illes, tamen, non prevalera^[15], proque lor stultessa essera obvie a omnes, justo como lo esseva con Jannes e Jambres.

Persevera in lo que tu apprendeva

¹⁰Tu, tamen, sequeva mi inseniamento, mi conducta, mi proposito, mi fide, mi patientia, mi amor, mi perseverantia, ¹¹mi persecutiones e suffrentia, como illos que me eveniva in Antiochia, Iconio, e in Lystra. Io supportava iste persecutiones, e le Senior me liberava de tote illos. ¹²Ora, de facto, tote illes qui vole viver piemente in Christo Jesus essera persecutate. ¹³Ma personas malefic e impostores vadera de mal in pejo, decipiente alteres e essente decipite illes mesme. ¹⁴Tu, tamen, persiste in le cosas que tu apprendeva e del quales tu es confidente. Tu cognosce qui te los inseniava ¹⁵e como, desde tu infantia, tu cognosce le Sacre Scripturas, le quales pote dar te le sapientia que conduce al salvation per le fide in Jesus Christo. ¹⁶Tote le Scriptura es inspirate per Deo e utile pro inseniar, pro reprimendar, pro corriger e pro educar^[16] al justitia, ¹⁷a fin que le persona consecrate a Deo^[17] sia competente^[18] e ben equipate pro omne bon obra.

Notas

1. O “periculose”.
2. Illo es “egocentric”.
3. O “avaritiose”.
4. O “sin sanctitate”, o “impur”.
5. O “sin affecto natural”.
6. O “irrefrenabile”.
7. O “traitores”.
8. O “temerari”.
9. O “forma”.
10. O “del pietate”.
11. O “renegate”
12. O “stulte”, “stupide”.
13. Jannes e Jambres es le nomines traditional de duo magos de Pharaon qui se opponeva a Moses, cf. Ex. 7:11, 22.
14. O “reprobate”.
15. O “non progredera”, “non vadera multo in ante”.
16. O “tutorar”.
17. O “le homine de Deo”.
18. O “complete” o “perfecte”, “apte”.