Biblia/Nove Testamento/Timotheo/1Timotheo 2

←1 Timotheo 1

Le Biblia in Interlingua Prime Epistola a Timotheo

1 Timotheo 3→

Prime epistola a Timotheo

Capitulo 2

Precar pro omne sorta de personas

¹Ante toto, dunque, io exhorta que on face requestas^[1], preces, intercessiones, e actiones de gratias pro omne sorta de personas^[2], ²mesmo pro reges e pro totes qui es in autoritate, a que nos omnes pote conducer un vita quiete in omne pietate e dignitate^[3]. ³Tal preces pro omnes es bon e agradabile a Deo, nostre Salvator, ⁴pois que ille vole que omnes sia salvate e perveni al cognoscentia del veritate. ⁵Il ha de facto un sol Deo e un sol intermediario^[4] inter Deo e le humanitate, Christo Jesus, ille mesme human^[5], ⁶le qual donava se ipse qua precio de redemption pro omnes e revelava assi a su tempore le proposito de Deo^[6]. ⁷Pro isto io esseva appunctate predicator e apostolo - io dice le veritate e non menti - maestro^[7] del gentiles in fide e veritate. ⁸Assi io vole que le homines^[8] preca in omne loco, levante manos^[9] sancte^[10], sin ira e sin disputas.

Le conducta del feminas

⁹Similemente, que le feminas se vesti^[11] de vestituras decorose^[12], con pudor e moderation^[13], con capillaturas sin ostentation^[14], non con auro, perlas, o vestimentos costose^[15], ¹⁰ma con bon obras, como conveni a feminas qui professa reverentia^[16] pro Deo. ¹¹Un femina debe apprender quietemente con omne obedientia^[17]. ¹²Io non permitte a un femina, tamen, inseniar o exercer autoritate super un homine. Illa debe remaner quiete^[18]. ¹³Pois que Adam esseva create primo, e postea Eva. ¹⁴Adam non esseva decipite, ma le femina, essente decipite, cadeva in transgression. ¹⁵Illa, tamen, essera salvate in generar filios si illa persevera in le fide, le amor, le sanctitate, e con modestia.

Notas

1. O “petitiones”.
2. O “pro tote le homines”.
3. O “integritate”.
4. O “mediator”.
5. O “homine”.
6. O “un testimonio”.
7. O “doctor”.
8. O “viros”.
9. Un postura antique del personas qui preca.
10. O “pur”.
11. O “se adorna”.
12. O “convenibile”.
13. O “sobrietate”, “decentia”.
14. O “tressate”.
15. O “sumptuose”.
16. O “pietate”.
17. O “submission”.
18. O “remaner in silentio”.