Biblia/Nove Testamento/Timotheo/1Timotheo 1

←2 Thessalonicenses 3

Le Biblia in Interlingua Prime Epistola a Timotheo

1 Timotheo 2→

Prime epistola a Timotheo

Capitulo 1

Salutation

¹Paulo, apostolo de Jesus Christo per mandato^[1] de Deo nostre Salvator e de Jesus Christo nostre sperantia. ²A Timotheo, mi ver filio in le fide. Gratia, misericordia e pace ab Deo le Patre e Christo Jesus nostre Senior!

Le deberes de Timotheo in Epheso

³Como io te suadeva quando io esseva preste a partir al Macedonia, io te pete remaner a Epheso pro instruer^[2] certe personas non diffunder false doctrinas^[3], ⁴ni occupar se de mythos^[4] e interminabile genealogias. Tal cosas solmente promove speculationes sin valor in vice del plano redemptive de Deo que opera per le fide. ⁵Le fin de nostre instruction^[5], tamen, es le amor que veni ab un corde pur, un bon conscientia e un fide sincer. ⁶Alcunes disviava se ab istos e se ingagiava in discussiones vacue. ⁷Illes volerea esser doctores del Lege, ma illes non mesmo comprende lo que illes dice, ni le cosas super le quales illes insiste in maniera tanto confidente.

⁸Nos sape que le Lege es bon si on lo usa legitimemente, ⁹e recognosce que le Lege non es intendite pro le justos, ma pro le injustos^[6] e le rebellos, pro le impios e le peccatores, pro le irreverentes e le profanatores, pro parricidas o matricidas, pro le homicidas, ¹⁰pro personas sexualmente immoral e le sodomitas^[7], pro le sequestratores de personas^[8], pro le mentitores e le perjuros - de facto, pro tote illes qui vive in un maniera contrari al san doctrina. ¹¹Isto concorda con le gloriose evangelio del beate Deo, que me esseva confidite.

¹²Io da gratias a Christo, nostre Senior, qui me ha fortificate, proque ille me estimava digne de su fiducia vocante me al ministerio, ¹³mesmo si io antea esseva un blasphemator, un persecutor, e un persona violente^[9]. Io esseva tractate con misericordia proque io ageva per ignorantia in mi incredulitate, ¹⁴e le gratia del Senior esseva particularmente generose^[10] con le fide e le amor que se trova in Christo Jesus. ¹⁵Certe es iste parola e digne de esser plenmente acceptate: “Christo Jesus veniva in le mundo pro salvar peccatores” - e io es le pejor de illos^[11]!. ¹⁶Ma ecce le ration pro le qual io esseva tractate con misericordia: a fin que in me, como al pejor^[12], Christo Jesus poteva demonstrar su clementia^[13] e devenir exemplo pro illes qui haberea credite in ille pro reciper vita eterne. ¹⁷Ora al rege eterne, immortal, invisibile, le sol Deo, sia honor e gloria in le seculos del seculos. Amen.

¹⁸Io te confide iste carga, Timotheo, filio mie, in harmonia con le prophetias que esseva facite concernente tu persona, a fin que con un tal incoragiamento, tu pote combatter in le bon combatto. ¹⁹Preserva tu fide e un bon conscientia, le quales alcunes rejectava e assi, in lo que concerne le fide, illes naufragava. ²⁰Inter istes se trova Hymeneo e Alexandro, le quales io livrava a Satana a que illes apprende non blasphemar.

Notas

1. O “commando”, “disposition”.
2. O “commandar”.
3. O “doctrinas differente” ab le inseniamento jam recipite del apostolos de Christo.
4. O “fabulas”.
5. O “commandamento”.
6. O “transgressores”, illes qui refusa submitter se a leges.
7. O “homosexuales”.
8. O “fures de homines”.
9. O “arrogante”, “cruel”.
10. O “abundante”.
11. O “del quales io es le prime”.
12. O “como al prime”.
13. O “patientia”.