Biblia/Nove Testamento/Mattheo/Mattheo 9

←Mattheo 8

Le Biblia in Interlingua Mattheo

Mattheo 10→

Mattheo

9

Jesus sana un homine paralysate

¹Jesus montava in un barca e retornava trans le laco a in su citate^[1]. ²Justo tunc alcunes le portava un homine paralysate sur un lectiera. Quando Jesus videva lor fide, ille diceva al homine paralysate: “Confide in me, filio mie! Tu peccatos esseva remittite”. ³Alora, alcunes del expertos in le Lege^[2] diceva inter se: “Iste homine blasphemia!”. ⁴Quando Jesus percipeva lor cogitationes, ille diceva: “Quare cogita vos tal mal pensamentos? ⁵Que es plus facile, dicer: ‘Tu peccatos esseva remittite’, o dicer: ‘Leva te e ambula’? ⁶Assi io va nunc demonstrar vos que le Filio del homine ha le potestate in terra de remitter le peccatos^[3]!”. Alora Jesus, adressante se al homine paralysate, le diceva: “Leva te, prende tu lectiera e retorna a tu casa!”. ⁷Assi, subito ille homine se levava e retornava a su casa! ⁸Quando le turba videva lo que habeva evenite, illes se espaventava e glorificava Deo, qui habeva date un tal potestate a homines”.

Le vocation de Mattheo

⁹Dum Jesus prosequeva ab ibi, ille videva un homine appellate Mattheo, que sedeva al cabina del perception del impostos. Jesus le diceva: “Seque me!”. Assi, ille se levava e le sequeva.

¹⁰Plus tarde. Mattheo invitava Jesus e su discipulos pro un repasto in su casa. Altere collectores de impostos e gente malfamate^[4] habeva essite alsi invitate. ¹¹Quando le Phariseos videva isto, illes diceva al discipulos de Jesus: “Quare vostre magistro sede a tabula con tal gente malfamate^[5]?”. ¹²Jesus audiva isto e replicava: “Illes qui es san non necessita un medico: le malades le necessita”. ¹³Deinde ille addeva: “Vade e apprende lo que significa iste dicto del Scripturas: ‘Io vole misericordia e non sacrificios^[6]’. Io non veniva pro vocar justos, sed peccatores”.

Un discussion super le jejunio

¹⁴Tunc le discipulos de Johannes^[7] accedeva a Jesus e le diceva: “Quare nos e le Phariseos jejuna frequentemente, e tu discipulos non jejuna?”. ¹⁵Jesus replicava: “Le convitatos de nuptias non pote luger quando con illes es le sponso, nonne? Tamen, venira le dies quando le sponso essera portate via ab illes, e tunc illes jejunara.

¹⁶Ultra illo, nemo sue a un vestimento vetule un sarcitura de panno rude^[8], quia le sarcitura se contraherea e le scissura devenirea pejor. ¹⁷Non mesmo on pone vino nove in urceos vetere, alteremente illo rumperea le urceos, le vino se dispergerea e le urceos ipse esserea ruinate. Al contrario, on pone vino nove in urceos nove, e ambes se preserva”.

Jesus sana e face reviver

¹⁸Durante que Jesus diceva iste cosas, le preposito de un synagoga accedeva e, prosternente se ante ille, le diceva: “Mi filia ha justo morite; tamen, veni, impone super illa tu manos e illa tornara a viver”. ¹⁹Jesus e su discipulos, alora, se levava e incipeva sequer le. ²⁰Ma un femina, qui habeva patite per dece-duo annos de hemorrhagias, accedeva a su retro e tangeva le bordo del mantello de Jesus. ²¹De facto, intra se, illa diceva: “Se solmente io tange su vestimentos, io essera resanate”. ²²Ma quando tamen Jesus se verteva e la videva, ille diceva: “Va confider, filia, tu fide te ha salvate!”. E desde ille momento, illa esseva resanate^[9]. ²³Quando Jesus entrava in le domo de ille preposito e audiva le musica funerari e le turba tumultuante, ille diceva: ²⁴“Recede vos: le juvenetta non ha morite, ma illa dormi!”. E illes incipeva derider le. ²⁵Quando le turba esseva facite sortir, Jesus entrava e prendeva le mano de celle juvenetta, e illa se levava. ²⁶E le nova concernente isto se diffundeva per tote ille region.

Sanar cecos e mutos

²⁷Post haber quitate le domo del juvenetta, duo homines cec incipeva sequer le, critante: “Filio de David, habe misericordia de nos!”. ²⁸Illes entrava justo in le domo ubi Jesus se trovava, e Jesus les peteva: “Esque vos crede que io pote facer vos vider^[10]?”. Illes le respondeva: “Si, Senior”. ²⁹Alora Jesus tangeva lor oculos e diceva: “Sia isto facite vos secunde vostre fide!”. ³⁰E lor oculos esseva aperite! Jesus, tamen, les preveniva severmente dicente: “Non conta a alicuno de lo que eveniva vos!”. ³¹Nonobstante, quando illes sortiva illes diffundeva iste nova per tote ille integre region.

³²Quando illes partiva, le esseva portate un homine que esseva possedite per un demone e non poteva parlar. ³³Assi Jesus expelleva celle demone e celle homine poteva de novo parlar. Le turbas esseva stupefacite e diceva: “Nunquam eveniva cosas como istos in Israel!. ³⁴Le Phariseos, tamen, diceva: “Ille expelle demones gratias al capite del demones!”.

Laboratores pro le vinea

³⁵Alora Jesus circulava per tote le citates e villages, docente in lor synagogas. Ille predicava le Evangelio del Regno e sanava ab omne sorta de maladias e infirmitates. ³⁶Quando ille videva le turbas, ille los commiserava, quia illos esseva desolate e inope, sicut oves non habente pastor. ³⁷Tunc ille diceva a su discipulos: “Le messe es multe, ma le laboratores es pauc. ³⁸Ergo roga al Senior del messe ut ille manda laboratores in su agros^[11]”.

Notas

1. Capernaum.
2. O “scribas”.
3. Litt. “ut vos sape que le Filio del homine ha le potestate in terra de remitter le peccatos”.
4. Litt. “peccatores”.
5. Litt. “publicanos e peccatores”.
6. Un citation de Hosea 6:6.
7. Johannes le baptisator (le Baptista).
8. Nove, non ancora contrahite.
9. O “salvate”.
10. O “facer vos isto?”.
11. O “messes”.