Biblia/Nove Testamento/Mattheo/Mattheo 4

Mattheo

4

Le tentationes de Jesus

¹Tunc Jesus esseva ducite per le Spirito a in le deserto ut esser tentate ibi per le diabolo.

²Depost quaranta dies e quaranta noctes de jejuno ille esseva affamate. ³Durante ille tempore le temptator le se approximava e le diceva: “Si tu es le Filio de Deo, commanda^[1] a iste lapides de devenir pan!”. ⁴Ma ille respondeva: “No! Le Scripturas dice: ‘Non de pan solmente vive le homine, sed de omne parola que procede del ore de Deo^[2]’”.

⁵Tunc le diabolo le portava al sancte citate, Jerusalem, e le faceva star supra le pinnaculo^[3] del Templo, ⁶e le diceva: “Si tu es le Filio de Deo, jecta te a basso! Quia le Scripturas dice: ‘Ille commandara a su angelos de proteger te. Illes te sustenera con lor manos a que non te feri un pede contra un lapide^[4]’”. ⁷Ma Jesus le respondeva: “Le Scripturas dice alsi: ‘Non pone a proba^[5] le Senior tu Deo^[6]’”.

⁸Itero, le diabolo le portava super un monte multo alte, e le ostendeva omne le regnos del mundo e lor gloria^[7]. ⁹E ille le diceva: “Io te dara tote iste cosas si tu te prosterne e me adora!”. ¹⁰Tunc Jesus le diceva: “Vade via, Satana! Quia le Scripturas dice: “Adora le Senior tu Deo e servi solmente ille^[8]’”. ¹¹Tunc le diabolo le relinqueva, e ecce, angelos se approximava a ille e incipeva ministrar le.

Le predication in Galilea

¹²Quando Jesus audiva que Johannes habeva essite imprisionate, ille recedeva in Galilea. ¹³Relinquite Nazareth, ille veniva resider in Capharnaum, un citate maritime, in le region de Zabulon e Nephtali, ¹⁴ut se compliva lo que esseva dicite per le propheta Isaia^[9]: ¹⁵“Le terra de Zebulon e le terra de Nephtali, longe le via del mar, trans le Jordan, Galilea del gentes^[10] - ¹⁶le populo que sedeva in le tenebras videva un grande luce, e super illes qui sedeva in ille region sub le umbra del morte, un lumine ha brillate”. ¹⁷Ex inde Jesus incipeva predicar dicente: “Repenti vos de vostre peccatos, pro que le regno de Deo se approximava!”.

Le vocation del discipulos

¹⁸Ambulante juxta le mar del Galilea, Jesus videva duo fratres: Simon (nominate alsi Petro) e Andreas, su fratre. Illes jectava un rete in le aqua, quia illes esseva piscatores. ¹⁹Illes le diceva: “Veni post me^[11] e io facera vos piscatores de homines”. ²⁰E illes subito derelinqueva ibi lor retes e le sequeva. ²¹Procedente un poco plus in ultra, Jesus videva duo altere fratres: Jacobo, filio de Zebedeo, e Johannes, su fratre, que sarciva lor retes sedente in lor barca con lor patre Zebedeo, e les vocava. ²²Illes tosto, relinquite lor barca e lor patre, le sequeva.

Le ministerio de resanamento de Jesus

²³Jesus percurreva tote le Galilea, doceva in lor synagogas predicante le evangelio del regno, e sanava omne sorta de maladias e infirmitates del populo. ²⁴Su renomine assi se diffundeva usque al Syria. Le gente le portava totes que suffreva de varie males, includite illes con languores e tormentos, e illes que esseva opprimite per demones, lunaticos^[12] e paralyticos: Jesus sanava omnes. ²⁵Grande turbas le sequeva ab le Galilea, le Decapolis^[13], Jerusalem, Judea, e trans le fluvio Jordan.

Notas

1. O “dice”.
2. Un citation de Deuteronomio 8:3.
3. Le puncto le plus alte.
4. Un citation de Psalmo 91:12.
5. O “Non tempta”.
6. Un citation de Deuteronomio 6:16.
7. O “grandeur”.
8. Un citation de Deuteronomio 6:13.
9. Un citation de Isaia 9:1.
10. O “Galilea, ubi il ha multe Gentiles”.
11. O “seque me”.
12. O “epilepticos”.
13. O “le region del dece citates”.