Biblia/Nove Testamento/Mattheo/Mattheo 3

←Mattheo 2

Le Biblia in Interlingua Mattheo

Mattheo 4→

Mattheo

3

Le ministerio de Johannes le Baptista

¹In ille tempore veniva predicar in le deserto del Judea Johannes le Baptista. Ille diceva: ²“Repenti vos quia le regno del celo se approximava”. ³Johannes es ille del qual le propheta Isaia habeva parlate: ‘Ille es le voce que crita in le deserto: Prepara le via pro le Senior, libera su sentieros de omne obstaculo^[1]’! ⁴Le vestimentos de Johannes esseva intexite de pilo grossier de camelo e ille portava un cinctura de corio circa su lumbos. Su nutrimento esseva locustas e melle silvestre. ⁵Gente de Jerusalem, de tote Judea e de tote le region circa le fluvio Jordan, sortiva pro vider e audir Johannes. ⁶e quando illes confessava lor peccatos, ille les baptisava in le fluvio Jordan.

⁷Ma quando ille remarcava que il habeva multe phariseos e sadduceos qui le observava durante que ille baptisava, ille les denunciava e exclamava: “Vos, covata^[2] de viperas! Qui monstrava vos fugir ab le adveniente ira de Deo? ⁸Produce fructos que comprova vostre repententia, ⁹e non solmente dice le unes al alteres: ‘Nulle problema! Nos es descendentes de Abraham’. Illo significa nihil, proque io dice vos que Deo poterea suscitar filios de Abraham mesmo de iste lapides ipse. ¹⁰Justo nunc le hacha del judicio de Deo es placiate al radice del arbores, preste a colpar los. Si, omne arbore que non face bon fructos essera excidite e jectate in le foco.

¹¹Io baptisa con aqua illes qui se repenti de lor peccatos e retorna a Deo^[3]. Tamen, tosto va venir alicuno qui es plus importante^[4] que me - tanto importante que io non mesmo es digne de portar su sandalia como facerea un sclavo. Ille ipse vos baptisara con le Spirito Sancte e con le foco. ¹²Ille es preste a separar le vannatura ab le tritico con su ventilator. Pois ille mundificara le aira e colligera le tritico in su granario, ma comburera le vannatura con un foco inextinguibile”.

Le baptismo de Jesus

¹³Tunc veniva Jesus ab le Galilea al fluvio Jordan ut esser baptisate per Johannes. ¹⁴Johannes, tamen, essayava de dissuader lo, e le diceva: “Io necessita esser baptisate per te, e tu veni ad me?”. ¹⁵Ma Jesus le respondeva: “Permitte que isto occurre, quia il es juste pro nos complir tote lo que Deo require^[5]”. Assi Johannes conveniva baptisar le. ¹⁶Post su baptismo, Jesus sortiva del aqua, le celos se aperiva, e ille videva que le Spirito de Deo descendeva super ille sicut un columba e se placiava super ille. ¹⁷E ecce, se audiva un voce del celo que diceva: “Iste es mi Filio grandemente amate in le qual io me complace^[6]”.

Notas

1. Citation de Isaia 40:3.
2. O “progenie”.
3. O “in repententia”.
4. O “plus grande”.
5. O “Omne justitia”.
6. Le allusion in iste remarca del texto rememora Psalmo 2:7 e Isaia 42:1. Deo indica Jesus como le persona que ille seligeva, su electe.