Biblia/Nove Testamento/Mattheo/Mattheo 2

Mattheo

2

Eruditos veni del Oriente

¹Postquam Jesus esseva nascite in Bethlehem de Judea in le tempore^[1] del rege Herode, del Oriente perveniva a Jerusalem alicun eruditos^[2]. ²Illes inquireva: “Ubi es le rege del Judeos que justo nasceva? In Oriente nos videva surger su stella e nos veniva pro adorar le”. ³In audir isto, le rege Herode e tote Jerusalem con ille se alarmava^[3]. ⁴Alora Herode convocava tote le principes del sacerdotes e le expertos^[4] del Lege que il habeva inter le populo, e inquireva de illes ubi deberea nascer le Messia^[5]. ⁵Illes respondeva: “In Bethlehem de Judea, proque le propheta scribeva: ⁶“E tu, Bethlehem, terra de Judea, nullemente tu es le minus importante del citates de Judea, proque ex te sortira un prince que regera^[6] mi populo, Israel^[7]”.

⁷Alora, Herode faceva vocar celle eruditos pro inquirer de illes quando exactemente le stella appareva. ⁸Ille les mandava pois a Bethlehem e les diceva: “Vade e informa vos exactemente in re le puero. Quando vos le trova, face me lo saper, a que io alsi pote vader a adorar le”. ⁹Post haber audite iste parolas del rege, illes partiva. E ecce, le stella que illes habeva vidite surger in le Oriente, les appareva de novo e les precedeva, usque illo se haltava super le loco ubi esseva le puero. ¹⁰Quando le eruditos videva le stella, illes se allegrava con gaudio grandissime. ¹¹Illes entrava in le domo, videva le puero con Maria su matre, e prostrante se a terra, illes le adorava. Inde, illes aperiva lor coffros e le offereva donos: auro, incenso e myrrha. ¹²E post haber essite prevenite in sonio de non vader de novo vider Herode, illes retornava a lor pais per un altere via.

Fuga a in Egypto

¹³De post lor partita, un angelo del Senior appareva a Joseph in sonio e le diceva: “Leva te, prende le puero e su matre, e fugi a in Egypto. Remane ibi usque io te avisa, proque Herode cercara le puero pro occider le”. ¹⁴Alora Joseph se levava, prendeva le puero e su matre durante le nocte e vadeva a in Egypto. ¹⁵Ille remaneva ibi usque le morte de Herode. Isto se compliva secundo lo que le Senior habeva annunciate per le medio del propheta que diceva: “Ex Egypto io vocava mi filio^[8]”.

Le massacro del innocentes

¹⁶Tunc Herode, vidente que le eruditos le habeva dupate, irasceva e tosto ille ordinava a su soldatos de occider in Bethlehen in le region circumstante tote le infantes sub duo annos de etate secundo le tempore que ille habeva apprendite del eruditos. ¹⁷Se compliva assi lo que habeva dicite le propheta Jeremia: ¹⁸“Se audiva in Rama un voce, grande plorar e lamentos: Rachel plora su filios, e non vole que alicuno la consola, proque illes esseva subtrahite a illa^[9]”.

Retorno a Nazareth

¹⁹In Egypto, post le morte de Herode, un angelo del Senior appareva a Joseph e le diceva: ²⁰“Leva te, prende le puero e su matre e retorna in le terra de Israel, nam defuncte es illes qui voleva occider le puero”. ²¹Assi, ille se levava, prendeva le puero e su matre e retornava in le terra de Israel. ²²Audiente tamen, que Archelao regnava in Judea in loco de su patre Herode, ille timeva de vader ibi. Prevenite in un sonio, ille se retirava in le region del Galilea. ²³Ille veniva a in un urbe nominate Nazareth, e viveva ibi. Assi se compliva lo que esseva dicite per le prophetas, illo es, que Jesus haberea essite vocate “le Nazareno^[10]”.

Notas

1. Greco: “In le dies”.
2. Traditionalmente “magos”, un classe de homines erudite, astrologos e sacerdotes.
3. O “turbava”.
4. O “scribas”.
5. O “le Christo”.
6. O “pasturara”.
7. Un citation de Michea 5:2.
8. Un citation de Hosea 11:1.
9. Un citation de Jeremia 38:15.
10. Probabilemente il esseva un expression de derision.