Biblia/Nove Testamento/Mattheo/Mattheo 21

Mattheo

21

Le entrata triumphal de Jesus in Jerusalem

¹Approximante se a Jerusalem, Jesus e su discipulos veniva al village de Bethfage sur le Monte del Olivetos. Jesus mandava duo de illes avante. ²Ille les diceva: “Vade a in le village contra vos. Ibi vos videra tosto un asina alligate e con illa un asinetto^[1]. Disliga los e adduce los a me. ³Si alicuno pete vos que vos face, justo dice: “Le Senior los necessita” e ille immediatemente permittera vos de prender los”. ⁴Isto eveniva pro complir le prophetia que dice: ⁵“Dice al populo^[2] de Sion. “Ecce, tu rege veni a te. Ille es mansuete e sede super un asina - e super un asinetto, le pullo de un asina^[3]”. ⁶Assi le discipulos faceva sicut Jesus les habeva commandate. ⁷Illes le adduceva le asina e le asinetto e poneva super illos lor mantellos e ille se sedeva sur illos. ⁸Plure personas del turba extendeva lor vestimentos sur le via, e alteres excideva ramos del arbores e los extendeva sur le via. ⁹Le turbas que le precedeva e que le sequeva clamava dicente: “Hosanna^[4] al filio de David! Sia benedicite qui veni in le nomine del Senior! Hosanna in le plus alte del celos!”. ¹⁰Su entrata in Jerusalem causava un grande commotion per tote le citate e le gente peteva: “Qui es iste?”. ¹¹E le turbas replicava: “Ille es Jesus, le propheta ab Nazareth de Galilea”.

Le purification del Templo

¹²Jesus entrava in le cortes del Templo e incipeva expeller de illo omnes qui vendeva e emeva animales pro sacrificios. Ille alsi subverteva le tabulas del cambiatores de moneta e le sedes de illes qui vendeva columbas. ¹³Ille les diceva: “Le Scripturas declara: ‘Mi templo essera appellate un domo de precaria^[5]’, ma vos lo transformava in un antro de robatores^[6]”.

¹⁴Personas cec e claude le accedeva in le Templo e illes les sanava. ¹⁵Le principal sacerdotes e le expertos del Lege religiose videva le meravilias que ille faceva, e audiva le pueros in le cortes del Templo que exclamava: “Lauda Deo^[7] pro le Filio de David!”, e propter isto illes esseva indignate. ¹⁶Illes peteva a Jesus: “Audi tu quid istes dice?”. “Si,” Jesus replicava, “e esque vos unquam legeva quid le Scripturas dice? ‘Tu inseniava a infantes e a lactantes de laudar te^[8]”. ¹⁷Assi, relinquite les, ille retornava a Bethania, ubi ille pernoctava.

Jesus maledice un fichiero

¹⁸Mane, durante que Jesus retornava a Jerusalem, ille habeva fame. ¹⁹Ille videva un arbore de ficos al latere del via e se approximava a ille fichiero pro vider si il habeva ficos a mangiar, ma ibi illes non los trovava: il habeva solmente folios. Assi ille diceva a illo: “Nunquam plus va nascer fructos de te!”, e immediatemente le fichiero marcesceva. ²⁰Vidente lo que habeva evenite, le discipulos esseva stupefacite e diceva: “Quomodo iste fichiero marcesceva tanto rapidemente?”. ²¹Jesus les respondeva: “Io vos dice le veritate: si vos ha fide e non hesita, vos ipse poterea alsi facer tal cosas, e multo de plus. Vos poterea mesmo dicer a iste monte: ‘Leva te de hic e jecta te in le mar!’ e isto evenirea. ²²Vos pote precar pro qualcunque cosa e, si vos ha fide, vos lo reciperea!”.

Defia al autoritate de Jesus

²³Quando Jesus retornava in le cortes del Templo e incipeva docer, le principal sacerdotes e le ancianos del populo le accedeva e le diceva: “Per qual potestate tu face iste cosas e qui te dava le derecto de facer lo^[9]?”. ²⁴Jesus les replicava: “Io va dicer vos per qual autoritate io face iste cosas si vos responde a un question solmente: ²⁵Esque le potestate de Johannes a baptisar proveniva del Celo, o illo esseva simplemente human?”. Illes discuteva^[10] de isto inter se dicente: “Si nos dice ‘del Celo’, ille poterea responder: ‘Quare ergo vos non le credeva?’, ²⁶ma si nos dice que illo esseva simplemente human, nos riscarea le reaction del turba, quia omnes reputa que Johannes esseva un propheta”. ²⁷Assi illes finalmente replicava: “Nos non lo sape”. E Jesus respondeva: “Alora nec io va dicer vos per qual potestate io face tal cosas”.

Le parabola del duo filios

²⁸“Ma quid pensa vos in re isto? Un homine con duo filios un vice diceva al su primogenito: ‘Filio, hodie sorti e va laborar in le vinia’. ²⁹Le filio respondeva: ‘No, io non vole vader’, ma plus tarde ille cambiava idea e finalmente vadeva. ³⁰Deinde le patre diceva similemente al altere filio de vader a laborar in le vinia, e iste-ci le respondeva: ‘Si, senior, io vade’, ma ille non vadeva. ³¹Qui ex le duo obediva al voluntate del patre?”. Illes replicava: “Le prime”. Alora Jesus les explicava le significato de isto: “Io vos dice le veritateː publicanos^[11] e meretrices precedera vos in le Regno de Deo. ^{{{2}}}Quia Johannes le baptisator veniva e monstrava vos le juste maniera de viver, ma vos non le credeva, durante que publicanos e meretrices le credeva. E mesmo quando vos videva que isto eveniva, vos persisteva in vostre incredulitate e refusava repentir vos de vostre peccatos”.

Parabola del colonos perverse

³³Ora audi un altere parabola. Un certe latifundiario habeva plantate un vinia, circumferite lo con un sepe, excavate un fossa pro pressar le uva, e edificate un turre de observation. Deinde ille lo locava a colonos e se transfereva in un altere pais. ³⁴In le tempore del vindemia, ille mandava su servitores pro colliger su portion del recolta. ³⁵Le colonos, tamen, sasiva su servitores, bastonava uno, occideva un altere, e lapidava un altere ancora. ³⁶Itero le latifundiario mandava un gruppo plus large de su servitores pro colliger quid le esseva debite, ma le resultato esseva simile. ³⁷Finalmente, le latifundiario mandava su proprie filio, quia ille pensava: “Certo illes va respectar mi filio”. ³⁸Quando, tamen, le colonos videva arrivar su filio, illes diceva le unes al alteres: “Ecce, veni le herede de iste proprietate: vamos occider le e nos appropriara nos de su hereditate!”. ³⁹Assi, illes lo sasiva, le traheva foras del vinia e le assassinava. ⁴⁰Quando le proprietario del vinia retorna,” Jesus demandava: “Quid facera ille a celle colonos?”. ⁴¹Le capites religiose replicava: “Ille destinara celle perverse homines a un morte horribile e locara su vinia a alteres, le quales a su tempore le dara le portion del recoltas que le es debite”.

⁴²Alora Jesus les diceva: “Esque vos unquam legeva isto in le Scripturas: ‘Justo le lapide que le edificatores rejectava, deveniva nunc le petra angular. Le Senior ipse realisava isto, e il es un cosa stupefaciente a nostre oculos^[12]’. ⁴³Io dice vos que le Regno de Deo essera subtrahite de vos e date a gente que lo facera debitemente fructificar. ⁴⁴Quicunque impingera contra celle lapide, cadera e essera facite a pecias: illo fullara quicunque super le qual illo cadera”.

⁴⁵Quando le sacerdotes principal e le phariseos audiva iste parabola, illes comprendeva que Jesus habeva parlate re illes ipse. ⁴⁶Illes quereva arrestar le, ma timeva le turbas, que reputava Jesus esser un propheta.

Notas

1. O “pullo”.
2. Litt. “al filia de”.
3. O “le pullo de un animal sub le jugo”. Un citation de Zacharia 9:9.
4. O “Sia laudate Deo pro le filio de David”, cfr. Psalmo 118:25-26.
5. Un citation de Isaia 56:7.
6. Un citation de Jeremia 7:11.
7. Litt. “Hosanna”.
8. Un citation de Psalmo 8:2, anque: “Ex le ore de infanctes e lactantes tu te procurava un laude”.
9. O “le potestate”.
10. O “cogitava”.
11. Collectores dishoneste de impostos.
12. Un citation de Psalmo 118:22-23.