Biblia/Nove Testamento/Mattheo/Mattheo 15

Mattheo

15

Le inseniamento de Jesus super le puritate interior

¹Tunc veniva ab Jerusalem alcun Phariseos e maestros del Lege religiose^[1], le accedeva e le diceva: ²“Quare tu discipulos transgrede le tradition de nostre populo^[2]? Quia illes non se lava ceremonialmente le manos ante mangiar”.

³Jesus les respondeva: “Quare vos, propter vostre tradition, transgrede le directe commandamentos de Deo? ⁴Nam Deo diceva: “Honora tu patre e tu matre^[3]”, e “Qui maledice patre o matre debera esser ponite a morte^[4]”. ⁵Vos, tamen, dice: “Quicunque dice a su patre o su matre: ‘Io non pote adjuvar te, quia io faceva le voto de dar a Deo lo que io haberea potite dar te’. ⁶Assi, vos dice, un tal persona es exemptate de honorar su genitores. In dicer assi, vos de facto nullifica le Parola de Deo propter vostre tradition. ⁷Hypocritas! Isaiah habeva ration quando de vos ille prophetisava dicente: ⁸“Iste gente me honora solmente con lor labios, ma lor corde es longe de me. ⁹Illes me cole sin causa e insenia doctrinas que es solmente commandamentos de homines^[5]”.

¹⁰Alora Jesus convocava le turbas ad se e les diceva: “Audi e essaya comprender: ¹¹Il non es quid entra in le bucca de un homine que le pollue, ma quid^[6] procede ex le ore de un homine que lo pollue!”.

¹²Tunc le discipulos de Jesus le accedeva e le diceva: “Esque tu non comprende^[7] que lo que tu justo diceva multo offendeva^[8] le Phariseos?”. ¹³Jesus replicava: “Omne plantation que mi Patre celeste non plantava essera eradicate. ¹⁴Non occupa vos de illes. Illes es cecos qui guida altere cecos, e si un ceco guida un altere ceco, ambes va cader in un fossato”.

¹⁵Alora Petro diceva a Jesus: “Explica nos le parabola que dice que on non pote esser polluite per lo que nos mangia”. ¹⁶E ille le diceva: “Ancora vos non comprende? ¹⁷Esque vos non comprende que lo que entra in le bucca vade in le ventre, e pois es expellite in le cloaca? ¹⁸Quid, tamen, sorti del bucca, vostre parolas, exi del corde - illo es lo que pollue le homine. ¹⁹Quia del corde sorti pensamentos malefic, homicidios, adulterios, fornication, furtos, false testimonio, blasphemias. ²⁰Illos es quid pollue le homine, ma mangiar sin lavar se le manos non pollue le homine”.

Le fide de un femina canaanita

²¹Depost haber sortite inde, Jesus vadeva a in le region de Tyro e Sidon. ²²Un femina canaanite de celle placias le accedeva e le implorava dicente: “Habe misericordia de me, oh Senior, Filio de David! Mi filia es multo vexate per un demonio que la tormenta”. ²³Jesus tamen, non la dava ulle replica. E accedente a ille, su discipulos, le rogava dicente: “Dimitte la, quia illa insiste clamar post nos”. ²⁴Assi ille diceva al femina: “Io esseva mandate nisi ad le oves perdite del populo de Israel^[9]”. ²⁵Illa tamen, veniva e se prosterneva coram ille e diceva: “Senior, adjuva me!”. ²⁶Ille la respondeva: “Il non es juste prender le pan del filios e jectar lo al canes!”. ²⁷Si, Senior, ma mesmo le canes mangia le restos^[10] que cade del tabula del domino!”. ²⁸Alora Jesus la respondeva: “Oh femina, grande es tu fide! Te sia facite sicut tu vole”. E in ille mesme hora su filia esseva sanate.

Jesus sana multe gente

²⁹Quando ille quitava ille region, Jesus veniva preter le laco de Galilea e, ascendente super un monte, ille sedeva ibi. ³⁰E multe turbas le accedeva, multes qui habeva con se stropiatos, cecos, debiles, mutos e multe alteres. Illes les poneva al pedes de Jesus e ille les resanava. ³¹Ita illes esseva stupefacite de lo que eveniva. Illes videva mutos qui incipeva parlar, debiles qui esseva sanate, e cecos qui incipeva vider. E illes magnificava le Deo de Israel.

Jesus nutri quatro milles personas

³²Deinde, Jesus convocava su discipulos e les diceva: “Io senti compassion pro iste turba, quia il es jam tres dies que illes me sequeva, e non ha alco plus a mangiar. Io non vole dimitter les jejune, alteremente illes risca perder conscientia durante le via”. ³³E su discipulos le diceva: “Unde nos pote trovar in le deserto tante pan pro satisfacer un tal grande turba?”. ³⁴E Jesus les diceva: “Quante panes vos ha con vos?”. Illes le diceva: “Septe panes e poc parve pisces”. ³⁵De post haber instruite le turba de seder se in terra, ³⁶Ille prendeva le septe panes e le pisces, los dava al discipulos , ille rendeva gratias a Deo, los frangeva e distribueva le alimentos inter le turba. ³⁷Assi, omnes mangiava e esseva satiate. Depost isto, con le fragmentos superflue. se reimpleva septe corbes. ³⁸Illes qui habeva mangiate esseva quatro milles homines, sin comptar le feminas e le infantes. ³⁹Pois, ille dimitteva le turbas, montava super un barca e transiva usque le region de Magadan.

Notas

1. O “scribas”, cfr.2:4.
2. O “le tradition del ancianos”.
3. Un citation de Exodo 20:12; Deuteronomio 5:16.
4. Un citation de Exodo 21:17; Levitico 20:9.
5. Un citation de Isaia 29:13.
6. Le parolas.
7. O “sape”.
8. O “scandalisava”.
9. O “domo”.
10. O “micas”.