Biblia/Nove Testamento/Mattheo/Mattheo 14

←Mattheo 13

Le Biblia in Interlingua Mattheo

Mattheo 15→

Mattheo

14

Le morte de Johannes le baptisator

¹In ille tempore Herodes, le tetrarcha del Galilea, audiva in re le fama de Jesus. ²Assi ille diceva a su servitores: “Iste es Johannes le baptisator qui resurgeva del mortos! Il es propter isto que potentias miraculose es operante in ille”. ³Quia Herodes habeva facite arrestar e imprisionar Johannes pro complacer Herodiade (le ex-uxor de Philippo, fratre de Herodes). ⁴Johannes repetitemente diceva a Herode: “Le Lege de Deo non te permitte de maritar te con illa^[1]”. ⁵Quamquam Herode haberea volite facer assassinar Johannes, ille timeva le populo, quia illes le reputava un propheta. ⁶Ma in le die natal de Herodes, le filia de Herodiade habeva dansate in lor medio, e isto placeva a Herodes, ⁷tanto que ille habeva promittite con un juramento de accordar la quecunque illa desirava. ⁸Instruite per su matre, illa habeva dicite: “Da me le capite de Johannes le baptisator hic sur un tabuliero”. ⁹Nunc le rege regrettava de haber facite un tal promissa, ma, propter le juramento facite coram su convitatos, ille non lo poteva denegar lo a illa. Alora ille dava le ordines necessari, ¹⁰e Johannes esseva decapitate in le prision, ¹¹e su capite portate sur un tabuliero e date al juvenetta, qui, a su vice, lo habeva date a su matre. ¹²Plus tarde, le discipulos de Johannes habeva petite su corpore e lo habeva interrate. Inde illes vadeva e informava Jesus in re tote isto.

Le multiplication del panes

¹³Ora, quando Jesus audiva iste nova, con un barca ille se retirava in solitude in un loco remote. Quando, tamen, le turba audiva ubi ille se habeva dirigite, de multe citates illes le sequeva a pedes. ¹⁴In descender del barca, Jesus videva ille grande turba, habeva compassion de illes e sanava lor malades. ¹⁵Ille vespere, le discipulos le accedeva e le diceva: “Iste loco es remote e jam se face tarde. Dimitte le turbas ut illes pote vader a in le villages e emer se le mangiar”. ¹⁶Ma Jesus les diceva: “Isto non es necesse: vos va dar les a mangiar”. ¹⁷Illes respondeva: “Nos ha hic solmente cinque panes e duo pisces!”. ¹⁸Ille les diceva: “Porta los hic a me!”. ¹⁹Deinde ille instrueva le turbas de seder se sur le herba. Jesus levava su oculos al celo, regratiava Deo e frangeva le panes. Ille los dava al discipulos, que, a lor vice, dava los al turbas. ²⁰Omnes assi mangiava e esseva satisfacite. Postea se recolligeva le residuos e de illos se impleva dece-duo corbatas. ²¹Circa cinque milles homines esseva nutrite ille die, sin contar tote le feminas e le infantes!

Jesus cammina sur le aquas

²²Subinde Jesus insisteva que su discipulos retornava in le barca e transiva al altere latere del laco, donec ille dimitteva le turbas. ²³Dimittite le turba, ille ascendeva sol a un monte pro precar. Quando se faceva vespere, ille ancora esseva ibi sol. ²⁴intertanto le barca, jam procul del ripa, esseva fortemente succutite per le undas, quia le vento lo esseva contrari. ²⁵Quasi al termino del nocte^[2], Jesus veniva a lor incontro, ambulante sur le aquas. ²⁶Quando le discipulos le videva ambulante sur le aquas, illes esseva valde espaventate e diceva: “Illo es un phantasma”, e illes critava de terror. ²⁷ubito, tamen, Jesus les parlava e diceva: “Habe fiducia, il es io, non time!”. ²⁸Alora Petro le respondeva e diceva: “Senior, si il es tu, commanda que io veni a te sur le aquas!”. ²⁹E Jesus le diceva: “Veni!”. Assi Petro, descendente del barca, ambulava sur le aquas e veniva a Jesus. ³⁰Quando, tamen Petro videva le vento multo forte e le undas, ille esseva espaventate e le aquas incipeva submerger le. Alora ille exclamava: “Salva me, Senior!”. ³¹Alora Jesus subito extendeva su mano e le sasiva. Jesus le diceva: “Tu fide es debile^[3], quare dubitava tu^[4]?”. ³²Quando illes montava in le barca, le vento subito cessava. ³³Assi, illes qui esseva in le barca se prosterneva ante ille e exclamava: “Vero tu es le Filio de Deo”.

³⁴Arrivate al altere latere del laco, illes perveniva a Gennesaret. ³⁵Quando le gente de ille loco le recognosceva, le nova de su arrivata se dispergeva per tote ille region, e tote le personas malade le esseva portate. ³⁶Illes le rogava de poter tanger al minus le fimbria de su vestimento; e totes qui lo tangeva esseva sanate.

Notas

1. Litt. “Non te es licite de haber la”.
2. Litt. “Al quarte vigilia del nocte” (inter 3 e 6 horas del nove jorno).
3. O “Tu de poc fide”, non fide in se, ma fide in Jesus.
4. “Quare tu dubitava que il es io e que io pote sustener te?”.