Biblia/Nove Testamento/Mattheo/Mattheo 13

Mattheo

13

Le parabola del seminator

¹In ille die Jesus sortiva del domo e se sedeva apud le laco. ²Tanto grande esseva le turba que se habeva congregate circum ille, que ille esseva fortiate a montar sur un barca. Alora ille se sedeva ibi durante que le integre turba stava sur le litore. ³Ille se adressava al turba e les doceva multe cosas in le forma de parabolas. In uno de illos Jesus diceva: “Audi! Un seminator sortiva a seminar. ⁴Durante que ille seminava, alicun semines cadeva sur un sentiero, e veniva aves e los mangiava. ⁵Alteres cadeva sur un terreno petrose, ubi il non habeva multe terra syb illo. Le semines germinava presto quia le solo non esseva profunde. ⁶Quando, tamen, le sol sortiva, le plantas esseva adurite e, quia illos non habeva bastante radice, illos marcesceva. ⁷Altere semines cadeva inter spinas, e le spinas cresceva e lo suffocava. ⁸Ma altere semines cadeva sur bon^[1] terra, e illos produceva grano^[2]: un recolta que esseva trenta, sexanta, e mesmo cento vices de plus de illo que habeva essite plantate! ⁹Qui ha aures lo audi!”.

¹⁰Alora su discipulos accedeva a ille e le diceva: “Quare emplea tu parabolas quando tu parla al gente?”. ¹¹Ille les replicava: “Quia a vos es date de cognoscer le mysterios del Regno del Celos, ma a illes non es date. ¹²A qui ha, essera date de plus, e habera abundantia de cognoscentia. Ma quicunque non ha^[3], mesmo lo que ille ha^[4] le essera subtrahite. ¹³Isto es le ration proque con illes io emplea parabolas: quia illes reguarda, ma non vide vermente. Illes audi, ma non audi vermente ni comprende. ¹⁴Isto compli le prophetia de Isaia que dice: ‘Vos audira attentivemente, ma vos nunquam lo comprendera; vos perscrutara, ma non lo intendera, ¹⁵quia le cordes de iste populo deveniva obtuse; illes es dur de audito, e illes claudeva lor oculos, assi que illes non vide con lor oculos ni audi con lor aures, ni comprende con lor cordes e non se reverte a me a que io les resana^[5]”.

¹⁶Beate vostre oculos, tamen, quia illos vide, e vostre aures, quia illos audi. ¹⁷In veritate io dice vos que multe prophetas e justos desirava ardentemente vider lo que vos vide ma non lo videva, e audir lo que vos audi, ma non lo audiva!

¹⁸Vos, ergo, audi le explication del parabola in re le seminator. ¹⁹Quando alicuno audi la parola in re le regno e non lo comprende, le Maligno veni e sasi quid esseva seminate in su corde. Isto es le semine cadite^[6] sur un sentiero. ²⁰Le semine cadite sur un terreno petrose es le persona qui audi le parola e subito lo recipe gaudiosemente. ²¹Illo, tamen, non ha in se un radice e es temporanee; quando veni le tribulation o le persecution propter le parola, subito a causa de illo, ille es scandalisate e quita. ²²Le semine seminate inter le spinas es le persona qui audi le parola, ma le sollicitudes de iste mundo e le deception^[7] del ricchessas suffoca le parola e illo remane sin fructo. ²³Quanto al semine seminate sur un bon terra, isto es le persona qui audi le parola e lo comprende. Illo produce fructos, rendente cento, sexanta, o trenta vices de plus de quid esseva seminate.

Le parabola del mal herba

²⁴Jesus les proponeva un altere parabola. Ille les diceva: “Le Regno del Celos es simile a un homine qui seminava bon semine in su agro. ²⁵Ma quando omnes dormiva, un su inimico veniva e seminava mal herbas^[8] inter le medio del tritico e se allontanava. ²⁶Quando le herbas cresceva e fructificava, tunc appareva alsi le mal herbas. ²⁷ssi le servos del domino accedeva a ille e le diceva: ‘Domino, nonne tu seminava bon semine in tu agro? Unde ergo veni iste mal herbas?”. ²⁸Ille replicava: ‘Un inimico ha facite isto!’. Alora le servos le diceva: “Esque tu vole que nos vade e los extirpa?’. ²⁹Ma ille diceva: “No, il ha le risco que in colliger le mal herbas, vos extirpa alsi le tritico. ³⁰Va lassar los crescer insimul usque al recolta. in le tempore del recolta, io dicera al falcatores: ‘Primo collige le mal herbas e liga los in fasciculos pro comburer lo; deinde collige le tritico e porta lo in mi granario’”.

Le parabola del semine de mustarda

³¹Jesus les proponeva un altere parabola. Ille les diceva: “Le Regno del Celos es simile a un semine de mustarda que un homine prendeva e seminava in su agro. ³²Quanquam illo es le plus parve de tote le semines, quando illo ha crescite, illo es le plus large del plantas del jardin e deveni un arbore, tanto que le aves del celo veni e habita in su ramos”.

Le parabola del levatura

³³Jesus les contava un altere parabola: “Le Regno del Celos es simile al levatura que un femina emplea pro facer pan. Mesmo si illa poneva solmente un poco de levatura in tres mensuras de farina, illo permea omne partes del pasta”.

Le proposito del parabolas

³⁴Jesus empleava semper parabolas quando ille parlava in re tote isto al turbas; ille nunquam les parlava sin parabolas. ³⁵Isto compliva lo que esseva dicite per le propheta: “Io aperira mi bucca in parabolas. Io annunciara lo que ha essite occultate desde le fundation del mundo”.

Explication pro le discipulos

³⁶Tunc, dimittite le turba, Jesus reveniva a in le domo, e su discipulos le accedeva dicente le: “Explica nos le parabola del mal herba in le agro”. ³⁷Ille respondeva: “Qui semina le bon semine es le Filio del Homine. ³⁸Le agro es le mundo e le bon semine es le gente^[9] del Regno. Le mal herbas es le gente qui pertine al Maligno, ³⁹e le inimico qui les semina es le diabolo. Le recolta es le fin^[10] del etate e le falcatores es le angelos. ⁴⁰Sicut ergo, le mal herbas se extirpa e los jecta in le foco, assi il essera in le fin del etate. ⁴¹Le Filio del Homine mandara su angelo e illes colligera de su regno toto lo que es causa de peccato^[11] insimul a tote illes qui face le mal^[12]. ⁴²Illes les jectara in le fornace ardente^[13], in le qual il habera plorar e stridor de dentes. ⁴³Tunc le justos refulgera sicut le sol in le Regno de lor patre. Qui ha aures, lo audi!”.

Parabolas in re le Regno del Celos

⁴⁴Le Regno del Celos es simile a un tresor que un persona discoperiva occultate in un agro. Isto le dava multissime gaudio e lo occultava de novo. Ergo ille vendeva tote lo que ille possedeva pro haber bastante moneta pro emer ille agro.

⁴⁵Itero, le Regno del Celos es simile a un mercator qui quere pretiose perlas^[14]. ⁴⁶Quando ille discoperiva un perla de grande valor, ille vendeva tote lo que ille possedeva e lo emeva!

⁴⁷Itero, le Regno del Celos es simile a un rete que, jectate in le mar, cape omne sorta de pisces. ⁴⁸Quando le rete esseva plen, le piscatores lo traheva al litore, se sedeva e assortiva le bon pisce in un cassa. ma jectava via le mal pisces. ⁴⁹Il essera assi al fin del etate. Le angelos venira e separara le gente mal del medio del justos, ⁵⁰jectante le mal in le furnace ardente, in le qual il habera plorar e stridor de dentes.

⁵¹Esque vos comprendeva tote iste cosas?”. Illes replicava: “Si, nos los comprende”. ⁵²Tunc Jesus addeva: “Omne experto in le Lege qui esseva trainate pro le Regno del Celos es simile a un proprietario de un domo qui extrahe de su tresor tanto lo que es nove e lo que es vetere^[15]”.

Jesus rejectate ab Nazareth

⁵³Quando Jesus terminava contar tote iste parabolas, ille quitava celle parte del pais. ⁵⁴Ille retornava assi a Nazareth, in su patria. Quando ibi ille doceva in le synagoga local, omnes remaneva maraviliate e diceva: “Unde trahe ille iste sapientia e poter de operar miraculos?” ⁵⁵Nonne iste es le filio del carpentero? Nonne su matre se appella Maria, e su fratres es Jacobo, Joseph, Simon e Judas? ⁵⁶E su sorores, nonne omne istas es apud nos? Unde ille apprendeva tote iste cosas?”. ⁵⁷Illes esseva multo scandalisate^[16] de ille. Jesus, tamen, les diceva: “Un propheta es honorate ubicunque, excepte in su patria e inter su familia^[17]. ⁵⁸E assi ille non faceva ibi multe miraculos propter lor incredulitate.

Notas

1. O “fertile”.
2. O “portava fructo”.
3. Qui non audi.
4. Le comprension que ille jam ha.
5. Un citation de Isaia 6:9-10.
6. O “seminate”.
7. O “fallacia”.
8. O “zizania”, “lolio”.
9. Litt. “le filios”.
10. O “consummation”.
11. O “scandalos”.
12. O “iniquitates”.
13. Un citation de Daniel 3:6.
14. Un citation de Psalmo 78:2.
15. Nove gemmas de veritate insimul al vetere.
16. Vide capitulo 11 nota 4.
17. O “in su domo”.