Biblia/Nove Testamento/Hebreos/Hebreos 5

Epistola al Hebreos

Capitulo 5

¹Omne summe sacerdotes es prendite ex inter le populo e appunctate pro representar les coram Deo e pro offerer sia donos sia sacrificios in expiation^[1] de lor peccatos. ²Ille pote condoler se de illes qui es ignorante e errante, quia ille ipse es alsi subjecte a infirmitates. ³Propter isto ille debe presentar offertas pro le peccatos, sia in favor de se ipse, sia in favor del populo. ⁴Nemo sume ille honor de su proprie initiativa, ma solmente quando ille es vocate a isto per Deo, como in le caso de Aaron. ⁵Isto es le ration pro le qual Christo non glorificava se ipse in le presumption de poter devenir Summe Sacerdote. No, ille esseva seligite per Deo, qui le habeva dicite: “Tu es mi Filio, hodie io ha devenite tu Patre^[2]”. ⁶Alsi in un altere loco Deo dice: “Tu es sacerdote pro semper, secundo le ordine de Melkisedek^[3]”.

⁷Durante su vita terren^[4], Christo offereva sia preces, sia supplicationes con alte critos e lacrimas a ille qui poteva salvar le del morte, e ille esseva exaudite propter su devotion^[5]. ⁸Ben que ille esseva de facto Filio, ille apprendeva le obedientia per le medio de lo que ille debeva patir. ⁹De iste maniera Deo le qualificava como perfecte Summe Sacerdote, e ille deveniva le fonte^[6] del salvation eterne pro tote illes qui le obedi^[7]. ¹⁰Ille esseva designate^[8] per Deo qua Summe Sacerdote secundo le ordine de Melkisedek.

Le necessitate de proceder verso le maturitate

¹¹Super iste subjecto nos ha multo a dicer, ma il es difficile explicar lo a vos quia vos deveniva spiritualmente torpide^[9] e il non pare que vos vermente audi. ²De facto, a iste puncto de vostre experientia, vos haberea debite jam esser magistros de doctrina christian. Al contrario, vos ancora necessita que alicuno vos doce le conceptos primari^[10] del Parola de Deo. Vos es simile a parve infantes qui necessita lacte e non pote mangiar nutrimento solide. ¹³Quia tote illes qui se nutri de lacte es ancora infantes, e non sape como facer lo que es juste^[11]. ¹⁴Le alimentos solide, tamen, es pro gente matur^[12], cuje facultates^[13] es trainate per le practica^[14] a discerner le bon e le mal.

Notas

1. Le termino “expiation” non es in le texto grec, ma nos lo addeva hic pro clarificar le significato del preposition “pro”, troppo generic.
2. O “hodie io te generava”, un citation de Psalmo 2:7.
3. Un citation de Psalmo 110:4.
4. Litt. “In le dies de su carne”.
5. O “profunde reverentia pro Deo”.
6. O “le autor”.
7. Litt. “pro tote le obedientes”.
8. O “appellate”.
9. O “obtuse”, lente a comprender.
10. O “cosas basic”.
11. O “non ha experientia del parola de justitia”.
12. O “accomplite”.
13. O “sensos”, “perceptiones”.
14. O “per le consuetude”.