Biblia/Nove Testamento/Hebreos/Hebreos 1

←Philemon

Le Biblia in Interlingua Epistola al Hebreos

Hebreos 2→

Epistola al Hebreos

Capitulo 1

Prologo

¹In multe differente occasiones e in multe manieras Deo parlava olim a nostre ancestres^[1] per le medio del prophetas, ²ma nunc, in iste dies, que es le ultimes, ille parlava a nos in le persona del Filio, per le medio del qual ille jam creava le mundo^[2] e que ille constitueva como su herede universal. ³Le Filio es le splendor de su gloria e le representation^[3] de su essentia. Ille sustene le universo con le potentia de su parola e nunc, complite le purgation^[4] del peccatos, ille se assideva in le locos excelse^[5], al dextera del majestate divin. ⁴Assi ille deveniva tanto melior que le angelos, quanto plus excellente que le lore esseva le nomine que ille hereditava.

Le Filio es superior al angelos

⁵De facto, a qual del angelos aliquando Deo diceva: “Tu es mi Filio! Hodie io te generava^[6]”? E ancora: “Io essera su patre e ille essera mi filio^[7]”. ⁶Ma quando itero ille introduce su primogenite in le mundo, ille dice: “Que tote le angelos de Deo le adora!^[8]”. ⁷Del angelos ille dice solmente: “Ille face de su angelos spiritos e de su ministros flammas de foco^[9]”. ⁸Ma del Filio ille dice: “Tu throno, oh Deo, se mantene per omne seculos, e le sceptro del justitia es le sceptro de tu regno. ⁹Tu amava le justitia e odiava le iniquitate; il es pro ille ration que Deo, tu Deo, te prefereva a tu companiones e te ungueva con le oleo e le perfumo del festa^[10]”^[11]. ¹⁰E, “Tu, Senior, in principio, fundava le terra e le celos es le obra de tu manos. ¹¹Illos essera destruite, ma tu permanera; tote illos se consumera como un veste. ¹²Como un mantello tu los involvera, e tu los mutara; mais tu remane le mesme, e tu annos nunquam terminara^[12]”. ¹³A qual del angelos aliquando Deo diceva: “Sede a mi dextra usque io pone tu inimicos como scabello de tu pedes^[13]”? ¹⁴Le angelos es solmente spiritos que exerce un ministerio, inviate pro render un servicio a qui debe hereditar le salvation.

Notas

1. Lit. “patres”.
2. Lit. “le etates”. Le temporal (le etates) es empleate pro le spatial (lo que existe in ille periodos). Vide Hebreos 11:3.
3. O “representation exacte”.
4. O “purification”.
5. Allusion a Psalmo 110:1.
6. Un citation de Psalmo 2:7.
7. Un citation de 2 Samuel 7:14 (cfr. 1 Chronicas 17:13).
8. Un citation que copula themas de Deuteronomio 32:43 e Psalmo 97:7.
9. Un citation del Psalmo 104:4.
10. O “Oleo de exultation”.
11. Un citation del Psalmo 45:6-7.
12. Un citation del Psalmo 102:25-27.
13. Un citation del Psalmo 110:1.