Biblia/Nove Testamento/Galatas/Galatas 6

←Galatas 5

Le Biblia in Interlingua Littera al Galatas

Ephesios 1→

Galatas

6

Supporta le unes le alteres

¹Fratres e sorores, si un persona es surprendite peccar^[1], vos qui es spiritual, va restabilir un tal persona con un spirito de humilitate^[2]. Vigila sur vos mesme de sorta que vos non sia tentate alsi. ²Porta le fardellos le unes del alteres, e assi vos complira le lege de Christo. ³Proque si alicuno pensa esser alique, durante que ille es nihil, ille decipe se mesme. ⁴Que cata uno examina su proprie obras. Alora ille habera ration de vantar se in se ipse sin comparar se con alicun altere. ⁵Proque cata uno portara su proprie fardello.

⁶Ille qui recipe instruction in le Parola^[3] debe condivider omne cosas bon con su instructor. ⁷Non va deciper vos mesme, Deo non pote esser irridite. On recolta lo que on semina, ⁸proque qui semina pro gratificar su proprie natura peccaminose^[4] recoltara ab le carne corruption, ma qui semina pro gratificar le Spirito, recoltara ab le Spirito vita eterne. ⁹Assi nos non debe desister^[5] in facer le ben, proque in le tempore debite nos recoltara, si nos non discoragia nos. ¹⁰Alora, quandocunque nos ha le opportunitate, vamos facer le ben a totes, specialmente a illes qui pertine al familia del credentes^[6].

Instructiones final e benediction

¹¹Reguarda quanto grande es le litteras que io usa in scriber a vos con mi proprie mano!

¹²Illes qui vole dar un bon impression exterior^[7] essaya fortiar vos a facer vos circumcider. Illes lo face solmente pro evitar esser persecutate pro le cruce de Christo. ¹³De facto, illes qui es circumcise non obedi le Lege, ma desira esser circumcise a que illes pote vantar se de vostre carne^[8]. ¹⁴Tamen, pro lo que me concerne, que nunquam io me vanta excepte que del cruce de nostre Senior Jesus Christo, per le qual le mundo, pro me, esseva crucifigite e io al mundo. ¹⁵De facto, ni le circumcision ni le incircumcision significa alique^[9]: le sol cosa que importa es un nove creation. ¹⁶E tote illes qui se comportara secundo iste regula, pace e misericordia sia super illes e super le Israel de Deo.

¹⁷In le futuro que nemo me causa enoios, proque io porta in mi corpore le signos^[10] de Jesus.

¹⁸Le gratia de nostre Senior Jesus Christo sia con vostre spirito, fratres e sorores. Amen.

Notas

1. O “in un transgression”.
2. O “gentilessa”.
3. O “Ille qui es catechisate”.
4. O “secundo le carne”.
5. O “devenir fatigate”.
6. O “del fide”, le christianos.
7. O “in le carne”.
8. Illo es, “de haber persuadite vos a submitter vos al ceremonia del circumcision”.
9. O “conta nihil”.
10. O “cicatrices”.