Biblia/Nove Testamento/Ephesios/Ephesios 1

←Galatas 6

Le Biblia in Interlingua Epistola al Ephesios

Ephesios 2→

Ephesios

1

Salutation

¹De Paulo, apostolo de Christo Jesus per voluntate de Deo, al sanctos que es in Epheso, le fideles in Christo Jesus: ²Gratia e pace a vos de Deo, nostre Patre e le Senior Jesus Christo!

Benedictiones spiritual in Christo

³Benedicite sia le Deo e Patre de nostre Senior Jesus Christo, qui nos benediceva con omne benedictiones spiritual in le sphera celeste in Christo, ⁴sicut ille nos eligeva in Christo ante le fundation del mundo, a fin que nos sia sancte e immaculate coram ille in amor. ⁵Ille lo faceva per predestinar nos al adoption qua su filios per Jesus Christo, secundo le consentimento de su voluntate - ⁶a laude del gloria de su gratia, que ille gratuitemente nos confereva^[1] in su amatissime Filio. ⁷In ille nos ha le redemption per su sanguine, le remission de nostre peccatos^[2] secundo le ricchessas de su gratia ⁸ - gratia que ille nos dava a profusion^[3] in omne sapientia e intelligentia^[4]. ⁹Ille lo faceva quando ille revelava^[5] le mysterio^[6] de su voluntate, le consentimento de lo que ille se proponeva e publicamente manifestava in Christo, ¹⁰illo es que, in le completion del tempores^[7], ille haberea recapitulate omne cosas in Christo - tanto lo que es in celo quanto lo que es sur le terra. ¹¹In Christo nos alsi esseva reclamate qua possession^[8] de Deo ipse, habente essite predestinate secundo le proposito de ille qui opera omne cosas secundo le consilio de su voluntate, ¹²a que nos, qui esseva le primes a poner nostre sperantia in Christo, haberea essite a laude de su gloria. ¹³Quando pois vos audiva le parola del veritate (le Evangelio de vostre salvation) - quando vos credeva in Christo - esseva ponite sur vos le sigillo promittite ^[9], ¹⁴le qual es le pignore de nostre hereditage, usque al redemption de lo que a Deo pertine^[10], a laude de su gloria.

Prece pro sapientia e revelation

¹⁵Pro iste ration, quia io audiva re vostre fide in le Senior Jesus Christo e de vostre amor pro tote le sanctos, ¹⁶io non cessa regratiar Deo pro vos omnes quando io face mention de vos in mi preces. ¹⁷Io preca a que le Deo del Senior nostre Jesus Christo, le Patre gloriose^[11] da vos sapientia spiritual e revelation^[12] in vostre crescente cognoscentia de ille^{[13] 18}- nam le oculos de vostre cordes esseva illuminate - assi que vos cognosce qual es le sperantia de su vocation, qual es le ricchessa de su gloriose hereditage in le sanctos, ¹⁹e qual es le incomparabile^[14] magnitude de su poter verso nos, credentes, secundo que il esseva exhibite in le exercitio de su immense fortia. ²⁰Ille exerceva iste fortia in Christo quando ille le resuscitava ex le mortos e le faceva seder a su dextera in le sphera celeste, ²¹in un position multo plus eminente que omne principato, autoritate, potentia, e domination, e super omne altere nomines que se nomina, non solmente in iste etate^[15], ma anque in lo que venira. ²²Deo poneva omne cosas sub le pedes de Christo^[16] e le dava al ecclesia qua su capite supreme^[17]. ²³De facto, le ecclesia es le corpore de Christo, le qual replena toto per su presentia^[18].

Notas

1. O “donava”, “impartiva”.
2. O “transgressiones”.
3. O “faceva superabundar”
4. O “prudentia”.
5. O “faceva nos cognoscer”.
6. O “secreto”.
7. O “dispensation del plenitude del tempores”, i. e. "a su tempore", "quando le tempore determinate se complira".
8. O “hereditage”.
9. O “le sigillo del promissa”.
10. O “de su proprietate”, litt. “usque al redemption del acquisition”.
11. O “del gloria”.
12. O “le spirito del sapientia e del revelation”.
13. O “in le cognoscentia de ille”.
14. O “supereminente”.
15. O “seculo”.
16. O “in subjection a Christo”.
17. O “super omne cosa”.
18. "τὸ πλήρωμα τοῦ τὰ πάντα ἐν πᾶσιν πληρουμένου" Lit. "le plenitude de ille que replena toto in omnes".