Biblia/Nove Testamento/Galatas/Galatas 5

←Galatas 4

Le Biblia in Interlingua Littera al Galatas

Galatas 6→

Galatas

5

Le libertate del christiano

¹Christo liberava nos pro remaner^[1] libere. Sia ergo firme e non va submitter vos de novo al jugo del sclavitude. ²Audi! Io, Paulo, dice vos que si vos consenti esser circumcidite, Christo non essera vos de alicun profito. ³E io testifica de novo a omnes qui consenti esser circumcidite que, si illes face assi, illes essera obligate obedir^[2] al Lege integre. ⁴Vos qui essaya esser declarate juste^[3] per le obedientia al Lege, rendeva vos estranie a Christo, vos removeva vos^[4] del gratia! ⁵Proque per le medio del Spirito, per fide, nos attende con grande expectation le sperantia del justitia. ⁶Pois que in Christo Jesus ni le circumcision, ni le incircumcision ha alicun importantia - le sol cosa que importa es un fide operante in le amor.

⁷Vos curreva ben, qui se interponeva pro stoppar vos de sequer^[5] le veritate? ⁸Iste persuasion^[6] non perveni de ille qui vocava vos. ⁹Un poco de levatura face fermentar tote le massa del pasta. ¹⁰Io confide in le Senior que vos non va pensar alteremente. Ille, tamen, qui perturba^[7] vos, suffrera su condemnation^[8], quicunque ille es. ¹¹Ora, fratres e sorores, si io ancora predicava le circumcision, proque ancora io es persecutate? In ille caso le scandalo^[9] del cruce esserea abolite. ¹²Il esserea melio si iste perturbatores se facerea castrar!

Practica le amor

¹³Fratres e sorores, vos esseva vocate al libertate. Non emplea, tamen, ille libertate como un opportunitate de indulgentia carnal ma, per le medio del amor, servi le unes le alteres. ¹⁴Proque tote le lege se poterea resumer in un singule commandamento, illo es, ama tu proximo como te ipse^[10]. ¹⁶Si vos, tamen, continuemente morde e devora le unes le alteres, guarda que vos non destrue le unes le alteres. ¹⁶Ma io dice: Vive^[11] per le Spirito e vos non consentira^[12] al desiros carnal. ¹⁷Proque le carne ha desiros contrari a illos del Spirito, e le Spirito ha desiros contrari a illos del carne, proque illos es opposite le un al altere, de sorta que vos non pote facer lo que vos vole. ¹⁸Si vos, tamen, es conducite per le Spirito, vos non es plus subjecte al Lege. ¹⁹Ora, lo que es le obras carnal es obvie: immoralitate sexual, impuritate, depravation, ²⁰idolatria, magia, hostilitate, discordia, jelosia, ira, rivalitates egoistic, dissentimento, factiones, ²¹invidia, homicidio, ebrietate, orgias, e cosas simile a istos. Io admonesta vos, como io admonestava vos antea: illes qui practica tal cosas non hereditara le regno de Deo!

²²Le fructo del Spirito, tamen, es: amor, gaudio, pace, patientia, benevolentia, bontate, fidelitate, ²³gentilessa, e auto-disciplina^[13]. Nulle lege vade contra iste cosas. ²⁴Ora, illes qui pertine a Christo crucifigeva le carne con su passiones e desiros. ²⁵Si nos vive per le Spirito, vamos alsi viver in harmonia con le Spirito. ²⁷Vamos non devenir vangloriose, provocante le unes le alteres, essente jelose le unes del alteres.

Notas

1. O “esser”.
2. O “observar”.
3. O “justificate”.
4. O “decadeva”.
5. O “obediva”.
6. Illo es, le facto que illes non sequeva plus le veritate.
7. O “confunde”.
8. O “portara su judicio”.
9. O “offensa”.
10. Citation de Levitico 19:18.
11. O “ambula”, “comporta vos”.
12. O “exequera”.
13. O “dominio de se ipse”, “autocontrolo”.