Biblia/Nove Testamento/Ephesios/Ephesios 5

←Ephesios 4

Biblia in Interlingua Epistola al Ephesios

Ephesios 6→

Ephesios

5

Un vita de amor

¹Sia vos, ergo, imitatores de Deo, sicut filios carissime, ²e vive in le amor, sicut Christo amava nos e offereva se ipse pro nos como un sacrificio de odor fragrante^[1] a Deo. ³Inter vos on non deberea mesmo nominar immoralitate sexual, impuritate de alicun sorta, o aviditate. ⁴Non mesmo il deberea haber inter vos obscenitates e discursos stulte o vulgar: iste cosas non conveni a sanctos, ma plus tosto il debe haber expressiones de gratitude verso Deo^[2]. ⁵Sia ben certe de isto: nulle persona immoral^[3], immunde o avide^[4] (un persona avide es un idolatra) hereditara^[5] le regno de Christo e de Deo.

Viver in le lumine

⁶Que nemo decipe vos con parolas vacue^[6], proque justo a causa de iste cosas cade le ira de Deo sur le filios del disobedientia^[7]. ⁷Non associa vos a tal personas^[8], ⁸proque in le passato vos esseva tenebras, ma nunc vos es lumine in le Senior. Comporta vos como filios del lumine^[9] - ⁹nam le lumine produce como su fructo toto lo que es bon, juste e ver - ¹⁰cerca cognoscer lo que place al Senior^[10]. ¹¹Non participa^[11] al obras infructuose del tenebras, plus tosto reproba los^[12]. ¹²Proque lo que illes face in secreto es vergoniose mesmo a mentionar^[13]. ¹³Omne cosas, de facto, quando illos es reprobate per le lumine, es rendite visibile^[14], ¹⁴proque le lumine rende toto visibile. Pro iste ration on dice: “Evelia te, o dormitor! Surge del mortos e Christo te illuminara!”.

Viver sagemente

¹⁵Ergo, comporta vos con multe caution^[15], non qua personas insipiente, ma como personas sage, ¹⁶Face le uso melior del tempore a vostre disposition^[16] proque nos vive in un tempore mal^[17]. ¹⁷Non sia imprudente, ma comprehende ben qual sia le voluntate del Senior. ¹⁸Non inebria vos con vino: isto conduce solmente al dissolutessa^[18], ma sia reimplite per le Spirito. ¹⁹Parla le unes le alteres con psalmos, hymnos, e canticos spiritual, cantante e musicante in vostre cordes al Senior. ²⁰Exprime sempre vostre gratitude pro toto a Deo le Patre in le nomine de nostre Senior Jesus Christo, ²¹e submitte vos le unes al alteres in le timor reverential de Christo.

Exhortationes al familias

²²Uxores, submitte vos a vostre maritos sicut al Senior, ²³proque le marito es le capite del uxor, sicut alsi Christo es le capite del ecclesia - ille es le salvator del corpore, que es le Ecclesia. ²⁴Sed sicut le Ecclesia es subjecte a Christo, assi sia le uxores subjecte al proprie maritos in omne cosa. ²⁵Maritos, ama vostre uxores, sicut alsi Christo amava le ecclesia e dava se ipse pro illo, ²⁶rendente lo sancte e munde, lavate per le effecto purificante del Parola^[19], ²⁷pro presentar la a se ipse como un ecclesia gloriose - sin alcun macula, ruga o altere defectos, ma sancte e immaculate. ²⁸In le mesme maniera le maritos debe amar lor uxores como lor proprie corpores. Qui ama su proprie uxor, ama se ipse. ²⁹De facto nemo unquam odiava su proprie corpore^[20], ma ille lo nutri e cura teneremente. Le mesmo Christo face con le ecclesia, ³⁰proque nos es membros de su corpore^[21]. ³¹Pro iste ration un homine quitara su patre e su matre e se conjungera^[22] a su uxor, e le duo essera un sol carne^[23]. ³²Iste mysterio es grande, ma io me refere a Christo e al ecclesia^[24]. ³³Tamen, cata uno de vos debe alsi amar su proprie uxor como se ipse, e le uxor debe respectar su marito^[25].

Notas

1. O “como un offerta (oblation) e sacrificio a Deo”.
2. O “actiones de gratias”
3. O “fornicator”.
4. O “avar”.
5. O “recipera alicun hereditage in”.
6. Qui excusa lor peccatos con argumentos vacue, pretextuose.
7. Le persona que disobedi a Deo.
8. O “non sia vostre companiones”.
9. Illo es personas characterisate per virtutes luminose.
10. O “effortia vos apprender lo que acceptabile al Senior”.
11. O “ha nulle communion con”.
12. O “expone”, o “denuncia”.
13. O “proque il es un cosa vergoniose mesmo parlar del cosas que illes face in secreto”.
14. O “Omne cosas, de facto, quando illos es reprobate, es manifestate per le lumine”.
15. O litt. “Vide quanto cautemente vos ambula”.
16. O “Avantagiante vos de omne opportunitate”.
17. O “le dies es malefic”. Illo es: generalmente, nostre vita es tanto subjecte al influentia del mal que on debe facer un effortio consciente pro render lo un instrumento del ben.
18. O “luxuria”.
19. O “con le aqua e le parola”.
20. O “carne”.
21. Alicun manuscriptos adde hic “e de su ossos”.
22. O “adherera”.
23. Citation de Genesis 2:24.
24. O “io parla super Christo e le ecclesia”.
25. O “haber timor reverential”.