Biblia/Nove Testamento/Ephesios/Ephesios 6

Ephesios

6

¹Filios, obedi a vostre parentes in le Senior^[1] proque isto es juste. ²“Honora tu patre e matre^[2]”, es le prime commandamento accompaniate per un promissa, illo es: ³“a que te sia ben e tu sia longeve^[3] sur le terra^[4]”.

⁴Parentes, non provoca le ira de vostre filios^[5], ma educa les in le disciplina e le correction^[6] del Senior.

⁵Servos, obedi a vostre dominos human^[7] con timor e tremor, in le simplicitate^[8] de vostre cordes sicut a Christo, ⁶non serviente solmente quando illes vos controla, pro complacer les exteriormente^[9], ma como servos de Christo. Compli le voluntate de Deo de bon corde. ⁷Servi les con bon voluntate^[10] como un servicio rendite al Senior e non a homines, ⁸proque vos sape que qualcunque cosa bon un persona face, sia servo sia libere, illo essera recompensate per le Senior.

⁹Dominos, face le mesmo con vostre servos, abstinente vos de menaciar les, sapiente que sia illes sia vos ha le mesme Domino in le celo, e ille es semper impartial.

Exhortation al guerra spiritual

¹⁰Finalmente, sia fortificate in le Senior e in le potentia de su fortia. ¹¹Vesti vos del integre armatura de Deo, a que vos pote star firme contra le insidias del diabolo. ¹²Nos es de facto ingagiate in un lucta que non es contra esseres human^[11], ma contra le principatos, contra le potestates, contra le rectores del tenebras de iste mundo, contra le spiritos del iniquitate que il ha in le sphera celeste. ¹³Pro iste ration, revesti vos del integre armatura de Deo, a que vos pote resister in le die mal e, habente facite toto lo que es requirite, vos pote star firme. ¹⁴Sta, ergo, post haber cingite vostre lumbos con le cinctura del veritate, e vestite vos con le plastron del justitia, ¹⁵e calceate vostre pedes in le prestessa que da le evangelio del pace. ¹⁶Super toto, protege vos per le scuto del fide, con le qual vos potera extinguer tote le flechas inflammate del maligno. ¹⁷Prende alsi le casco del salvation e le gladio del Spirito, le qual es le parola de Deo. ¹⁸Preca semper in le Spirito per omne orationes e supplication, vigilante con omne perseverantia e requesta in favor de tote le sanctos. ¹⁹Preca alsi pro me, a fin que, quando io parla^[12], me sia date de exprimer me francamente pro facer cognoscer le mysterio del Evangelio, ²⁰pro le qual io es ambassador in catenas. Preca a que io pote parlar tanto audacemente quanto il es necessari.

Commentos de adeo

²¹Tychico, mi carissime fratre e fidel ministro in le Senior^[13], facera vos saper toto, tanto que vos alsi pote saper lo que concerne le circumstantias in le quales io me trova, lo que io face. ²²Io le manda a vos a iste proposito, que vos pote cognoscer le circumstantias in le quales nos trova nos, e consolar assi vostre cordes.

²³Sia pace al fratres e sorores, e amor con fide, ab Deo Patre e le Senior Jesus Christo. ²⁴Le gratia sia con omnes qui ama nostre Senior Jesus Christo con amor immortal^[14].

Notas

1. Que illes se comporta como le Senior commanda, o secundo lo que es juste, i. e. intra le limites del voluntate del Senior.
2. Citation de Exodo 20:12; Deuteronomio 5:16.
3. O “vive un longe tempore”.
4. Citation de Deuteronomio 5:16.
5. O “non face inragiar vostre filios”.
6. O “admonition”.
7. O “secundo le carne”.
8. O “sinceritate”.
9. O “pro placer al homines”.
10. O “con enthusiasmo”.
11. O “sanguine e carne”.
12. Litt. “quando io aperi mi bucca pro parlar”.
13. O “servitor del Senior”.
14. Litt. “in maniera non corrumpite”.