Biblia/Nove Testamento/Ephesios/Ephesios 4

←Ephesios 3

Le Biblia in Interlingua Epistola al Ephesios

Ephesios 5→

Ephesios

4

Viver le unitate

¹Io, ergo, le prisionero pro le Senior^[1], exhorta vos viver^[2] de maniera digne del vocation que vos recipeva, ²con omne humilitate e mansuetude, con longanimitate^[3], supportante le unes le alteres con amor, ³diligente in conservar le unitate del Spirito in le vinculo del pace. ⁴Il ha un corpore e un Spirito, sicut vos esseva vocate a un sperantia - le sperantia al qual vos esseva vocate^[4] - ⁵un sol Senior, un sol fide, un sol baptismo, ⁶un sol Deo e Patre de omnes [tote le christianos], le qual es super omnes [como lor soverano], per omnes [como su instrumentos] e in omnes^[5] [como su habitation]. ⁷A cata uno de nos, tamen, esseva date le gratia secundo le mensura del dono de Christo. ⁸Pro isto le Scripturas^[6] dice: “Ascendente, ille portava con se un multitude de captivos e confereva donos”^[7]. ⁹Ora, qual es le significato de iste: “ascendente”, si non que, primo, ille descendeva in le regiones plus basse, illo es sur le terra^[8]? ¹⁰Le mesmo qui descendeva es alsi ille qui ascendeva super omne celos al fin de reimpler con se ipse le universo integre.

¹¹Ille ipse confereva a alcuno esser un apostolo, a alcuno un propheta, a alcuno un evangelista, e a alcuno un pastor o un magistro^[9]. ¹²Isto eveniva ut le sanctos sia completemente equipate^[10] pro le obra del ministerio, illo es pro le edification del corpore de Christo. ¹³Tote isto eveni usque nos omnes perveni al unitate del fide e al plen cognoscentia del Filio de Deo, illo es, pro devenir homines perfectemente developpate, secundo le mensura del plen statura moral e spiritual de Christo^[11]. ¹⁴Assi, nos non essera plus como infantes, o como rates fluctuante portate per le fluxo e refluxo del aquas o, ancora, como velas pulsate per omne vento de mutabile doctrinas, secundo le artificios fraudulente e le astutia del homines, per le circumvention de magistros de error. ¹⁵Ma, in practicar le veritate con amor, nos cresce in omne cosas sub le direction de Christo, qui es le capite. ¹⁶Il es per su medio que le corpore integre cresce, ben compacte e connectite per lo que le supple omne junctura. Quando cata uno face su parte^[12] le corpore se edifica con amor.

Amor in sanctitate

¹⁷Ergo, io dice isto e insiste^[13] con le autoritate del Senior^[14] a que vos non vive^[15] plus como face le paganos^[16], in le vanitate^[17] de lor mente. ¹⁸Lor intellecto es obscurate e illes es alienate del vita de Deo a causa de lor ignorantia, que es debite al induramento de lor cordes. ¹⁹De facto illes es indolente, illes se abandonava al luxuria e a practicar omne sorta de perversiones sexual^[18] sin freno^[19]. ²⁰Vos, tamen, non apprehendeva tal cosas de Christo, ²¹si vermente vos le audiva e in ille vos esseva educate, proque le veritate es in Christo. ²²In re vostre precedente stilo de vita, vos ha essite nunc educate a renunciar^[20] al vetere homine que se corrumpe secundo su desiderios deceptive^[21], ²³a esser renovate in le spirito de vostre mente ²⁴e a revestir vos del nove homine que esseva create secundo le imagine de Deo - in le justitia e in le sanctitate que es fundate super le veritate^[22].

²⁵Ergo, de post haber renunciate^[23] al mendacio, “cata uno de vos dice le veritate a su proximo”^[24] proque nos es membros le unes del alteres. ²⁶“Irasce, ma non pecca”^[25], nunquam permitte que le sol se pone super le causa de vostre ira^[26]. ²⁷Non offere alicun opportunitate al diabolo^[27]. ²⁸Que ille qui furava non fura plus ma, plus tosto, ille debe laborar e facer lo que es bon con su proprie manos, a que ille ha mesmo qualcosa a compartir con qui es in condition de necessitate. ²⁹Que nulle discurso obscen^[28] unquam exi de vostre bucca, ma, quando vos ha le opportunitate de dicer qualcosa de bon pro le edification, dice lo, a que illo confere gratia a qui audi vos. ³⁰E non contrista le Spirito Sancte de Deo, per le qual^[29] vos esseva sigillate in vista del die del redemption. ³¹Pone longe de vos omne amaritude, ira, cholera, altercation, e parlar calumniose e malefic. ³²Al contrario, sia benigne le unes verso le alteres, misericordiose, pardonante vos reciprocamente sicut Deo pardonava vos in Christo.

Notas

1. O “in le Senior”.
2. Litt. “ambular”.
3. O “patientia”.
4. O “le sperantia de vostre vocation”.
5. “Omnes” refere se a omne le discipulos de Jesus Christo. Deo es le Patre de tote le credentes in Christo, e illes es su filios adoptive. Ille es “super” illes in le senso que ille es lor soverano. Deo se manifesta per lor medio como su instrumentos e in illes, durante que Deo demora in illes como su templo.
6. Forsan Psalmo 68:18 modificate.
7. Lit. “al homines”, i. e. “a su populo”.
8. O “le partes inferior del terra”.
9. O “doctor”, “inseniante”.
10. I.e. fornite, supplite, pro complir, facer, tote lo que le Senior require de illes in iste mundo.
11. O “le mensura del plenitude de Christo”.
12. O “secundo le mensura del obra active de omne parte”.
13. O “testifica”.
14. O “in le Senior”.
15. O “ambula”.
16. O “le gentiles”.
17. O “futilitate”.
18. O “impuritates”.
19. O “con aviditate”.
20. O “deponer”, “poner a latere”.
21. O “le concupiscentia del deception”.
22. O “que veni del veritate”, o “in le justitia e in le sanctitate del veritate”.
23. O “deponite”.
24. Zacharia 8:16.
25. Psalmo 4:4.
26. Illo es, non lassa que vostre die termina ante haber solvite le causa de vostre ira.
27. O “non da loco al diabolo”, non da alcun opportunitate al diabolo de traher vos a committer lo que vade contra le voluntate de Deo.
28. O “insalubre”.
29. O “in le qual”.