Biblia/Nove Testamento/Ephesios/Ephesios 3

←Ephesios 2

Le Biblia in Interlingua Epistola al Ephesios

Ephesios 4→

Ephesios

3

Le relation de Paulo con le mysterio divin

¹Pro iste ration, io, Paulo, le prisionero de Jesus Christo pro vos gentiles… - ²si indubitabilemente vos audiva del administration del gratia de Deo que me esseva date pro vos, ³que per revelation le mysterio esseva facite me cognoscer, sicut io vos scribeva antea brevemente. ⁴Quando vos lege isto, vos potera comprender de ubi veni mi cognoscentia del mysterio de Christo. ⁵Ora, iste mysterio non esseva revelate al filios del homines^[1] in altere generationes sicut nunc illo es revelate a su sancte apostolos e prophetas per le Spirito, ⁶illo es que per le Evangelio le gentiles deveni coheredes, membros con nos de un mesme corpore e co-participantes del promissa in Christo Jesus. ⁷Io deveniva un ministro de iste Evangelio secundo le dono del gratia de Deo que me esseva date secundo le operation de su potentia. ⁸A me, le minime de omne sanctos, esseva date le gratia de proclamar al gentiles le abysmal ricchessas de Christo, ⁹e de illuminar omnes in re le mysteriose plano de Deo - un mysterio que esseva durante multe etates celate in Deo, creator de omne cosas. ¹⁰Le proposito de iste illumination es que, per le medio del ecclesia, le multiforme sapientia de Deo sia facite cognoscer al principatos e potestates in le spheras celeste. ¹¹Isto eveniva secundo le proposito eterne que ille compliva in Christo Jesus nostre Senior, ¹²in le qual nos ha accesso audace e confidente a Deo a causa del fidelitate de Christo. ¹³Pro iste ration io desidera que vos non sia discoragiate a causa de lo que nunc io debe suffrer^[2] pro vos. De isto vos pote gloriar vos.

Prece pro un amor forte

¹⁴Pro iste ration io flecte mi geniculos ante le Patre ¹⁵per le qual omne familia in celo e sur le terra deriva su nomine^[3]. ¹⁶Io preca a que, secundo le ricchessas de su gloria, ille vos concede esser corroborate con potentia per su Spirito in le homine interior e ¹⁷que Christo habita in vostre cordes per le medio del fide. Alora, radicate e fundate in le amor, ¹⁸vos essera in condition^[4] de comprender e assi cognoscer, con omne le sanctos, qual es le latitude, le longitude, le altor e le profunditate^{[5] 19} del amor de Christo, le qual superpassa omne cognoscentia. Assi vos essera reimplite per tote le ricchessas^[6] de Deo.

²⁰Ora, a ille qui, secundo le potentia que opera in nos, pote operar in maniera multo plus grande mesmo que lo que nos pete o pensa, ²¹a ille sia le gloria in le ecclesia e in Christo Jesus in omne generation e in tote le etates. Amen.

Notas

1. Semitismo pro “humanitate”.
2. O “a causa de mi tribulationes”.
3. I. e. le Creator de toto lo que il ha sur le terra e in le celos.
4. O “capace”.
5. Le objecto de iste dimensiones non es specificate in le texto. On suppone que illo poterea esser: (1) le signification del cruce del Christo; (2) le Jerusalem celeste; (3) le potentia de Deo, (4) le amor del Christo.
6. O "plenitude".