Biblia/Nove Testamento/Corinthios/2Corinthios 5

2 Corinthios

5

Viver per fide e non per vista

¹Nos sape que iste corpores in le quales nos vive hic in iste mundo es como tentas, demoras temporari. Si illos es disfacite^[1], Deo nos dara demoras permanente^[2] in le celos, non simile a casas construite per manos human. ²Pois que in iste demoras terren nos geme^[3] e anhela esser revestite de nostre demoras celestial. ³De facto, assi revestite, nos non essera trovate nude.

⁴Sin dubita, durante que nos es in iste tenta, nos geme como quando on porta un pesante fardello. Nos non volerea, tamen, simplemente esser disvestite, ma revestite, de sorta que lo que es mortal sia absorbite per le vita. ⁵Ora, ille qui preparava nos pro isto es Deo ipse, le qual dava nos su Spirito como garantia^[4]. ⁶Isto es le ration pro le qual nos es semper plen de corage^[5] e sape que, durante que nos permane in iste casa terren^[6], le demora celestial que le Senior provideva a nos es vacante^[7] - ⁷de facto nos vive^[8] per fide, non per vista. ⁸Assi, nos es plen de corage, ma nos prefererea vacar iste corpore terren^[9] e habitar con le Senior^[10]. ⁹In omne caso, sia que nos permane in iste demora terren, sia que nos lo vaca^[11], nostre ambition es semper lo de placer^[12] al Senior. ¹⁰Pois que nos omnes debera comparer ante le tribunal de Christo pro reciper lo que nos es debite, secundo quanto nos faceva durante le vita terren^[13], sia le bon como le mal.

Le message del reconciliation

¹¹Ergo, pois que nos cognosce lo que significa timer le Senior, nos essaya persuader omnes. Deo sape lo que nos es^[14] e nos spera que mesmo vos, in vostre conscientias, lo recognosce. ¹²Nos non nos recommenda un altere vice a vos, ma nos da a vos le opportunitate de esser orgoliose de nos, a fin que vos pote responder a illes qui se vanta de apparentias exterior^[15] e non de lo que es in le corde. ¹³Pois que si nos es folle, illo es pro Deo; si nos es san de mente, illo es pro vos^[16]. ¹⁴De facto le amor de Christo nos move^[17] , habente pervenite a iste conclusion: que Christo moriva pro totes; ergo totes moriva, ¹⁵e ille moriva pro totes a fin que illes qui vive non vive plus pro se mesme, ma pro ille qui moriva pro illes e esseva resuscitate. ¹⁶De sorta que, de ora in avante, nos non considera plus alicuno simplemente ab le puncto de vista exterior e human^[18]. Mesmo si nos cognosceva Christo simplemente ab le puncto de vista human^[18], nunc nos non le cognosce plus in ille maniera. ¹⁷Assi, si alicuno es in Christo, ille es un nove creation, lo que es vetule, illo terminava - ecce, lo que es nove, ha venite^[19]!. ¹⁸E tote iste cosas proveni de Deo, le qual reconciliava nos con se per le medio de Christo e le qual dava a nos le ministerio del reconciliation. ¹⁹In altere parolas, in Christo Deo reconciliava le mundo a se ipse, sin imputar les lor transgressiones e ille dava a nos le parola^[20] del reconciliation. ²⁰Ergo nos es ambassadores pro Christo, como si Deo rogarea per nostre medio. Nos roga vos in le nomine de Christo: “Sia reconciliate con Deo!”. ²¹Deo rendeva peccato pro nos ille qui non cognosceva peccato^[21], a que in ille nos devenirea le justitia de Deo.

Notas

1. O “destruite”, o “dismantellate”.
2. O “eterne”. Illo es nove corpores indestructibile.
3. O “suffre”.
4. Illo es: “garantia que vermente isto evenira”.
5. O “hardite”, “de bon animo”.
6. O “es in le casa de nostre corpore terren”.
7. O “nos es absente del Senior”.
8. O “cammina”.
9. O “esser absente del corpore”
10. O “esser presente con le Senior”.
11. O “sia presente o absente”.
12. O “esser agradabile”.
13. O “quando nos esseva in le corpore”.
14. O “nos es ben cognoscite per le Senior”.
15. O “in lo que es visibile”.
16. Possibile explication: “Alcunos dice que quando Deo me face haber visiones, io parla como un persona folle. Si illo es assi, io desira que vos sape que io parla in ille maniera pro placer a Deo. Del altere latere, si vos pensa que io parla e age con sagessa, illo es bon. Io vole que vos sape que io lo face pro adjutar vos”
17. O “constringe”.
18. O “secundo le carne”.
19. O “nove cosas ha venite”.
20. O “message”.
21. Un referentia a Christo.