Biblia/Nove Testamento/Corinthios/2Corinthios 6

←2 Corinthios 5

Le Biblia in Interlingua Litteras al Corinthios

2 Corinthios 7→

2 Corinthios

6

Le servitor suffrente de Deo

¹Ora, pois que nos es collaboratores, nos alsi vos exhorta a non reciper le gratia de Deo in van. ²Proque ille dice: “Io te exaudiva in le momento propitie^[1] e in le die del salvation io te succurreva^[2]”. Ecce, il es nunc le momento propitie, il es nunc le die del salvation! ³Nos non da a alicuno motivo de scandalo pro discreditar nostre ministerio^[3]. ⁴Ma, como servitores^[4] de Deo, nos commendava nos ipse in omne maniera con grande perseverantia^[5], in persecutiones^[6], in difficultates, in afflictiones, ⁵in battimentos, in imprisionamentos, in tumultos^[7], in fatigas, in noctes insomne, in fame, ⁶con puressa, con cognoscentia, con patientia, con benevolentia, con sanctitate de spirito^[8], con amor sincer, ⁷con inseniamento verace, con le potentia de Deo, con armas de justitia pro le mano dextere e le mano leve, ⁸in honor e in dishonor, in mal fama e in bon fama; considerate mendace^[9] e tamen verace; ⁹tractate como personas incognite, e tamen ben cognoscite; como personas moriente ma - ecce! - nos continua viver; flagellate, e tamen non suppliciate^[10]; ¹⁰como attristate, e tamen semper gaudiose; como povre, e tamen inricchiente multes, como habente nihil, e tamen possedente toto.

¹¹Nostre buccas parlava liberemente^[11] a vos, o corinthios; nostre cordes esseva completemente aperte a vos. ¹²Nostre affection pro vos non es limitate^[12], ma vostre affection pro nos es limitate. ¹³Ora, in equal reciprocitate^[13] - io parla a vos como filios - aperi largemente vostre cordes anque a me!

Partenarios inequal

¹⁴Non deveni partenarios^[14] con illes que non crede, pois que qual consociation poterea haber le justitia con le anomia, o qual consociation poterea haber le lumine con le tenebras? ¹⁵E qual harmonia^[15] poterea exister inter Christo e Belial^[16]? O que poterea haber in commun un credente con un persona incredule^[17]? ¹⁶O qual accordo^[18] poterea exister inter le templo de Deo e le idolos? Pois que nos es le templo del Deo vivente, sicut Deo diceva: “Io vivera^[19] con illes e camminara con illes, e io essera lor Deo, e illes essera mi populo^[20]”. ¹⁷Ergo: “Exi foras de lor medio e sia separate” dice le Senior, “e non tange lo que es impur^[21]” e io vos recipera^[22], ¹⁸e io essera pro vos Patre e vos essera pro me filios e filias”, dice le Senior omnipotente.

Notas

1. O “tempore propitie”.
2. Citation de Isaia 49:8.
3. O “vituperar”.
4. O “ministros”.
5. O “patientia”.
6. O “afflictiones e suffrentia”.
7. O “rebelliones”.
8. O “con le Spirito Sancte”.
9. O “deceptor”.
10. O “non ponite a morte”.
11. O “nostre buccas esseva aperte pro vos”, phrase idiomatic pro communication aperte.
12. O “stricte”, “constricte”.
13. O “con le mesme correspondentia”, o “recompensa”.
14. O “Non conjuga vos inequalmente”, “Non pone vos sub un jugo inequal”.
15. O “concordia”.
16. Isto es un referentia a Satana, cfr. Judices 20:13 in le version del Septanta.
17. O “infidel”.
18. O “consentimento”, “concerto”.
19. O “habitara”.
20. Citation de Levitico 26:12, cfr. Jeremia 32:38.
21. Citation de Isaia 52:11.
22. O “io dara vos le benvenita”.