Biblia/Nove Testamento/Corinthios/1Corinthios 7

←1 Corinthios 6

Le Biblia in Interlingua Litteras al Corinthios

1 Corinthios 8→

1 Corinthios

7

Celibato e maritage

¹Ora, concernente le questiones super le quales vos me scribeva: “Il es bon pro un homine non toccar^[1] un femina”. ²Ma, a causa de immoralitates, cata homine deberea haber relationes sexual con su proprie sposa e cata femina con su proprie marito. ³Un marito deberea satisfacer sexualmente su sposa^[2], e le mesmo deberea facer un sposa con su marito. ⁴Le sposa non ha autoritate^[3] super su proprie corpore, excepte su marito. In le mesme maniera le marito non ha autoritate super su proprie corpore, excepte su sposa. ⁵Non priva vos le uno del altere, excepte de commun accordo durante un certe tempore de sorta que vos pote dedicar vos al precaria. Retorna, pois, insimul, a que Satana non tenta vos a causa de vostre incontinentia^[4]. ⁶Io dice isto como un concession, non como un commando. ⁷Io volerea que cata uno esserea como io es, ma cata uno ha le proprie dono de Deo, uno in iste maniera, le altere in ille.

⁸Al personas non maritate e al vidue io dice que il es melio pro illes remaner como io es, ⁹ma si illes non ha le dono del continentia^[5], que illes se marita, proque il es melio maritar se que arder con desiderios sexual^[6].

¹⁰A illes qui es maritate io da iste commando - non io, ma le Senior - un marita non deberea separar^[7] se de su marito, ¹¹ma si illa lo face, illa deberea remaner non maritate o esser reconciliate con su marito, e un marito non deberea separar^[7] se de su marita.

¹²Al restante Io dice - non io, ma le Senior - si un fratre ha un sposa qui non es credente e illa es felice^[8] de viver con ille, ille non deberea divorciar de illa. ¹³E si un femina ha un marito qui non es credente, e ille es felice de viver con illa, illa non deberea divorciar de ille. ¹⁴Proque le marito incredule es sanctificate per le medio de su marita, e le marita non credente per le medio de su marito credente. Alteremente vostre filios esserea immunde, ma nunc illes es sancte. ¹⁵Ma si le non credente desidera un divorcio, que isto va occurrer. In iste circumstantias le fratre o le soror non es vinculate^[9]. Deo appellava nos a viver in pace^[10]. ¹⁶Pois que, oh marita, an sape tu si tu non conducera tu marito al salvation? O an sape tu, marito, si tu non conducera tu marita al salvation?

Le circumstantias de vostre salvation

¹⁷Foras de isto, secundo lo que le Senior assignava a cata uno, secundo le vocation que cata uno recipeva del Senior, assi on debe viver. Isto io ordina in tote le ecclesias. ¹⁸Esque alicuno esseva vocate jam circumcidite? Ille non deberea essayar disfacer su circumcision. Esque alicuno esseva vocate incircumcise? Ille non debe facer se circumcider. ¹⁹Le circumcision es nihil e le incircumcision es nihil. Le cosa plus importante es le observantia del commandamentos moral de Deo. ²⁰Que cata uno remane in le condition secundo le qual ille esseva appellate. ²¹Esque tu esseva in le condition de sclavitude quando tu esseva vocate? Non te preoccupa, ma si tu ha le opportunitate de devenir libere, servi te de iste opportunitate. ²²In le mesme maniera, qui esseva appellate in condition de libertate^[11] es servitor del Senior. ²³Vos esseva comprate a car precio. Non deveni sclavos^[12] de homines. ²⁴Fratres e sorores, in qualcunque situation vos esseva vocate, permane in illo con Deo^[13].

Remaner non maritate

²⁵Concernente le question in re personas qui ancora non se maritava^[14], io non ha commandos particular a dar ab le Senior, ma io offere mi opinion, como un homine qui, per le misericordia del Senior, es digne de fiducia. ²⁶Io pensa que, in vista del imminente crise^[15], il esserea melio pro vos remaner como vos es. ²⁷Qui es maritate non deberea cercar a divorciar. Qui esseva dissolvite de un vinculo matrimonial, non deberea essayar remaritar se. ²⁸Ma si vos marita vos, vos non pecca. E si un virgine se marita, illa non pecca. Illes qui se marita, tamen, debera affrontar difficile circumstantias. Io cerca a sparniar vos tal problemas. ²⁹E io dice isto, fratres e sorores: le tempore restante es breve. Assi, qui es maritate deberea esser como illos qui non lo es, ³⁰qui plora como illes qui non plora, qui gaude como illes qui non gaude, qui compra como illes qui ha nihil, ³¹qui frue^[16] de iste mundo como illes qui non frue plenmente de illo. Pois que le forma presente^[17] de iste mundo es passager.

³²E io vole que vos sia libere de preoccupationes. Le homine non maritate se interessa al cosas del Senior, como pote placer al Senior. ³³Le homine maritate, tamen, se interessa al cosas de iste mundo, a como ille poterea placer a su marita, ³⁴e su interesses es dividite. Un femina non maritate^[18], o un virgine, se interessa al cosas del Senior, a esser sancte, tanto in le corpore, quanto in le spirito. Un femina maritate, tamen, se interessa al cosas del mundo, a como illa poterea placer a su marito. ³⁵Io dice tote isto pro vostre beneficio, non pro poner restrictiones super vos, ma de sorta que sin distractiones, vos pote render al Senior un servicio honorabile^[19] e constante^[20].

³⁶Si alicuno pensa ager in maniera non appropriate^[21] verso su filia virgine, si illa es de etate matur, e il pare necessari, ille deberea facer lo que ille desidera, ille non pecca. Permitte que illa se marita. ³⁷Ma le homine qui es firme in su corde, sin alicun pression, e ha controlo super su proprie voluntate, e ha decidite in su corde conservar su filia non maritate, ille face ben. ³⁸Alora, ille qui da in matrimonio su filia virgine face ben, e ille qui non la da in matrimonio face le melior cosa.

³⁹Un marita es vinculate si su marito vive, ma si ille mori, illa es libere de maritar quem illa desira (ma solmente qui es in le Senior^[22]). ⁴⁰In mi opinion, tamen, illa essera plus felice si illa remane como illa es - e io pensa que anque io ha le Spirito de Deo!

Notas

1. Illo es, non haber relationes sexual (con un femina).
2. Litt. “dar a su sposa lo que ille la debe”, “facer su deber”.
3. O “derecto a”.
4. O “manco de autocontrolo”.
5. O “si illes non pote continer se”, “si illes non ha autocontrolo”.
6. Un expression que indica desiderios sexual insatisfacite.
7. O “abandonar”, “divorciar”.
8. O “consente”
9. O “non es subjecte a servitude”. Illo es, non plus vinculate a ille maritage. Ille o illa es libere.
10. O “al pace”.
11. O “un homine liberate”.
12. O “servitores”.
13. I. e. Deo remanera con vos in ille circumstantias.
14. In greco “virgines”.
15. O “affliction”.
16. O “face uso”.
17. O “apparentia”.
18. In le contexto probabilemente un vidua.
19. O “notabile”.
20. O “pro assecurar vostre constante devotion al Senior”.
21. O “incorrecte”.
22. Illo es, un credente.