Biblia/Nove Testamento/Corinthios/1Corinthios 6

←1 Corinthios 5

Le Biblia in Interlingua Litteras al Corinthios

1 Corinthios 7→

1 Corinthios

6

Le processos

¹Quando uno de vos es in disputa legal^[1] con un altere, esque ille hardi vader ante un tribunal de iste mundo injuste^[2] plus tosto que esser judicate per le sanctos^[3]? ²Esque vos non sape que le sanctos judicara le mundo? E si le mundo essera judicate per vos, esque vos non esserea competente in judicar casos plus trivial^[4]? ³Esque vos non sape que nos judicara angelos? Proque non, alora, questiones ordinari^[5]? ⁴Assi, si vos ha tal disputas super questiones ordinari^[5] proque vader al exterior ante a judices que non es respectate^[6] per le ecclesia? ⁵Io dice isto a vostre vergonia. Esque il non ha un persona inter vos bastante sage pro componer disputas inter confratres? ⁶Al contrario un fratre disputa con un altere fratre e un persona incredule deberea judicar les? ⁷Le facto mesme que vos ha inter vos disputas legal jam significa admitter un disfacta. Proque non plus tosto acceptar de suffrer un torto? Proque non plus tosto esser defraudate? ⁸Vos mesme, tamen, face tortos e defrauda, e vos face istos a fratres e sorores!

⁹Esque vos non sape que le injuste non hereditara le regno de Deo? Non face vos deciper! Le sexualmente immorales, le idolatras, le adulteros, le effeminatos^[7], le homosexuales^[8], ¹⁰le fures, le avides, le bibulos, le diffamatores, e le fraudatores non hereditara le regno de Deo. ¹¹Alicun de vos jam viveva in iste manieras. Ma vos esseva mundate, vos esseva sanctificate, vos esseva justificate in le nomine del Senior Jesus Christo e per le Spirito de nostre Deo.

Fuge del immoralitate sexual

¹²“Tote le cosas es licite pro me” - ma non toto es benefic^[9]. “Tote le cosas es licite pro me” - ma io non me facera dominar per alicun de illos. ¹³“Le alimentos es pro le stomacho e le stomacho es pro le alimentos”, ma Deo destruera sia le stomacho, sia le alimentos. Le corpore non es pro le immoralitate, ma pro le Senior, e le Senior es pro le corpore. ¹⁴E Deo, le qual resuscitava le Senior, facera alsi resuscitar nos, mediante Su poter. ¹⁵Esque vos non sape que vostre corpores es membros de Christo? Esque io, alora, deberea prender le membros de Christo e render los membros de un prostituta? Jammais! ¹⁶Esque vos non sape que quicunque se uni a un prostituta, deveni un sol corpore con illa? Pois que il es scribite: “Le duo devenira un sol carne^[10]”. ¹⁷Qui es unite al Senior, tamen, es un sol spirito con ille. ¹⁸Fugi ab le immoralitate! “Cata peccato que on committe es foras del corpore” - ma le persona immoral pecca contra le proprie corpore. ¹⁹Esque vos non sape que vostre corpore es le templo del Spirito Sancte qui es in vos, le qual vos obteneva de Deo, e que vos assi non pertine a vos mesme? ²⁰Pois que vos esseva comprate a alte precio. Glorifica Deo, ergo, con vostre corpores!

Notas

1. O “querela”.
2. O “ante al injustes”.
3. Illo es, le membros del communitate christian.
4. O “plus parve”.
5. O “questiones de iste vita”.
6. O “in poc consideration”.
7. I. e. partner homosexual passive.
8. O “sodomitas”,  homosexuales practicante.
9. O “conveniente”.
10. Citation de Genesis 2:24.