Biblia/Nove Testamento/Corinthios/1Corinthios 5

←1 Corinthios 4

Le Biblia in Interlingua Litteras al Corinthios

1 Corinthios 6→

1 Corinthios

5

Le disciplina del ecclesia

¹In effecto, se audi que inter vos il ha immoralitate sexual, le sorta de immoralitate que non es mesmo permittite inter le Gentiles, tanto que alicuno cohabita con le uxor de su patre. ²In vice de affliger vos grandemente pro isto, vos deveniva arrogante. Qui committeva tal action haberea debite esser expulsate de vostre medio. ³De facto, mesmo si io es absente physicamente^[1], io es presente con vos in spirito e io jam ha judicate ille que faceva isto como si io esseva presente. ⁴Assi, quando vos es renunite in le nomine de nostre Senior Jesus, io es con vos in spirito e le poter de nostre Senior Jesus es presente, ⁵delivra iste homine a Satana pro le destruction de su carne, de sorta que su spirito sia salvate in le Die del Senior.

⁶Vostre vangloria non es bon. Esque vos non sape que il necessa solmente un poco de levatura pro facer fermentar tote le massa del pasta? ⁷Munda vos del vetule levatura de sorta que vos pote esser un nove massa de pasta - vos es, de facto, sin levatura, pois que Christo, nostre Pascha ha essite sacrificate, ⁸Vamos assi celebrar le festa, non con le vetule levatura, le levatura del vitio e del malitia, ma con le pan sin levatura, le pan del sinceritate e del veritate.

⁹Io scribeva vos in mi littera de non associar vos con personas sexualmente immoral. ¹⁰In nulle maniera io me refere hic al personas immoral de iste mundo, le avide, le fraudatores, o le idolatras, alteremente vos deberea exir de iste mundo. ¹¹Hic, tamen, io scribe vos de non associar vos con un persona que se considera christian^[2] e que tamen continua esser sexualmente immoral, o avide, o un idolatra, o un diffamator, o un bibulo notori, o un fraudator. Vos non deberea mesmo mangiar con un tal persona. ¹²Il non es mi responsabilitate de judicar le foresteros^[3], ma il es certemente vostre responsabilitate de judicar illes que pertine al ecclesia. ¹³Deo judicara le foresteros^[3]. Expulsa de inter vos le malfaciente^[4].

Notas

1. O “in corpore”.
2. O “fratre”.
3. O “illes de foras”, i.e, illes que non pertine al ecclesia.
4. Un allusion a Deuteronomio 17:7; 19:19; 22:21,24; 24:7 “Per iste maniera tu purgara le mal que es inter vos”; cfr. 1 Corinthios 5:2.