គតិលោក/ភាគទី៥/14
| ←រឿងបុរសមានប្រពន្ធគ្រប់លក្ខណ៍នឹងបុរសមានប្រពន្ធជាកាឡកិណីជា សំឡាញ់នឹងគ្នា | គតិលោក, ភាគទី៥ by រឿងសត្វពពែពីរតួដណ្ដើមផ្លូវគ្នា |
រឿងរាជសីហ៍នឹងកង្កែប→ |
រឿងសត្វពពែពីរតួដណ្ដើមផ្លូវគ្នា
មានពពែពីរតួ ដើរមកទល់ជួបគ្នានៅកណ្ដាលស្ពាន ពពែ ១ ថាស្ពាននេះចំពោះដើរបានតែតួមួយ ៗ នឹងដើរចៀសគ្នាពុំបាន បើដូច្នោះ ត្រូវតែអ្នកឯងថយទៅក្រោយសិន ចាំយើងដើរទៅទៅដល់ចុងស្ពានកាលណា សឹមអ្នកឯងដើរទៅចុះ ។ ពពែ ១ ទៀតថា យើងឯងមានការជាបន្ទាន់ ត្រូវតែអ្នកឯងថយទៅក្រោយសិន ចាំយើងដើរទៅដល់ចុងស្ពាន់កាលណា សឹមអ្នកឯងដើរទៅចុះ ។ ពពែទាំងពីរសឹងពុំព្រមថយក្រោយដូចគ្នា កាន់មានៈរៀងខ្លួន ក៏បោលសំរុកជល់គ្នារុញទៅរុញមក ដោយកំលាំងទោសោ មោហោ បាំងបិទឥតប្រាជ្ញានឹងសម្របគ្នា ជល់គ្នាធ្លាក់អំពីលើស្ពានទៅក្នុងទឹកទាំងពីរតួ បានក្ដីវេទនាដោយធ្លាក់ទឹកមានអាការផ្សេងៗ ។
រឿងនេះ បានគតិដូចបុគ្គលដែលវិវាទគ្នាដណ្ដើមឈ្នះរៀងខ្លួន ចុះក្នុងក្បួនបុរាណថា ខឹងកើតខាត មានដំកាត់ឈឺឆោត មានក្ដីក្រោធក្រោយក្រៀមមុខ ខំសំរុកធ្លាក់ទឹក ដូចនិទានពពែទាំងពីរនោះឯង គួរចូលចិត្តចុះ ។
ចប់តម្រារុញមិនរាជាគតិ ទី ២០ ។