Янгамо (2006)/Ламбамо нартемкс/3
| ←2-це глава | Ламбамо нартемкс (2006) by , edited by Рябова Л. А. 3-це глава |
4-це глава→ |
| Нуянь Видяз. Янгамо. Келей ёвтнема, ёвтнемат, тешкст. — Саранск ош, 2006. — с. 24—34 |
[24]
— 3 —
Колмо часонь ютазь Элюва уш тевсэль. Велень тевтнень лангсо покшось — чипаесь, сонзэ валдозо. Лисемадонзо икеле, вечкеви а вечкеви, ульть пильге лангсо. Эряви кенеремс весемень мельга: кие чачи, кие касы, кие лопат нолды, кенери, коськи... Шкастонзо тевенть а тейсак — зярдояк а тейсак. Скалтнэ ашолгадомас потявтомат. А потявтсыть — учомот а кармить, савить кадомс кудос, стадас а понгить. Ды истя эрьва тевенть — шкастонзо.
[25] Виряз атя чокшне сеске эзь матедеве. Кадык покш кежиявтнемас нинзэ пензамкатнеде эзь пракшно, ялатеке седеесь, бульчом, скирятотсь. Эзь лезда удомань самонтень чинь-чоп стомамоськак. Алксоськак мик марявсь калгодокс. Ансяк валске ёнов совась кеме удомас.
Стясь. Эзь кенере чаманзо ёрвалдомо, глянкадсь Элювань пшти вайгелезэ:
— Модамарть ватксек.
— Молян лишметнень лангс варштан, кардтнэ урядамат.
— Кенерят. Эрь! Кочксек берянтнень. Ну мезекс, мезекс тень саик?! Каня а неят, улить седеяк берякшкеть? — тонавтсь, «пилязь пилясь» важдамонь асодыцясь.
— Неян, неян. Кадомак. Тейть эсь теветь, — музгордезь мерсь Виряз.
«Кадык эно кардазонь, цёрань тевтнень вачкавлинзе лангозон, сон авансетненьгак нерьги...»
Таргочи. Азоравась чокшнестэнть уш арсесь панемс панжакайть. Валскестэнть сеске кундась чапаксонь тееме. Эриця пельксэнзэ кармавтызе модамарень анокстамо: шлямс, путомс чугунсо каштомс, ансяк пиить — ватксемс, томбамс...
— Седе эрейнестэ лыкават-арась? — машнетезь, кода свал, мерсь кудонь ушмодеесь. Сонсь ичесь чапакс.
Эрейстэ-аволь — тевесь теевсь.
— Саить чугунтнэнь, аксяло оно се кастрюлянть ды ушов. Чуварсо ёзыть. Вант, седе вадрясто. Шлить ды путыть коськеме. Варштыть лишметнень, лиятнень, каяк Пинеме, симдить, — эзь саво учомс од кармавтома.
— Весе?! — пеедькшнезь мерсь атясь.
— Весе, — коськстэ ёвтызе валонзо тевпаргось, — седе эрейнестэ, иля уле тухмужакс.
Виряз атя содтонть раужо чугунонзо-кедьгензэ марто калдор-кулдор лиссь кардазов. Путынзе ливтезетнень ды васняяк совась лишмень кардс. Очкотне чавольть. Утомсто кандсь пряс пешксе кавто ведрат Пинеме. Таргась кудо икеле лисьмастонть ведь ды симдинзе лишметнень. Дёлязь вадяшизе васня Тештинень, мельганзо — Вармань.
— Ну-у, кода венть ютавтынк, кодат онт неиде? — кортазевсь, прок ялганзо марто. — Исень сиземадот мейле кода прят марят? — пшкадсь Тештиненень. — То-то-о. Течи тенк, кецнеде, оймсема чи максан. Вийть таштадо.
«Вечксак-арась тевенть — теема, ков эно молят», — истя арсезь, сияждыця пря атясь педясь пенксев, [26] содов чугунтнэс. Прядызе те весемеде пек «вечкевикс» тевенть, каясь скалтнэнень тикше, урядынзе кардазтнэнь ды уш совиксэль кудос. Эзь кенере. Чи-и-корк мерсь кудыкелькс кенкшесь, ды кузтемпенть сюпалгавтызь кавто ведрат.
— Ведьс седе курокке!
— Ули теезь! — згилязь рангстась кардазонь прявтось, цопадинзе ведратнень ды лиссь ведь мельга вальмалов, зярыя кудос лисьмантень.
Кандсь весть, омбоцеде. Совавтынзе ванськавтозь-нардтнезь ведрадо ламо кельгемань чугунтнэнь. Низэ саизе эйстэст вейкень, ютавтызе ланганзо вановтонзо ды, сурсонзо нерьгстазь, мерсь:
— Те мезе? Шлик лемезэ? Монень истят важот а эрявить! Мезеяк а теят мельспаросо. Мезес а кундат — мельде-валдо. Кирдть, теик тевенть педе-пес.
Виряз истя теекшнеськак — мелень путозь. Ансяк... Неть валтнэде, марявсь, лоткась сатомодо коштось, секень вант, лепии, нурьгатотсь седеезэ. Типельк-типельк кивчкадсь превсэнзэ мелесь: гомадемс неть идемевсень чугунтнэнь кияксс ды ношкстамс, удалов апак варштне, ков сельметь неить. Зяроксть сакшнось тензэ те мелесь... Ялатеке ковгак эзь ношкста. Ютыть кежтне, ойми, таго кадови. Нейгак истя: саизе нинзэ кедьстэ «пидема паренть», прянзо апак кепеде, чатьмонезь лиссь, теке сулей, мерезенть топавтомо, «педе-пес» тееме.
— Саты теть чугунтнэнь нолсемс! Совак ярсамо, — зярыя шкань ютазь кецневтизе «нолсицянть» содавикс вайгелесь. Виряз ней лиякс тейсь: ледсь мелезэнзэ нинзэ васень кармавтомазо — «раужо баяганть», кудос совавтомадо, понгавтомс чинь каршо пирявкс пряс. Истя тейськак.
Совась кудос.
Пекезэ зярс пек эзь вачокшно. Зярдо жо вановтозо эртевсь каштом икеле лавсянть лангсо тантей чинесэ лексиця модамарень панжакайтнес, пекезэ потятотсь. Элюва кандсь стувор лангс кавто прякат, вейкенть керизе нилев. Пси коштось менчевезь венемсь эйстэст потолокс. Чакшкестэ ваканс каясь исень пидевть чапамо ловсо.
— Те тонеть, тантягай, — мерсь Элюва ожола-тюжа, сельгетькак туить, пенксенть каямсто, — вечкат тон.
Виряз атя мельспаросо «увтясь» прякастонть ниле пелькст. Тантейть! Теке розь пештень товт.
— Сюкпря, пиципалакскем! Седеем витевсь. [27] Кавшанят, тантейть! Мон, теня, сырган ракшатненень тикшес, — паро ёжодонть пекензэ ёзазь, ёвтась Виряз.
— Вантака... Умок уш сыргамаль... Тусть, мерят, мелезэть? — полавтызе паницясь казямо кортамонзо стувор экшс озамсто. — Эрьга, варчасынь...
— Мон эно сыргинь.
...Кияк а соды, мезе карми улеме ванды, ковонь эли иень ютазь. Эзь сода Виряз атяяк: тунь апак учо, прок менельстэ, сы тенст васолдонь инже. Панжинзе паксясто самсто кардазонь келей ортатнень, ды вановтозо эртевсь перьгавтозь асодавикс лишмес, кона порнесь тарантасонтень каязь тикшеде. «Та-кодамо келей сёлмо валгсь пизэзэнек, — арсезевсь неезденть. — Сюпав, неяви, нармунесь, тарантассо юхаи». Совавтызе «пижень» улавонзо кардазс, перьгавтызе лишмензэ ды содызе секе крандазонтень тикшеде порнеме, путызе пелюманзо, совась кудос.
Удало кудосонть кашт. Карво ливти — маряви. Икельцесэнть кайсететсь цёрань аволь пек гайтев вайгель.
«Вай, те кие истямось?» — ютась санганзо апаро ёжо. Сонзэ апак невте, атясь совась икелев.
Стуворонть экшсэ озадоль чумора атя. Виряздо седе сыре. Черензэ ашот, прок тустосто ашолгавтозь ловсо. Судалксозо ды улозо валанясто наразь. Теде ды Якстерть мериця чамаумардензэ неявсь эсь иензэ коряс седе одокс. Инженть лангсо эрзянь викшнезь панар. Ашо. Сивезэ псиденть келес юксезь.
Стуворонть омбоце песэ, Вирязнэнь копорь ёндо, озадо Элюва. Карадо-каршо аштицятнень икеле прякат, вишка цяпласо мазыйстэ тапарязь ламбаськат. Вакссост панжозь пия бутылка. Вальмалангсо нилешка-ветешка уш чамдозь. Совицянть судоварянзо тешкстызь папиросань тантей чинентькак.
«Э-э, ды тесэ, маряви, покшчинь симнемкат!» — лемдизе Виряз неезенть.
— Озак, атя, — чольдерьгадсь Элювань вайгелезэ, ды кедькоморсонзо цяпадсь эземганть, — те Иван Паксютыч Письмеров. Мон теть та-кода ёвтнинь. Сон Килейвелень. Модань тевтнеде башка торгови сюросо. Дошуз ломанесь. Валонь кирдий. Ёвтнинь теть... Стувтык? Вантака... Сон вана, те шержей прясь, — од мирдем. Эрятано вельсоветтэме. Сисем иеде ламо. Лемензэ сонсь ёвтасы.
Анелицясь аволь кортась — витюрдозь витюрдсь. Валсонзо марявсь эсь прянь идема ды кеняркс.
— Виряз. Эрзянь лем. Вастневи ней чуросто. [28] Сюк-сюк кисэнзэ тоначисэ умок оймсиця тетянень. Сон истя лемдекшнимим. Пангонь кандтнись вана сёвны эйсэнь «атякс». Мекс-бути эрзянь лемтне тензэ а вечкевить.
— Те берянь, — эчке, рокиця вайгель пештизе кудопотмонть. — Аволь умок ульнинь Алоошсо. Икеле седе марсевсь тосо келенек, ней уш чуросто. Те берянь...
Эчке вайгелень азорось саизе келей, прок рукшна лопа, коморсонзо панжозь пия бутылканть, явизе эйсэнзэ улезенть колмов.
— Эрде эно, содавиксэкс теевеманок кис, — ды сонсь васенцекс, киньгак апак учне, каизе кургозонзо кечинесэнзэ ожола-тюжа веденть. — Та-кода Элюва нить тердекшнимим пангс. Тевтне кирьгава, ялатеке сестэ алтыя прям варштамс. Ансяк вана кизэсь а пангонь. Коське. Умок вирьсэ араселинь. Тевесь аволь пангтнесэяк. Тошнаинь. Эряволь ютамс. Юткоськак Эрьмезьвелестэ Килейвелес кемень вайгельпеть — арась вирьпулынеяк. Ансяк лемесь кадовсь — Килейвеле.
— Адядо варштатано, — талнозь, валтнэнь нильнезь ёвтызе мелензэ Элюва, стясь ды кармась пурнамо-сэрнямо.
«Те мезень тамаша, мезень эвсь киштсь тарканть лангсо? — валовсь Виряз атянь ланга пси ведь Элювань коник лангонзо неемстэ. — Велькс песь кияксс токась, тодовтне мельде-валдо путозь. Вельксэсь мерьказь. Те аволь Элювань койсэ. Истямокс зярдояк тарканть а кадсы. Кие, кие?.. Кодат чопачат сакшность?»
Неть сянгоркс, оймень наксавтыця арсематнень марто чатьмонезь лиссь стуворонть экшстэ, ютась кудыкелев, тосто валгсь кардазс. «Вай, авакай-тирякай, вай, козонь понгинь! — эзть кадно Вирязонь, майсевтсть, раздесть седеензэ мельтне. — Урядонь истямо кирдий, ваньксчи мельга правтыця, ды вант вана — прянзо лангс велявтнезь велькст-ацамот».
Кулелямонь ёжотнень рикстедемга, совась кардс, ливтизе омбоце лишменть ды сюлмизе панст ведьмеде васенценть ваксс пиже тикшеде порнеме. Мезеяк эзь лезда: а лишметь, а мезть, — раужо мельтне лаказь лакасть.
Лиссь, прок мазый баляга панжовсь, Элюва. Прясонзо ашо, уло алга сюлмазь паця, эрзянь покаень таркас лангсонзо истя жо ашо, вишка чахрынесэ артозь ковта ды якстере брижазь юбка. Кедьсеерьксэнзэ трокс каязь кептерне.
Аволь покшке, стёжна рунго, сэнь сельме, [29] турвасонзо налксезь налкси мельс туиця мизолкс. Сынст эйсэ ды ёрокчисэнзэ зярдо-бути эждекшнизеяк Вирязонь. Кузтемпесэ «мазый баляганть» удало аштесь ашо панарсонзо аволь сэрей, келей лавтов инжесь.
— Тонгак, атя, сайть кептерь.
— Мон ковгак а молян. Виренть содасак. Аволь кода мон. Азёдо кавоненк, — башка-башка, лангозост нежедезь, ёвтынзе Виряз меельце валтнэнь.
— Стяко иля ботно — молян, арась... Ютак, саик кудыкелькс стенас понгавтозь кептеренть ды вирев, саты кашкамс кудосонть! Адя, адя, минь аволь кувать, — кармавтозь-кортазь валгсть кузтемаванть Элюва ды инжесь, кардазонь вишка кенкшканть лиссть ушов. Кудотнень, икельгаст кальтнень юткова элякалесь кизэнь маней, аволь пек пси чись.
Кудонь-кавтонь ютазь сасынзе Виряз.
Лытасть талай. Састь чаво. Вете-кото суравкадо башка кептерезэст мезеяк эзь валго. Виде, кизэсь а пангонь, омбоце ков менелесь эзь правто сельведнеяк. Паряк, седе тов, ожо шканть малава почкоди сэнь латось? Сестэ уш туить мукорь опёнкат. Содык азё, кинь мезе учи ды мезе канды вандынь чись. Зярс жо карво пангтнеяк мазычист а невтнить.
Чикуншкадо мейле пангс якицятне ульнесть тосо, косто сыргакшность вирьга-кужова якамо — Пиргужтнэнь кудост-кардазост икеле.
— Совадо, ялгинеть-оинеть, — моразь ладсо пшкадсь Элюва кенкшенть панжомсто. Меельцекс совась ды пекстызе мельганзо кенкшенть Паксютыч. «Сыргатано курок, иля мелявто», — пшкадсь лишменстэнь, теке басом нерьгстызе кедензэ тарантасонтень каязь тикшенть алов ды таргась тосто колмо бутылкат пия. Совась мартост кудос.
Элюва каясь чакшкестэ чапамо ловсо. Путсь верек алт. Виряз керсесь панжакай. Печтнень ладсинзе шаваняс. Анокстазь ярсамопельтнень мекев-васов яказь кандтнинзе икеле кудонь стуворс.
— У-у, тынк кедьстэ, ванан, курок а менят, — кеняркс ёжонь марязь, пештизе кудонть вайгельсэнзэ Паксютыч.
— Мейсэ тевесь? Кадовт, валске ильтятадызь, — поладынзе инженть укснеманзо азоравась икеле кудов ливтязь ливтямсто, — тарка мутано, кудотне кавто.
— Кудотне кавто... — валтнэнь ускозь мерсь Паксютыч, арсезевсь. — Кудотне — кавто, тевтнеде — сядо. Арась, арась, Элюва сазорнэм, лужалемс, шка [30] ёмавтлемс — те а монь койсэ. Вирьга якинек-пакинек — теяк паро. Сусктано-корштатано аламнеде ды кудов.
Стуворонть перька калякамось мольсь аволь зняро пангс якамодо, зяро паксянь тевтнеде: нуемат-пивсэмат, яжавтомат, пенгедемат... Велесэ эрязь эно мезде лиядо? Телесь кувака, кургозо покш, ансяк кенерть пештямонзо. Секскак весе мелявкстнэ чарыть сонзэ перька, эрьвась бажи савтомс тензэ.
— Кортыть, улемс инжекс вадря, ансяк эсь кудосот — седеяк вадря, — ледстизе атясь-мазычись ды састыне-састыне лиссь стуворонть экшстэ.
Удало кудова ютамсто Элюва автордызе пряка ды кургансо верек ал марто анокстазь юдминенть ды венстизе Паксютычнень, умоконь содавиксэнзэ туртов.
— Те тонеть, Паксютыч! Вант, алтнэнь илить чемердя. Течинь алыявкст. А содылинь, мезеяк лия пурнавлинь. Ней уш мезе Инешкипаз макссь!
— Сюконян, Элюва сазорнэм... Прям комавтан парсте вастомат кис. Витинк мелем вирев лиснемасонть. Пазось максозо тенк шумбрачи ды ояксчисэ эрямо, — цярнось атянть эчке, аламнеде ирныця вайгелезэ ушов лисемстэ.
Сакшныцят, яксицят, покшчить... Кода ды мезе илязо уле, тевтне ялатеке теемат. Теемат, валгиндеряй Пазоськак. Вирязнэнь налкставсь те апак учонь, сонензэ асодавикс ломаненть марто вастовомась, китнэсь седеезэ. Лиссь кардазс. Симдинзе лишметнень. Варштась пирес. Ютась тингелангов. Марявсь тензэ, мезе-бути ёмавтсь. Мезе — а соды. Эзь муе эстензэ тарка. Аламнеде витизе мелензэ, полавтынзе арсемань яннэнзэ одониясь. Аштесь икелензэ, прок пшти тёкш сырнень пандо. «Эряви капшамс, — сась мельс лангозонзо ванозь, — а пивсэсынек минсь, калгасызь-пивсэсызь чеертне. Капшама, капшама, покштяй...»
Мурдась кардазов. Тошначинть панемга, сайсь узере ды кундась пенгень лазномо. Якстере сакало Юртай зярыя чить бахиесь. «Кадовсть аламо, монськак кодаяк изнясынь», — тешкстызе эсь пачканзо узересэнть ахолямсто. Цюрка, мельганзо омбоце, колмоце...
Ломанесь Виряз тужо, аволь тол, а палы, тевенть теи апак капша. Видьстэ меремс, малав сизьгемень иесэ цёрынекс тёкиеме а кармат. Кодат тёкиемат, зярдо ловажатне чикордыть апак вадне чарокс. Озат — а стяват, пилытне каназкадыть, стят — а озават, таго «ой-вай!». Сыречи. Тень эйсэ мазычизэяк. Ков молят? Стамбаро лыкамонть кис сеедьстэ понгонияк омбоце пельксэнзэ пельде. Сонензэ мезе иетне?.. Ульть свал од. Тевтнень [31] чевеляк, якак ёндолкс. Кепедть седе ламо, кандт седе васов. Лия а соды. Сон, Виряз, ды неень полазо вейкест-вейкест ёнов тунь амолицят. Васенцесь эйстэст котьма, омбоцесь — каямо, кодемкс: тей-тов, тей-тов, эрьва тевесь кедьсэнзэ лаказь лаки. Апак эрязкале, седе нурькинестэ пильгень путнемань молевкс а соды. Свал чиезь. Сонсь вишкине — мельганзо а кенери вензав цёраяк. Цянавнекс ливтни. Теде лиясто лиснить кечкерематкак.
Бах-бах, шпа-а-нк! — сравтневить вачкоемань гайтне кардазонь келес. Ансяк саразтнэ сынст кунсолыть. «Те мезе истя?» — кевкстнить пряст кепедезь. Пукшт-пакшт лазновить пенгтне. Прясонть ялатеке поны карьксэнзэ Элювань удома тарказо, прянзо лангс, кода марявсь, велявтозь коникесь. «Каня те алкукс? Паряк, истя монень маряви? Мезть а эрсить... Мекс мезеяк а вешнемс кенденть алга? Сестэ кода чарькодемс пиянь чаво бутылкатнепь? Те идемевсь атясь... Тикшес сыргамодон мейле шкадонть байтяколь. Оно зяро бутылкат мамштасть! Оно кода Элювань сельмензэ налксесть, келеськак лавшомокшнось. Мезть кортамс, умок редязь — симезь авась эсензэ лангсо а азор. Кадык кургскак а сайни, пиинеденть корштнесь. Оно кода кулдордсь... Ёвтнекшнесь Элюва те боярдонть мезть-бути. Мезть? А... каня кирдевить! Стувтовсь».
Гомалесь килеень цюркатнень сундерьгадомс. «Саты течис. Ванды прядсынь», — сась мельс ды тяпадизе узерензэ мукорентень. Совась, ливезев конянзо нардтнезь, кудос.
— Ёрвалдыка лаханонть велькссэ. Седе вадринестэ, вадринестэ, — венстизе Элюва потявтома ведранть ловсонть педямодо мейле.
Виряз ушодсь шлямо.
— Азёка ливтик тусто ведь ведранть. Я, стувтокшныя, валскенень пенгеть анокт? — поладынзе кармавтоманзо азоравась.
— Марян, марян! Кедень аволь кемень. Неят, мезе теян? — путызе атясь тарказонзо ланга тукшныця эриялганзо.
Теизе васень меревксэнть, ливтизе тусто ведь ведранть, кавксть кандсь пенгть. Ней мезе?
Кувать учомс эзь саво.
— Шлик на пачалгонть. Мейле тенсесыть кудотнень. Монь кедень новольсть, — пеняцязь ладсо «кецневтизе» ялганзо Элюва ды невтинзе кедень луволемасо сэредиця суронзо.
Неть тевтнень «сявордомадост» мейле Виряз атя [32] юксинзе-каинзе карензэ, путынзе свал путнемань тарказост ды ёрвалдынзе пильгензэ. Кепе совась икеле кудос. «Окойники, — тешкстызе эсь пачканзо, оймензэ шождынестэ таргазь, — течис весе». Озась столь экшс. Саизе ужос чавозь лавсинестэнть умок пачтязь газетанть. Ютась статьянь лемтнень ланга, кепедизе прянзо, ды вановтозо эшкевсь анамаз пона коникентень. «Пту! — сельгсь ацирьгадозь ды теке басом оймавтызе эсь прянзо: — Мезть ацирьгалят, сыре кренч, каня а содат, кить аватне ды кить цёратне? Васенцетне микшнить эсь сюпавчист, омбонстнэ — рамсить. Эрьвась менди эсензэ ёнов. Аволь уле те — аволь уле эрямось. Авась эсь эрявиксчисэнзэ кармавты тееме весементь, мезе тензэ эряви. Тень кувалма сон эсь прянь вечкиця. Весе улезэ ансяк сонзэ ладсо, бажи теемс цёрастонть кедьёнксонь кондямо. Кода илязо уле, сон — пизэнь пурныця, ванстыця. Секскак мезе лангскак а ваны пурнамстонзо. Секскак самай мерьказь коникесь, вейсэнь удсема таркась... Мезе лия учат?»
Кода эзь оймавтне оймензэ, апарось эйсэнзэ каразь карась. Нусманя арсеманзо сезинзе та-кодамо велесэ вейсэнь од эрямодо статьясь. «Те таго мезе?» — кивчкадсь превсэнзэ ды кундась ловномонзо.
Совась Элюва.
— Саты теть ваномс конёвонтень! Нувсят, некак, мадть! Чоп нерьгинек, — валтнэнь ёвтазь, каизе панаронзо ды дюм штапо лоцьк мадсь Вирязонь седеензэ раздиця таркантень. — Лоткак каштордомодо, мадть.
Виряз прядызе ловноманть, козкстась ды путызе конёвонть тарказонзо. Аламос мольсь, частнэнь тикаемадост башка, кашт. Колызе сонзэ кониксэнзэ мадезь Виряз:
— Элюва, дугай, те кие кедьсэнек ульнесь? Мезть-бути ёвтнекшнить... Мезть — дух мельсэнь эзть кирдеве.
— Сядоксть теть ёвтнинь. Прясь тонь, видеяк, сувтеме. Те атянть, Иван Паксютовичень, содаса умок. Килейвелень. Сю-ю-пав алясь! Ули ведькевезэ, кирьпецень заводозо, ямкст пенгеди. Сюросо торговамодонзо кортамскак а мезть. Кудозо Килейвелесэ кавто этажонь. Кудом путомсто лездакшнось тень.
— Мейсэ? — совавтсь вал кунсолыцясь.
— Кирьпецьсэ, содазь. Эрявсь эйстэст аволь аламо.
— Зяродо лиссь?
— Кода теть меремс... — Элюва аламос чатьмонезевсь, — аволь уш кода весеменень. Зяро-бути сюросо пандынь. Сон эдь сюросо торговиця.
— Зярос нолдтнизе питненть?
— Мезень кис?
Валтнэ зярс-бути лоткасть коникстэ коникс ливтнемеде. Виряз атя керш боканзо лангс мадезь учось. Элюва, прок сускизе келензэ, чатьмонсь. Окойники тетькевикс, оймень киртыця каштмолемась сезевсь.
— Весе теть эряви содамс. Бути уш истя бажат, ёвтаса. Теня, од ульнинь. Эринь мирдевтеме. Эрявсь тень... Мезень берянесь?
Элювань видькстамодо атясь велявтсь кунст. Марявсь тензэ, лепштизь таркантень мештень трокс каязь чувардо пештязь кескавсо.
— Сестэ, лисни, течинь мерьказь таркась... од шкадот ледстнема? — стакасто лексезь, пшкадсь сорныця вайгельсэ.
— Мезе-мезе?! — ацирьгадозь серьгедсь тень каршо Элюва.
— Мезе марить. Ды неить. Неик, кода «ацазель» таркась. Паряк, истя псакась киштсь лангсонзо?
— Содат мезе?! Нейке жо стяк ды пурныть курмот-кармот. Азё тов, косто сыть. Сыре нить учи эйсэть! Свал истя пурнакшнан вельксэнь-алксон, свал!
— Свал, — эль марявиксстэ лиссть Вирязонь кургсто валтнэ, — теке мон а содан урядонь кирдема койдеть, а содаса, кода вадяшакшнат велькстнэнь-тодовтнень. Кувать монстемень аштесь?
— Тонеть кодамо тев?
— Истямо... Каня стака ёвтамс? — исковась Виряз атя.
— Сась велявтомадот икеле сеске, — арсезевсь, аволь сеске топавтызе поланзо меленть авась.
— Сеске, мерят? — кулелямодонть палсь Виряз. — «Сеске», лисни, пия бутылкатненьгак костинк?! Ве валозот а кемеван! Кенгелят тень визьксэнь апак сода.
— Тонсь истямат! Вант эсеть мельга. Свал чумочинть ки лангскак ды каясак. Весе чумот, ансяк аволь тон, — Элюва прядызе пелькстамонть.
Кудось пешкедсь, чоподадонть башка, каштмолемадо. Теке кецнесь. Сёвномань недявксось прядовсь. Виряз атя содась: весь юты апак удо. Истя лисськак. Оймамонь апак сода чавсь прясонзо мелесь: «Кода улемс, мезе теемс? Ков молемс?» Зярскак шаштыть та-ков, ваить неть кевкстематне — таго лангс лисить, таго рангозь рангозевить. Терявтнизе, ды а весть, кекшемс эйстэст эсь пачканзо ловозьгак. Мезеяк эзь лисе. Полавтнесь [34] боканзо, маднесь комадо, кунст, лиснесь ушов — мезеяк эзь лезда, удомазо малавгак эзь тердтневе.
Окойники ашолгадомась варштась позакадозь сельмсэнзэ вальматнева, кундась эземтнень-кониктнень алга чоподанть пансеме. «Саты кеверькшнемс», — мерсь эстензэ атясь ды састыне, илязо маря низэ, нолажтсь «чувтонзо» лангсто. Совась паникудос ды чаманзо апак ёрвалдо карсинзе пильгензэ. Оршнесь. Лиссь кардазов. «Ансяк тевесь, эйзэнзэ рожодомась менстятанзат куш кодамо ормадо», — ледсь мелезэнзэ вечкевикс валмеревксэзэ, ды сон кундась эрьва чинь тевезэнзэ.
Ушодовсь од, мелявксто, кенярксто, ризкстэ, эрьва кодамо тевде-котьмамодо пешксе чись.