Янгамо (2006)/Ламбамо нартемкс/2
| ←1-це глава | Ламбамо нартемкс (2006) by , edited by Рябова Л. А. 2-це глава |
3-це глава→ |
| Нуянь Видяз. Янгамо. Келей ёвтнема, ёвтнемат, тешкст. — Саранск ош, 2006. — с. 10—24 |
[10]
— 2 —
Валскень чопода. Виряз атя ды Элюва уш пильге лангсот: арсить сявордомс покш ды шкастонзо теемань мелявкс — усксемс паксясто нуезь сюронть тингелангс, вачкамс пултнэнь одонияс. Туиндеряй пиземе, ментеть пелензэ, мерть, ёмавтсак. Теде башка, сави теемс ламо верьга-ланга тевть.
Азоравась васня потявтынзе скалонзо. Ней кундась каштом икельксэнь тевезэнзэ. Ватксесь модарькат. Тедедень. Куроккестэ «лапшакс» керсинзе пачалгс, чулгсь лангозост колмо алт, почодынзе салсо ды путынзе рестамо. Те — валскень ярсамопель. Чикуншкантень модарькатнеде ватксема седе ламо. Зяро иляст уле, те тевеськак теезь. Керсинзе ды — чакшс. Каясь тозонь ловсо, аламошка велькс, сал, тавадызе кшнинь пачалгсо. Шкань ютазь те пакшонть путома явазь каштомс. Явавтоманть учомга анокстась ям. Сывелень, мезесь велесэ те шкава, умарьковонь ушодомга, эрси чуросто.
Сеедьстэ цёраломантнень кургсто истят кортамот марсевить: «Тынь, аватне, чинь-чоп кудосо лужакалетядо. Мезде тенк сиземс, паряк, чакштнэде-чугунтнэде?.. Минь вана, паксянь кирдийтне...» Содавольтькак самай неть «кирдийтне», зяро вийть, нарде, «неврат», кода кортыть Эрьмезьвелесэ, эрявить кавксо-кемень кургонень ямонь, ансяк ямонь пидемантень! Сестэ, содазь, авольть карма прянь шнамо-лавгамо «минь» сеерицятне, келест нилевлизь.
[11] Элюва течи пиди-пани ветенень. Малав свал — ансяк эстест. Ялатеке содасы ярсамопелень анокстамонть, кудо, кардаз юткова лиеманть «танстензэ». Пенчтнень-вакантнэнь шлямост-нардамост ансяк мезе ашти: калдордат, калдордат эйсэст. Чакштнэде-чугунтнэде кортамскак а мезть. А кенерят андомс веенстнэнь — кирьгапарест раздить, вешить лиятне: покшт, эйкакшт, скалт, реветь... Весе рангить: эрь монень васня. Весень андт. Ансяк кенерть, вишка Элюва, топавтомс мелест. Ды кенери: чары-нерьги кизна чоподасто чоподас, тельня — чоподаваяк. Теке штере вели. Текеде, секень вант, теевськак нимилявнекс — алкине, човине, коськана. Оршневельгак цёракс, меревлить — икелеть цёрыне. Мейсэ ансяк оймезэ кирдеви? Ды, теке басом, мейсэ ансяк мунизе-колдовизе, кудозонзо ветизе сыре Вирязонь?
Кудозо Пиргужонь Элювань якстере кирьпецень. Велесэнть истятнэде ансяк кавто. Икельть-удалт. Вельтязь лазсо — тень кувалмаяк аламо истятнэде. Ловт, весе велесь эри олгонь лато ало. Кой-кинь, виде, кудост вельтязь розень чуказь пултсо. Латонть ланга, ладсемадост мейле, валови тусто сёвонь ведь. Пиргужонь икельга ютамсто ламот кепсить лавтовост эли чаравтыть прясост: «Кудотненень кудо! Те кинь истямось?» Кудось сельме икеле — эрьванень неяви. Кода, кодамо вийсэ путозь, соды ансяк путыцязо. А лисят жо, алкукскак, веле куншкас, а кармат чинек-венек рангомо — прянь идеме, косто саить ярмактнень. Ёвтнемс чоподасто чоподас паксясо-кудосо ливезькалемадонть, чулксетиця кедтнеде-пильгтнеде? Стяко. Тень кияк а несы, а марясы, а чарькодьсы.
Ялатеке кой-кить содасть, кодамо вийсэ лиссь, прок мода потсто, те мазый, эрямс эрьва ёндо паро кудось. Содасть: Вишкайня важодеме машты, прамозонзо тевензэ теи. Велесэнть истятнэде зярыя, аволь ськамонзо. Мекс кияк эзь путо кевень кудо? Васень мирдензэ пельде цёразо важоди ошсо покш начальникекс. Лездась. Авазояк аволь рукшна лопа, аволь олгонь ломань, эсензэнть а менстясы, вакска а юты. Машты ведьметнень кирдемеяк — ветямс тевенть тов, ков эряви, таргамс лезэ тосто, косто киненьгак а саеви. Мезеяк а мерят, Элюва авась превей, тевень теиця ды ёжов. Ансяк...
Виряз тупор-тапор оршнесь, ёрвалдызе-нардызе сакалов ликензэ, кудыкеле карсесь ды лиссь вальмалов. Ашолгадсь. Чилисемась кирвазтизе качамовтомо [12] тол-пандянзо. Коштсонть марявсь кодамо-бути сёксень тансть. Атякштнэ кецнесть од чинь самонтень ды граж вайгельсэст тердсть мартост кецнеме лиятненьгак. «Саты тенк човсемс кирьгапаренк, Тынтеменкак умок стинь, — ульнесь мелезэ кардамс жойсэ морыцятнень, — умок кецян чинь чачомантень!» Те меленть марто, сонськак а соды мекс, варштась васня Алопев, мейле — Верепев. «Кода эрят Эрьмезьвеле, кодамо ёжот?» Аштесь-тейсь, сыргась росадонть начко луганть ланга Урайнень. Кудост Пиргужтнэде ниле-вете кудонь ютазь, ушкс.
Комсешка иеде икеле покш, мазый кудонтень совамсто нулгодезевсь. А ютават. Кузтемпесь наксадсь, чиремсь, ков а варштат — рудаз ды шукшпрят, куш потомдык судот наксадомань ды куштамонь чинетнеде.
Тесэ эри Ураень Юртай.
Кудыкельганть пелезь ютазь, валскень якицясь совась кудос. Стенатнесэ шпалертнэ нулныть, теке апак муське понгавтнезь муськемат. Кенкшенть эйстэ вить ёно — коник. Эйсэнзэ «оймси» сонсь кудонть азорозо.
Мекс а велявтнить, куш аламос, тоначистэ? Ве сельмсэ куш варштавольть Урайтне, мезе лиссь кудост-чист, эйкакшост марто Тов туемадост мейле. Юртаень тетянзо-аванзо дошузольть. Оно кодамо кудо путокшность! Юртай соды, зяро вийть эрявсть стявтомстонзо, зяро чить-петь стомамосо ютавтозельть, якасть мельганзо, прок вишка Юртай мельга зярдо-бути. Каня совсесь превзэст: сисем тейтерде мейле муезь цёрынест пачтьсы юртост ёмамос? Васня ушоды эсь прянзо аламонь-аламонь ченькссэ ёмавтомо, мейле кадсы ёмамо кудонтькак. Азортомо кудось — а кудо. Превейстэ теить тоначинь эрицятне, нать, содыть: варштындерят ормадо-сыречиде куломадот мейле икелень эрямозот, сави куломс омбоцеде — визькстэнть.
Вальма суликатне цийнить ды сорныть корномадонть. Лездыть тенст бизнэмасост эрьва кодамо тюсонь карвотне. Кудазоронть рудазов, кепе пильгензэ венстезь кониктенть кувакасто, эль эзизь пиря совамо тарканть. Васоньпеельтне допрок стувтызь алянть тюжа сакалонзо.
— Юртай, стяк, саты теть удомат тетьксемс! — верьга вайгельть пшкадсь совицясь.
Каршо — ко-о-о-р!..
— Мельгат сынь, марят-арась?! — серьгедсь седе [13] пек Виряз ды, нулгодеманть изнязь, весть-кавксть ноцковтызе корныцянть пильгень покш сурдо.
Окойники марявсь бу-бу-бу моткодема ды дёготь раужо тюс тодовонть лангсто кепедевсь пондакш, апак судря пря. Улевельгак чопода-тюжа черензэ-сакалонзо мельга аламошка, мельде-валдо яксема, натой мельс туевельть. Ней жо...
— Мельган, мерят? Ух, содавлитькак, кода прям лоскии. Ух-ух, мезде чокшне глянкадинек, монськак а содан... — кортазевсь болдордозь, нолдынзе кияксс кепе пильгензэ ды, сельмензэ нардтнезь, стясь коникстэнть. — Учомак аламос. Васняяк, теня, витема лоскиеманть.
— Адя седе курок, теде тевесь а лотки.
— Тон азё, мон счас, мельгат, — алтась Юртай ведте пешксе ведрантень ютамсто. Амольдясь кече ды симизе лекстявксонь апак тее.
Виряз лиссь овтонь пизэстэнть ванькс коштс, кона, марявсь, састыне-састыне чудсь маласо пиче вирьстэнть. Атясь кувакасто таргизе оймензэ ды марямга ёвтынзе арсеманзо:
— Эри, лемезэ, сисем тейтерде мейле муезь цёрынесь.
Эрязасто, прок тензэ аволь кодгеменьгак, валгсь валскень якицясь кузтемпестэнть, лиссь куринканть юткова кинтень ды сыргась Верепев, Шорянь Олдайнень, Элювань аванзо ёндо васолдонь малавиксэнзэ туртов.
Эрясь Олдай вишка кудынесэ. Ськамонзо. Мирденень эзь лисне. Мекс? Паряк, сонськак а соды. Лангс ваномс, авась кода ава: весе мартонзо, ули мезе лангс варштамс. Сэрейкс а ловсак, Элювадо алкинеяк а ули. Сонзэ коряс седе эчкела. Тюжала тюс чамазояк седе келей.
Кудосонзо кирдсь уряд. Апаро чинеть, кода Ураень, эзть маряво. Прянзо лангс авась эзь пеняця. Вастызе сыцянть паро мельсэ. Пеедькшнезь. Ялатеке Элювань ёвтнемавтомояк редявсь — палыця веденть вечксы.
— Лездамо тердеметь сынь. Элюва патят учи. Паксясто пултонь усксеме арсетяно. Молеват? — шкань апак ёмавтне ёвтызе Виряз самонь тувталонзо.
— Мезть кевкстнят? Молян, кода а молян. Лездамс эряви, — валаня вайгельсэ пештизе кудонть авась.
— Паро, паро. Прядсынек пултонь усксеманть, тосо, вант, пивсэма шкаськак шашты, таго тевть, — икелень тевтнеде арсезь, поладынзе валонзо лездыцянь вешницясь; теке басом чарькодизе: икелень тевтнеде ледстнемс а эряволь, а мезть келенть олячис нолдтнемс.
— Паро, паро, — валонь таргсезь, арсезевезь мерсь Виряз.
Олдай икелев ютамо эзизе терде. Аштесть карадо-каршо каштлангс кузтеминенть вакссо. «Вай, илязо уле пежетекс, ды сон авинесь эйбаро: сэрьскак, келескак... Потензэ, потензэ кода лексить!.. Токшицяст-вадяшицясткак арась», — ёндолкс ютась умок уш аволь од цёранть превга икелензэ аштиця аванть лангс ваномсто.
— Эно истя, Олдай. Пурнак-сэрняк — ды миненек. Ярсатано-тейтяно ды паксяв, — марявиксстэ, кенярксто пешксе гайгиця вайгельсэ прядызе кортамонзо Виряз ды кутьмерьсэ панжизе удалонзо кенкшенть.
— Козонь ёмсить? Мекс истя кувать? Тон ансяк куломань тердеме кучнемат — сядо иеть кармат эрямо. Мезеяк теть ломанькс а тееви, мезеяк теть а эряви. Шказо, несак, зяро?! — вастызе полазо-ялгазо ламоксть морсезь моросонзо.
Виряз марикскак эзь тее.
Сисем иеть содамокс эрямонзо перть, икелень нинзэ ледстнезь, содась: педсемс сезьган пулотнень марто а мезть, тон — вал, сынь — кемень. А кардавить а превсэ, а мейсэ лиясо. Те сынст вечкема сускомост: рангомс-пижнемс поласт лангс, ловомс сонзэ менчевиця кедьёнксокс. Эрьва авась бажи теемс мартонзо эрицянть сулеекс, истямокс, кодамо сонсь. Кортазо, яказо, пейдезэ, теезэ тевтнень... ансяк сонзэ ладсо. Секскак а мезть ёмавтнемс валт, кадык тыжны. Псизэ юты — ойми.
Валонь таркас Виряз озыксыль стувор экшс. Эзь кенере.
— Пенчть-вакант таргак. Иля удо. Путт кавто цяркат. Ужо-ужо, аволь кавто — колмо. Нилецесь — стопка. Юртайнень. Цяркадонть кельпрязояк а начтови, — Элюва сонсь кармавтсь, сонсь чарась-велясь каштом икеле. — Кши печкить? Совавтт кудыкельде, мусак чапакс очко алдо. Лыкак седе, лыкак, иля удо!
Зярс нить-полат эвтсть-анокстасть стувор, калдорк совась Юртай, мельганзо — учомс эзь саво — кеверезь кеверсь Олдай. Шкань апак таргсе озасть стувор экшс, ды цяркань вайгельтнеде мейле сеске калдордозевсть пенчтне.
Кода Пиргужт эзть бажа лисемс седе икеле, росав шкастонзо, эзть лисеве. Чипаесь уш теевсь азорокс, мельспаросо вансь кардазонь келей кенкшка [15] лисицятнень лангс. Икеле крандазсонть Элюва, омбоцесэнть ведьметнень кирди Юртай, вакссонзо — Олдай. Виряз атя пекстызе покш-келей, прок пейтеме панжадо курго, кенкшенть, капшазь ютась икельце крандазонтень, кузсь эйзэнзэ ды саинзе нинзэ кедьстэ ведьметнень. Аламнеде хропадизе эйсэст лишменть. Тона тусь ласьказь. Крандазось цярнозевсь.
— Сэтьместэ, сэтьместэ седе! — рангстась Элюва Вирязонь пилес, лекшкадсь лавтовозонзо. — Истя потмоткак лиси.
Ветицясь валгак эзь ёвта. Кирдсь ведьметнень. Тештинень кавто чить ковгак эзизь кильдтне, сон тошнакадсь олячинтень ды правтсь ардомо.
— Саты, саты! — рангсь Элюва, цирнезь цирнесь аволь истя пелемадонть, кода мельспародонть. Паряк, умонь-умонь эйкакш пингезэ ледстявсь? Тетянзо марто паксяв-ков ардтнематне? Кополсо ардомадонть вадря, мелень витиця, марявкшнось тензэ, мезеяк арась.
Васолот-васолот сеть пиже пакшань иетне, Тештинень тов а пурдасак, кись чии ансяк ве ёнов.
Эзь кадово юргозь-вешкезь ардыцятнеде омбоце улавоськак. Истямо ёжосо, кодамоль Юртаень стопканть «зэрневтемадо» ды тантей — секень вант, келеть нильсак — сывель ямдонть мейле, арази кадоват?! Чиськак паро ёжонтень лездась: маней, сэтьме, алтни седе тов, чикуншкава, псияк. Кодамо «копорькай» Юртай илязо уле, косо-бути васоло-васоло потсонзо эрясь цёрань ёжо. Вакссонзо аштицясь, Олдай, паряк, валдомтызе те эль липниця ёнксонть.
Эзизь редяяк, кода лиссть веле пес, ды икелест сравтовсь умань-умань явнозь Пиче паксясь. Сыре ломантнень ёвтнемаст коряс, умоктояк умок сонзэ таркасо ульнесь сэрей чопода вирь. Ледстнить ней сеть умонь, сувсо копачазь иетнеде ансяк кеменьшка акут-мордавиця, рашков эчке пичеть. Сынь кассть Пиргужтнэнь умадо пельвайгельпешкань тарка чивалгома ёнов. Пачкодсть матразь шканть пачка неень шкантень истят куляткак: сеть пичетнень ало кезэрень калмазырь. Калмсесть тозонь Инешкипазнэнь озныцятнень. Сестэ «Кристосто», бачкатнеде, церьковатнеде эзть марсеяк. Сакшность тей, калмазыренть малас, озномо. Тесэль репештяст. Озность Инешкипазонтень. Пшкалесь тензэ озатясь велень весе эрицятнень пельде. Энялдсь сон: максозо Инешкипазось паронь паросо, сюронь сюросо, ванстозо ломантнень ды сынст ракшаст ормадо-тарводо, [16] цярахмандо-даволдо, пурьгинеде-ёндолдо... Умок те ульнесь, колмосядт иеде икеле. Ней уш эрзятне стувтызь Пазонтень васень пшкадема валосткак. Костояк а марят: «Паз, чангодть!»
Вана Пиргужтнэнь умасткак.
Кундасть тевс.
Васень улавонть вачкить сынсь азортнэ. Омбоценть — Юртай ды Олдай. Крандазтнэнь потмакска сравтнесть чаво кескавт — певерезь товтне иляст пра масторов. Алга пултнэнь путнесть крандазонть кувалт. Путнесть ёжомарязь — иляст чукаво. Крандаз потмотне пешкедсть. Цёратне кузсть улавтнес пултнэнь трокс-трокс ладсеме-аравтнеме. Аватне сайсть сянгинеть ды ушодсть копонятнестэ вачкицятненень пултонь кепсеме.
— Кирдть, полай! — каятотсь салмукс пря човине Элювань вайгелезэ васень пултонть венстемстэ. — Седе парсте ладсек. Вант. Прятнень лангс иля чалгсе, допрок пивсэсыть. Кирдть!
Пулт, омбоце, колмоце...
— Тон овсе лоткить чеерень кундсемеде! — згилясь Ураень Юртай лангсо Олдай. — Иеть аволь сядо. Кирдть! Вант, понксот иляст новоле!
— Саты теть лавгамс! Седе ливчанясто макснек! — марявсь Юртаень вайгелезэ.
— Мон теть максан, тюжа пона! — раказь серьгедсь Олдай. — На, кундык! Вант, чить тешть а ловныть!
Виряз атя та-кода нолажтсь, пильгензэ понавсть — вере, олго лангсо, рунгонть кирдемс а шождыне, — ды озавсь. Се шкастонть верка, эрьва тевсэ палозь палыця Элюва весе вийсэ ёртызе пултонть. Пачканзо лисезь сянгосюрось нерьгставсь атянть лавтовс. Сэредькстэнть тона салавине вайкстась. Пря эзь невте.
— Тон мезе, аволь сутямить?! — рангстась Элюва верев ванозь.
— Сутямат тонь марто, — ноднозь мерсь Виряз сэредьксэнь изнязь пильге лангс стямсто. — Несак, мезе лиссь?
Лавтовдо алга коцтонь панаронь ожась якстерьгадсь.
— Те сянгсонть? Мон? Ха-ха-ха! — цяхазевсь Элюва визьксэнь апак сода. — Ха-ха-ха!..
Атясь эзь муе тень каршо валгак. Талакадсь. Эзь маряво томбавксонь сэредьксэськак. Седеензэ пачка ютась нал. «Те кода истя, кода? Седеймарямонь, лездамонь таркас — эльдекс цяхамо. Аволь васенцеде истят тевть невтни. Седейтеме ломань, паронь парот иля учне [17] пельдензэ. Ёрттанзат кудостонзо — «вайк» а кенерят мереме. Кенерть тарка лангс прамо, тейсы тень...» — ций-буй ютасть пряванзо неть ламоксть сакшныця мельтне.
— Мезе? Мезе лиссь? — сялгизе сянгонзо модас ды вырк сась Элюва ваксс Олдай.
— Мезеяк арась, истяко, — нусманясто ёвтынзе валонзо ды мекев озась пултнэнь лангс улавонь вачкицясь.
— Впряз леляй, валгт нейке жо. Валгт, тапардаса сялговксот! — серьгедсь Олдай.
— Валгт, алкукскак, а мезть тосо теть тарномс! — аламнеде чумонь марязь серьгедсь мельганзо Элюваяк.
Олдай каизе прястонзо ашо пацянть ды цирь сезизе васня кавтов, мейле лехань-лехань.
Виряз венстезь ведьме пе вельде састыне-састыне валгсь улавонть прясто. «Дохтурось» ёроковсто тапаризе верев тарканть. Меельцекс ютавтызе леха пенть кирьганзо перька ды сюлмизе козонь сатотсь.
— Весе! Седе эрязасто улав пряс! — пеедькшнезь-кенярдозь, верьга вайгельть яволявтсь ормань менстицясь ды автордызе авасоло модас нерьгстазь сянгонзо. Ютась эсь улавонзо ваксс.
— А удат, Юртакай-дугай? Вант монь! — цельця тейтерькс серьгедсь Олдай вачкиця ялганстэнь.
— Арась, арась. Лездыть атянтень?
— Лездынь, лездынь. Кирдть, эрь!
Виряз панст ведьмеде ветизе лишменть лия копоня ваксс.
— Сэреди? — тошказь ладсо кевкстизе низэ.
— Арась, — кежень кирдезь мерсь тона, — саик сянгот.
Атясь крандазонть удалга, таго ведьме пес кундсезь, кузсь пеледензэ ламо вачказь улавонть пряс.
Тевесь лаказевсь одс.
Крандазтнэ вачкавсть. Бастриксэ, илязо каладо улавось, пултнэнь нардевстэ лепштизь крандазонтень. Виряз покштясь ды Юртай саизь кедезэст ведьметнень, сыргасть велев. Аватне сялгизь модас, эрьвась эсензэ копонянзо каршо, сянгинест; апак эрязкале, эсь ютковаст кортнезь, ютасть уманть чирева пижелдыця лугиненть лангс. Тесэ симема-ярсамопелест, кой-кодат оршамопельть. Тесэ учосызь лишметнень мекев самост. Васенцекс сравтозь нулынензэ лангс озась Элюва, мельганзо — Олдай. Вал, мельганзо омбоце, ды ушодовсь, зярс а мурдыть усксицятне, велень кулятнеде ёвтнемась.
[18] Пиргужт усксесть тедедень товсюронь ментест чоподас. Усксемс — те пелътев. Тингелангс пачтязь пултнэ вачкамат одонияс — илязо юта пачкаст начко. Ладсемат истя — пиземень ведесь туезэ ланга. Велень куринкасонть дошуз тень коряс Пиргужтнэнь шабраст — Куляз атя. Ладсесь сон стака, товдо пешксе пултнэнь истя — одониясь неявиль сырнесэ вельтязь ёвксонь башнякс. А саевиль а пиземенень, а варманень.
Юронь тееме кундасть кавто атят: Виряз ды Куляз. Юртай мельгаст эль кенерсь. Мельс прасть улавтнень а сявордомс — ламо товт певерить. Тень таркас Юртай ёроковсто юксизе тертенть ды кундась шержейтненень сянгинесэ пултнэнь венстнеме. Эзь марявояк, кода чамсь ве крандазось, мельганзо одониянть малас Юртай ветизе омбоценть.
— Капшак, цёра! — пеедькшнезь серьгедсь Куляз атя.
— Чарак, чарак седе, аля! — серьгедсь Вирязгак.
Омбоце улавонтькак тарканзо муизь. «Башнясь» теевсь неявицякс, ушодсь сэрьс касомо.
Усксицятне, шкань апак таргсе, ёлдорсо кайсизь чаво крандазтнэс кедьёнксост, ведьметнень — кедьс ды таго тов, Пиче паксяв. Зярс псись вийс эзь сова, маней — капшак. Чикуншкава пултнэнь пелят токамскак — товтне пецерьсэ певерить.
Куляз атя аламошкас перьгедсь тевдензэ, видемтизе рунгонзо ды талай вансь вармакс ардыцятнень мельга, вансь мизолксонь кирдезь. Ледсть мелезэнзэ умонь-умонь од иензэ. Шкантень эзь нардтневе чись, зярдо сон — кемзисемге иесэ цёра — истя жо зэрнезь ардокшнось веленть кувалт Эрьгела мазый тейтеренть марто. Косот, косот сеть читне? Ков салынзе, козонь кекшинзе шкань вармась?
Элюва ды Олдай, лугине лангсо озадо аштезь, сувтнесть велень «келятнень». Учость усксицятнень самост.
...Важодемстэ, тевенть олячисэ, вечкезь теемстэ, шкась ливтязь ливти. Ансяк, маряви, ульнесь валске марто, кудотнень икельга тикшесь шержеель росадонть, ней уш, вант, якстере сувтеме чипаесь сизезь новольсь моданть вельксс. Умась чамсь. Сулейтне кувалгадсть. Авасоло латкось лекстясь вень экшесэ.
Паксясто састь чинзэ валгома шкава. Кундасть улавтнень чамдомо, одонияс пултнэнь вачкамо.
— Састо, састо! — рангстась Элюва Вирязнэнь, улавонть прясто сянгинесэ пултнэнь максницянтень. — Каня а марят, сэрякс певерить товтне?! Оно сень [19] венстик! Аволь сень, оно сень! Сень, сень! Мезеяк а чарькоди. Венстик, мерян, васенценть!
Виряз эзь кирдеве. Сельгсь ды мезе вий вырновтызе пултонть — кодамо понгсь сянгонзо алов — одониянь вачкицянть икелев. «Тонавтомасонзо превстэ ливттянзат», — тешкстызе эськанзо улавонть прясо псилгалицясь ды апак тално поладызе тевензэ.
Аватне кавто пире юткова янганть ютасть тингелангсто кудов. Эрявсть симдемс-андомс ракшатне, потявтомс скалтнэ, эземга-таркава ладсемс ловсонть, анокстамс стувор. Каня лововить авань тевтне?
Цёратне тейсть эсь тевест. Чамдсть крандазтнэнь, макснесть вачказенть верев, одониянть пряс, Куляз покштянтень. Сон ёроковсто, тевень содазь путнесь таркаваст пултнэнь, цёцякавтсь одониянь прянть.
— Весе, атят-сэрдят! — меельце пултонть аравтомадо мейле, мельспародонть кенярдозь — прядовсь тевесь, — серьгедсь верде Куляз атя. — Валгстсамизь-арась?!
— Минь кудов, тон тоско, Пазонтень седе малав кадовт, — згилязь мерсь Ураень тюжа сакало алясь ды кода эряви аравтызе кувака кузтеманть. — Саты теть Инешкинть марто калярдомс, валгт!
Кардаз кузтемпесэ цёратнень учось Олдай. Турвасонзо мизолкс, сельмензэ цитнить. Прок чинь-чоп рунгояк эзь яжа. Кедьсэнзэ ведра, лавтовонзо трокс нардамо.
— Садо тей, атят! Вана тенк ведне. Лембине-лембине. Вана кечесь. Эрде валнан тенк. Шлядо-нардадо, кудос совадо!
Вайгелезэ аванть ваньксстэ гайгиця, лийканя. А стяко мерить тензэ «чольдерькай».
Васенцекс венстинзе кедькоморонзо ды ёрвалдызе ливезев чаманзо, кирьганзо азорось. Нардась-тейсь, совась кудос.
— Азёка, атя, ведьс васняяк.
Ансяк «атясь» саинзе ведратнень, од кармавтома:
— Азё васня пенганят совавтт.
— Куш весть сеске меревлить, валот аволить полавтне, — мерсь кучозесь ды калдорк путынзе тарказост ведратнень.
— Иля стувто кандомс баняскак. Вант, васня турбанть панжик! — кармавтсь-тонавтсь Элюва.
— Баняс а кенертяно. Шказо ве уш.
— Курок, курок седе, мезть вазокс лыкат. Ломантне учить, андомс-симдемс эрявить. Теня, кандта васня ведь, ведем прядовсь.
— Пту! — кежень сазь сельгсь атясь ды чатьмонезь [20] мекев саинзе ведратнень. «Кодат нерват эрявить мартонзо! Кшнинь. Сетнеяк сезевить, секень вант».
Аламос аштезь велявтсь мекев. Ведратнень эземс путомсто кавтошка пенчень туро эйстэст валовсь.
— Вант, вант, мезе теи! Саик седе курок нуланть, нардык. Эрязасто седе, эрязасто. Ломантне учить, — цянкаесь Элювань вайгелезэ.
Элюва ды Олдай лездыцязо каясть ям — сывелень, чоп каштомсо кирдезь. Эйстэнзэ мольсь тантей, судоварянь кутькавтыця чине. Чинедензэ, яла мерить, пешкедят! Виде, велень каштомсо кирдезь сывель ямдо тантей мезеяк арась.
«Те вана эрить, кизнаяк сывельде порить...» — ям ваканонть неезь, тешкстызе эсь пачканзо Юртай, судоварянзояк чинеденть кинететсть.
— Ярсадо, шабрат-оят, ярсадо, — гайгезевсь Элювань сиянь гайть вайгелезэ, ды теке марто боцк путсь шержей прятнень икелев лавкань ашо вина. — Изнявсь покш тев, кастозесь, мерть, урядавсь. Атя, тон мезе ванат, мекс а нуртнят? Теяк теть а чарькодеви...
«Те вана тев, те минекекс», — мериксэль суликанть неемстэ копордамонь вечкиця лездыцясь, ды мекс-бути эзь мере. Сон, Юртай, кода а кода Пиргужтнэнь васень нежест.
Виряз атя ливчанясто таргизе потомксонть ды пештинзе цяркатнень. Эсензэнть вить кедьсэнзэ кирдезь, стясь ды пшкадсь стуворонть экшсэ аштицятненень:
— Инешкипазось сы иестэяк максозо истямо жо менть, кодамоль тедеде! Тень кис копордатанояк. Течинь покш тевенть сявордоманзо кисэяк. Одониясо — те, мерть, утомсо. Пиземенень а пореви. Лезэкс туезэ.
Цяркатнень чамдызь.
Валонь кирдицясь ды азоравась ансяк токавтызь турвазост. Лиятне — чамдызь потмаксос.
— Я, тынь истя мезе?! — стясь таркастонзо Олдай. — Ломанькс минек а ловтадо? Истя а лади, васень цярканть эряви копордамс.
— Арась, арась, Олдакай, содат, монень симнемс а эряви. Олдакай, инжеть-важот, минек лангс илядо вано. Мезе теят, атяськак вана коське курго. Ярсадо, мезе Пазось макссь, мезе ули, — каванясь, велясь стуворонть перька азоравась.
Олдаень мелезэ неть валтнэсэ эзь витеве, варштась Виряз лангс:
...Виряз атя зярдояк эзь правтне симемканть мельга. Иезэнзэ, паряк, колмоксть-нилексть кедезэнзэ стопка саиль. Ансяк кой-кона покшчитнестэ. А вана уш комсешка ие кода ёртынзе превстэнзэ покшчинь тешкстамотненьгак. Теке араськак модамасторонть лангсо истямо — палыця ведь. Лиясто кевкстнить эйсэнзэ: мекс? Сэтьместэ, вайгелень апак кепеде яла мери: «Чарькодия: пансемс ченькс мельга — теевемс тензэ урекс, а ловомс эсь прянть ломанекс. Аволь пек уш сюпавтано превсэ, кадовозтнеяк шлявить те ведьсэнть. Те кода истя?..»
Юртай ды Куляз атя аштесть шабрацек. Пек эзть кунсоло Олдаень пеняцямонзо ды лия кортамотнень. Копордызь васенцекс кандозенть, педясть пси, тантей ямнеде корштнеме. Натой псилгадсть. Коняст ливезькадсть. Куляз атянь ялгазо, умок-умок те ульнесь, ярсамсто-кортамсто повавкшнось тувонь куяс. Эзь идеве. Сельмензэ икеле кулось. Теде, эли, паряк, мездеяк лиядо, ярсамсто кургозо содась ансяк пенч.
Нуртясть омбоцень-омбоцень. Симизь весе. Эзь кадово, кортамонзо лангс апак вано, Олдайгак. Таго калдоргадсть пенчтне. Суликась чамсь. Тень редязь, Элюва юрк совась икеле кудос. Серьгедизе атянзояк.
— Кирдть, — тошкстась Элюва поланстэнь ды венстсь аволь пешксе бутылка, — соват удало кудос ды салавине пештьсак кельме ведьсэ. Путсак икелест.
— Кодамо «ведьсэ», эйсэнзэ ведтемеяк ведь, — машнетезь мерсь Виряз атя каршонзо аштиця кармавтыцянтень.
— Мезе мерсть, сень тейть. Лавшомгадсть, а чарькодитькак, — превс путызе поланзо ды лавтовс токазь ильтизе удалце кудов.
Виряз ютась каштом икелев. Вишка кечинесэ каясь кавто-колмо пенчень турошка ведь. «Мекс манчемс ломантнень, пежетьс совсемс? — арсезевсь каштом икеле котьмамсто. — Чинь-чоп карязт яжасть, ней истя теемс. Истякак вецакавтозь седе а ков...»
— Кайсек, Куляз леляй, — мерсь азорось ярсыцятнень икелев бутылканть путомсто, — кайсек, ярсадо, илядо визде. Мекс тон, Ураень тарад, истя нусмакадыть? А?
— То-то, вант!
Совась Элюва.
— Вай, тынь овсе а ярсатадо. Тень кодамо ладозо, Куляз леляй? А тон, Юртай, мекс судот нолдык? Пештинк пекенк, — кортась Элюва валаня кельсэ, невтсь прянзо анелицякс.
Превтне лавшомгадсть — кельтне вийс совасть. Эрьвась бажась, киньгак апак кунсоло, ёвтамс эсензэ, седе паро, седе превей мель эли кодамояк куля. Кортамось та-кода ушодовсь течинь апародонть — Виряз атянь сянгсо нерьгстамодонзо.
Куляз атя калдорк путызе пенчензэ. «Весе, мон ярсавинь», — ёвтызе тень эйсэ мелензэ. Нардызе кургонзо, ахолдынзе кедькоморо сакалстонзо кши паморькстнэнь, каинзе кургозонзо ды кортазевсь:
— Те мезе, Виряз атянь нерьгстамось. Революциядо икеле, мельсэнь, те ульнесь. Эрьмезьвелень тунь од цёра ялгам, Шалань Паксяй, истя жо, кода тынь течи, усксесь пултт. Вачкасть тензэ пандошка улав. Лишмеськак, меремс, улавонть коряс. Зяро иля вачка, сыргавтсы крандазонть, прок тона чаво.
Эскели Паксяй, вети лишмензэ крандазонть вакссо молезь. Мезе, кода теевсь апарось, кияк а соды. Учить Паксяень — арась, учить — арась. Учить тингелангсояк, учить паксясо пултонь максницятнеяк. Сыргасть вешнемензэ. Муизь ки лангсто. Кись мольсь пандочаминева, мезде, паряк, сяворськак улавось. Лишмесь улавонть вакссоль, ведьметне пултнэнь алольть. Неизе тень Паксяень тетязо, вешницясь, ды пильгензэ лавшомсть, пачканзо ютась соркс. Каявсь, теке превстэ лиссь, улавонть калавтомо, пултнэнь тей-тов ёртнеме. Муизе цёранзо. Эзь лексеяк. Мазый, виев, иензэ ульнесть кемгавксово. Мезть ансяк а эрсить эрямосонть! Умок те ульнесь. Тынь, Юртайть-Олдайть, ансяк элесэ трёнкииде, Элюваяк эйкакшоль. Ламо иеть ютасть. Тынк велесэ те ульнесь, Виряз атя. Мельсэть?
— Кода эно, кода!
— Тон уш, Куляз леляй, — каясь вал Элюва, — вельть седейризксэнь ёвтнема ёвтнить. Мездеяк лиядо, паряк? Розенек-товсюронок нардавсть паксясто. Те вадря. Ней эряви кодаяк изнямс омбоце мелявксонть — пивсэманть.
— Тынь, аватне, вейкень содатадо: курок ды седе ламо. Мезе теят, истямокс Пазось човоридизь-чапидизь. [23] Ды теемскак мезеяк а эряви. Кода а капшамс, кода а таштамс, авантень эряви ливтемс пизэстэнть левкскензэ, сон пизэнь прявтось, сонензэ мелявтомаяк весемеде, — ёвтызе мелензэ Куляз атя. — Пивсэматне прядовить, эрямось — эряви, тень эйстэ ковгак а кекшат.
— Мезе пивсэманть? — апак учо пшкадсь чатьмониця Юртай. — Пурнавтано, вана кода течи, тейсынек те тевентькак.
— Виде, виде, Юртай-парочи. Шка ладяк, Элюва патяй, — поладызе кортамонть Олдай, — шка ды вейкешка, минденек башка, ломань серьгедть.
Комавтозь рюмкатнеде кортыцянть чамаумарензэ палсть валскень зорякс, сельмензэ налксезь налксесть. А меряткак, тензэ ведьгеменде ламо.
«Вантака, вантака, кодамо эрьгана, кодамо мельс тупця! Прок од тейтерь. Авань мазычитне весе эйсэнзэть, потензэ теке тодовнеть, — велясть кудазоронть прясо мельтне. — Истямо ава — мирдевтеме. Мекс, кода — содык азё...»
— Вансынек, Олдакай. Инешкипазось лезды — таргошкань ютазь, паряк, таго истя пурнавтано. Сюконян течинь сакшноманк кис. Покш тев правтынек.
Кортамось таго лаказевсь пивсэмань тевтнеде. Лаказевсь ды сеске энгамсь. Пе тензэ путсь Куляз атя.
— Те весе паро, од ломанть, — тешкстызе сакалонзо вадяшазь ды варштась Элюва лангс, — ансяк шкаяк эряви содамс. Стяма валскень чоподава азортнэненьгак, миненекак. Сыргатано эно, — видемтизе рунгонзо, лиссь стуворонть экшстэ. Мельганзо тапор-тупор стясть, кадызь озамо таркаст лиятнеяк.
Кудось општ мерсь. Элюва кундась урядамо, шлямо-нардамо. Атязо лиссь важотнень ильтямо.
— Мезть лабордат мартост зняро?! Тевтне кирьгава, тон шка ёмавтнят. Лыкак седе. Эрь, шляк кедьгетнень. А те мезе? Те мекс карсезь ботат кудованть? Мон уряд кирдян, тенсть, нула кедьстэнь а нолдтнян, тон...
Атясь мезеяк эзь мере. Ютась тарчкс пелев, юксинзе пильгензэ, тонгсь кудоютконь нурька кемть. Теде мейле кундась мерезенть топавтомо: пенчень-ваканонь шлямо-нардтнеме.
— Эряволь зярыя пандомс ломантненень, — аламос чатьмонемадо мейле ёвтызе мелензэ кедьгетнень марто котьмицясь.
— Вантака, пандомс! Кинень? Тонеть? Шабрантень минсь зярдояк мольтяно лездамо. А нетне, Юртайть-Олдайть, тененьгак кецнить — лопавтемс [24] кирьгапаренть. Сыненст лия мезеяк а эряви, — эзь вешне каршо валт низэ.
— Лисемстэ Ураенсесь ледстизе: арсинь, келя, бутыл-кинес куш максы, — ёвтынзе Юртаень валонзо Виряз.
— Вай, авакай! Ураенсесь, те злыдаресь, ярмакт веши! Содазь, симемс. Каня монсь а симдьса? Каня аламо тевтнеде? Теить — симть. Кандт мезеяк — симть. Куш куломазот.
— Вай, Элюва! Тон арсят, мезть кортат?! — мерсь Виряз ды, седей сэредьксэнь марязь, капшазь поладызе тевензэ.
«Содавлиньгак, понган истямо казямо, кельме оймес, истямо апештявицяс, каня, кодамо стака аволь уле, кадовлия эсь кужом? Вейке мельсэнзэ: тевсэ пивтема, ярмакт ды сюпавчи. Мезекс, кинень? Цёранстэнь? Авадонзо ламоксть эрьмев. Эстензэ? Од шкасто... те эно кадык. Ней тензэ кодгеменде ламо. Кинень? Мартот кандолазс? Кода ноготсот иля кайсе, эрьвань эсензэ эрямонь лувозо, эсензэ чартьчизэ. Те ков маштови, ченькс стопкадо рамсемс сявдиксэнь яжицят? Те ломанькс? Лади-арась истя тейнемс ломань марто? Вай, вай, мезес пачкодинек...» — яла ризнэсь Виряз.
«Эрьвань эсензэ эрямонь лувозо... Виряз, зяро эзь эря, эзизе чарькоде: микшницявтомо рамсицят а улить. Микшниндеряй кияк эсь виензэ, мезде илязо уле, мекс а рамамс? Берянь, седеень а марямо? Виде. Истя. Ансяк ков ношкстат те «берянденть», бути те сонсь эрямось?» — арсесь эськанзо Элюва.
Шказо чарась пелеве малава.
Тевтне, окойники, прядовсть. Кудонть пештизе каштмолема, кона кортась икеле кудосо понгавтозь частнэнь кельсэ. Шкань-шкань та-косто аксялдо лездась тенст цирниця пшти вайгельсэнзэ цирькунось. Элюва сынст эзь маря — удось ламо тевень теицянь, сизицянь домка удомасо.