Янгамо (2006)/Ламбамо нартемкс/4
| ←3-це глава | Ламбамо нартемкс (2006) by , edited by Рябова Л. А. 4-це глава |
5-це глава→ |
| Нуянь Видяз. Янгамо. Келей ёвтнема, ёвтнемат, тешкст. — Саранск ош, 2006. — с. 34—48 |
[34]
— 4 —
Мелесь — ютамс базарга — совсесь Элювань превс аволь весть. Сы — туи, сы — туи. Истят уш сынь, мельтне. Акирдевикст. Эрявсь тов пачкодемс аволь эсь прянь невтнеме, аволь сельмень микшнеме, тевень тееме — содамс, кодат ды кона ёнов айгить сюронь, васняяк, ды лиянь-мезень питнетне; содамс, зярдо ливтема розенть ды товсюронть, зярдо суронть; ён миемс сюронть почтсо эли апак яжавто. Истяяк эрси: кадсак тундос — арсят, седе ламо саят кисэнзэ, лиси мекевланг, ансяк ёмси утомсо кирдезь. Покш тевесь — кастомс-урядамс, аволь вишкине — нолдамс кастозенть тевс. Нолдамс варма мельга иень перть таштазенть, сень, мезе макссь Норовавась, — превть а эрявить.
Меремс видьстэ, ульнесь мелезэ — кадык эрясь сон потсонзо кекшезь — лисемс ломань юткскак. Иезэнзэ куш весть стувтомс эрьва чинь эвтематнень, кудоютконь ботамотнень, варштамс, марямс лия ломанень вайгельть, ковгак а капшамс, ёролдомс ды ютнемс тия-тува.
Сундерьгадозь, стадань новолемадо ды чокшнень тевтнень теемадо мейле, Элюва ютась Олдайнень. Самозонзо азоравась кенерькшнесь пирестэ совамо. Анокстыль ськамонзо эрицянь стувор — кши, куярнэть, апак ватксе пидезь модамарть.
— Шумбрачи, Олдакай! — мизолдозь, теке вечкевикс ялганстэнь, гайгиця вайгельсэ пшкадсь стуворонть перька котьмицянтень.
— Шумбрат, шумбрат, Элюва патяй, — текень арсесь совицянтень Олдай. — Озак, каванятан.
— Арась, Олдакай, а карман ойсеме, шказо, несак, — ве. Ярсак, иля вано лангозон. Мон сынь мельгат.
— Иля тално. Аволь нейке. Вандынь чиденть кортан. Вандынень эряват. Атянть марто прынек мельс молемс Кочкурбуев, базаров. Умок араселинь. Превсэнь талай кирдян, лисемс кодаяк а лисеван... Валскень тевтнень минсь тейнесынек, чинь — кортасынекак кода-мезе.
— Монь ванды тейтерень чиявтомо, свадьбас тердимизь... — валтнэнь нильнезь ёвтызе тувталонть Олдай.
— Те кие чаулась, сёксесь тензэ эзь учово?
— Покшкарень Ашаень цёразо.
— Покшкартне, теня... кона ёндо теть малавикст?
— Кода меремскак а содан, — кавтолдозевсь Олдай. — Нилець кирдань.
— Сестэ а мезть якамс. А мезе теть тосо теемс. Бути сельметь тетьксемс? Ваномс, кода симить-каванить? Монь койсэ, мезеяк паро Покшкартнень кедьсэ а неят. Сак, иля арсеяк, монень. Кортазь шкаванть ульть монь кедьсэ, — кармавтыця вайгельсэ лодорсо певердсь валонзо чокшне ланга якицясь, — свадьбадо берянь, содат, а ули. Кода?
— Чинзэ лисезь, мерят? — арсезевсь, одс кевкстизе Олдай, кепедизе кедензэ ды нежедизе сурсо алце турванзо.
— Чинзэ лисезь.
— Паро. Кортынек, — шождасто таргизе оймензэ азоравась.
Аватне аштесть стуворонть вакссо карадо-каршо ды кортазевсть лиядо.
— Куярот ламольть тедеде? — кевкстизе Олдаень Элюва.
— А пеняцян. Ульнесть. Кавто «породань» виднинь. Вейкесь уш пек пароль. Видьмекс кадынь. Прок ожо тулевкскеть аштить пандянть лангсо. Шкаст куяртнэнь ютась, лопаст тюжасо вельтявомо кармасть. Кода эсеть?
— Ды истя жо. Монь помидорон тедеде ламо. Кенерить-арась — а содан. Паро, эзть наксадо. Лиясто ацазь пандятне эрсить. Ну, арсят, а ков теемс улить. Я! Мезеяк а кадови. Весе наксадыть. Васня таркаваст путнесыть, мейле мекев ливтнек. Мон яла пижестэ салтнян. Учок, зярдо кенерить.
— Моньгак, Элюва патяй, вадрят. Монгак текень жо тейнян. А кенерить — салтсынь. Телесь кувака. Весе пурнасынзе. А кочкси.
— Виде, виде, Олдакай-парочи. Ламо тензэ эряви.
[36] Истя каляказь, лиссть ушов, кузтемпес. Явовомадо мейле Олдай серьгедсь туицянть мельга:
— Виряз лелянень пельдень сюкпря!
— Паро, паро, дугай! Ёвтан.
...Стясть нить-полат, кода свал, чоподава. Ашолгадозь оймсемань асодыця Вишкайня потявтынзе скалтнэнь, педизе ды кайсизе кедьгева зярс лембе ловсонть. Кундась кувака килангов пурнамо-сэрнямо. Эзь лужале, тейсь валске мартонь тевензэ атяськак: симдинзе, каясь ярсамка лишметненень, урядынзе кардост, каясь товт саразтнэнень, меельцекс тенсизе кардазонть. Мезть кортамс, каня лововить тевтне? Теде башка — кизэ. Паксят, лугат, вирь... Ансяк веляк. Ниськак а-я-яй! Вейкень соды, сеяк рузокс: «Давай-давай!»
Путызе ужос калксеманть-тенстенть, таргизе кузтемалдо дёготь марто парненть. Кундась крандазонь чаротнень ваднеме.
— Тикше каить крандазонтень? — дильнезевсь кузтемпестэ Элювань вайгелезэ. — Истя арсиньгак: монстемень... толга а кепедят. Куш кортак ломанентень, куш иля!
— Каинь, каинь, — сэтьместэ, ёнкстамонь апак сода кемевтизе музгордицянть чаронь вадницясь.
«Мезть мартост педсемс, — эськанзо поладынзе валонзо, — вейкеть сынь, тапарязь прятне. Тонась ки эзь максо «тонавтомасонзо», теяк теке. Мик валтнэньгак вейкетьстэ чевелить: таргазь, вешкезь ладсо, пачкодест седейс. Истяяк мереват: сынст чикордомавтомост — ламот мерить, онгомавтомост — цёраломанесь, секень вант, ёмаволь, рудаз потс ваяволь. Сынь, аватне, кармавтыть чеерень кундсеме, сынтемест атяка псакакс теевлинек. Покш тевтнень, а мезть сёпомс, цёрась сяворды, а вана вишкинетнень — козонь пракстат понгавтомс, козонь пенченть, ваканонть путомс, мельгат койменть, цёканзюронть, муворонть — тевекс а лови, ваны лангозост мельде-валдо. Аволь вейкеть, содави, цёратнеяк, ялатеке аватнень марто иля пелькстне, носкт ды тейть эсь теветь. Каят вал, каршот — кемень...»
Кардазъютконь азорось тонгизе меельце ваднезь чаронть ваднезь петькелентень, нерьгстызе чекушканть, нардтнинзе коське тикшесэ кедензэ. Сайсь сянго. Топавтызе нинзэ меленть — каясь крандазонтень экшесэ качадыця пиже тикше. Таргась эй кельме ведь, пештизе пелевидьга лагунонть ды вельтизе, илязо эже, тикшесэнть. Чись кувака, валскесь алтни пси, улезэ мейсэ явавтомс симеманть.
Лиссть стувор экшстэ.
Элюва таргась горобиясто од покай, цёко марто пижестэ артозь каркс ды лия оршамопельть.
— Мазыят, — эзь кирдеве, мельспародонть муст-муст пейдезь, мерсь Виряз атя, эрзякс, умонь койтнень коряс оршнезь Элюва лангс ванозь, — пангось ды пулаесь теть вельть молить. Теке сэрьс касыть. Одирьва...
— Саты, саты... Прок васенцеде несамак, — аламнеде визделгадсь Элюва чавачамонть икеле чаразь. — Тонгак оршак ванькс панар, оно анокстыя. А пежеть, чуродо весть листяно ломань юткс. Истя, атя?
— Истя, петя, мазыйнем.
Калдорк — марявсь кудыкельде. Панжовсь кенкшесь, ды тарчксонть трокс эрязасто эскельдясь Шорянь Олдай.
— Вай, авакай, ды тынь а содавтадояк! Аволь венчамо сыргиде? Допрок од ломанть! Виряз лелянь пракстанзо, панарозо ловдояк ашот, — пеедькшнезь ветердсь, прок кансёрот чулгсесь, совицясь.
— Неть «одтнэнь», Олдакай, шказо латкс сявордомс, — полавтызе кецнемань кортавксонть Вишкайня.
— Истя иля корта, Элюва патяй, пежетьс иля совсе. А мезть «латкодонть» шкадо икеле ледстнемс. Сонсь сы, апак терде... Кодат кармавтомат тень кармить?
Аватне каштом икеле кортнесть чинзэ перть теема тевтнеде. Шкась таркасонзо эзь аште, эрявсь капшамс.
Кардазонь келей ортатне панжозь келес. Тештине таркасонзо а аштеви, чави пилысэнзэ, учи келей ки лангс нолдамонзо.
Аламос учозь лиссь Элюва. Кедьсэнзэ юдмине ды та-кодамо тапаркс. Мельганзо — Олдай.
Вансь Виряз, ды кодаяк эзь саеве лангстост вановтозо. Прок васенцеде несы эриялганзо. Ашосо прясто пильгс. Лавтов ланга, мештева ды руцянь алга чирева якстерть-раужо викшневкстнэ седеяк ашолгавтыть оршамопельтнень. Аволь покшке — а сэрьс, а келес. Кирьксаня чаманзо мазылгавты валдо, мельс туиця мизолкс. Кода эрьва аванть мазылгавтыть мизолкссо налксиця турванзо! Зяро кенярксчи улевель модамасторонть лангсо, авольть содаяк аватне потмура чить ды сынст марто сюлмавозь сёвномат-ацирьгалемат! Ве ёндо ванозь, кодгемень тензэ кодаяк а максат. Олдай а стяко тешкстызе: «Аволь венчамо сыргиде?»
[38] Элюва путызе кансткензэ лагунонть ваксс, вельтизе тикшесэ; озамо таркаванть, тикшенть ланга, ацась чапан; чалгась удалце чаронь чекужанть лангс ды ливчанясто кузсь-озась крандазонтень. «Сы иестэ, тельня, а стувтса, раман тарантас. Те ков истя маштови — ридвансо базаров?! — ций-буй ютась пряванзо мелесь крандаз ирдезтнэнь юткова пильгензэ нолдамсто. — Пильгень допрок раужкадыть. Питнезэ, каня, зяро? Сти, пелян, ламо... Теяк виде: ков тарантассонть кармат ардтнеме, кува? Мон чей аволь Паксютычан. Ялатеке рамамс эряви. Питнезэ чей аволь лишмень питне. Ней прок сюпав боярт ардовлинек...»
Чипаесь, зярс пурнасть-сэрнясть, анеявикс кузтема-ванзо кенерсь куземе Пиргужонь каршо эрицятнень лато пряст видьс. Менелесь — сэнь баяга. Кадовсть ды арсить, кона ёнов сыргамс, мезе теемс седе тов, ашо-сэнь алкс пельнетне, Варминень сульть а маряви.
Эрьмезьвелесь ютавсь. Тештинень панемс а эряви.
— Маней, паряк, а туи пиземе, — колызе чатьмонеманть Элюва.
— А туи, — оймавтызе кавтолдыцянть атязо.
— Кемат?
— Кеман, вельть ведьповсо лопатне вельтязь. Те, кортыть, манейс.
— Улезэ тонь ладсо. Лисиндеряй лиякс, копачамс ули мейсэ — алганок чапансонть. Чись кувака, эрьва мезть эрсить.
Чатьмонезевсть.
Кадовсь удалов пекстазь, крёсттомо церьковась, ахолдась сёлмосонзо ведькевесь, ёмась чувтнэнь потсто эль неявиця калмазыресь. Кись тусь аловпандт, куроксто поладовсь вандора пандочамава. Валскесь маней. Маней, пертьпельксэнть лангс ванозь, седейсэнтькак.
— Сыргамстонок, зярдо Олдай марто, прок ашо локсейть, лисиде кузтемпес, ванозевинь лангозот, — видькстась Виряз атя нинстэнь. Лишменть эзь эрязкавто. Крандазось эзь калдордо, эзь сорновтневе.
— Мейле мезе? — пейдезь ладсо, згилязь ёвтынзе валтнэнь вакссонзо аштицясь.
— Мезеяк арась. Истямокс васенцеде неитинь...
— Оршнезь? — раказевсь Элюва. — Тонадыть, сыре атякш, ванномон апак оршне! У-у-у, визькстэме!
— Прок пейделька ашолдыть кузтемпесэнть. Алкукс. Ёвтык, мезе истямось вечкемась? А? — абунгавтызе аванть апак учонь кевкстемасонзо Виряз.
— Вай, авакай! Тон, сыре панго, маряви, сырнеме [39] кармить. Кандолаздо эряволь арсемс, сон оно мезде ушодсь. Од шкат сась мелезэть? А содасак течинь чис, мезе те истямось? — валсо сялгизе кевкстницянть.
— Ужо, ужо, иля пейде. Ёвтык, эрь, ёвтык, — кармавтсь Виряз. — Тон арсят, шожда ёвтнемс?
— Вечкемась, полай, — апак пеедькшне, арсезевезь ушодсь Элюва, — вейсэ важодема, улавонь вейсэ ускома. Самай сон, те ускомась, малавгавтыяк ломантнень. Од шкасто, содави, лиякс арсекшнинь, ней вана, сыредезь...
— Ужо, ужо! Тонь коряс лисни, вейсэ важодиця кавто цёратнеяк вечкезь эрицят, истя?
— А тов, атя, мурдыть. Важодемадо башка цёрань-авань тевтькак ютксост улест. Кода эно... Кода тонсь чарькодьсак вечкеманть? — поладызе кортамонть Элюва.
— Истя: вечкемась — тундонь чадыведь, шалны-теи таргошка ды скими, карми чудеме сэтьме чудемасо. Эрсить кизнаяк талномат. Виев пиземеде...
— «Сэтьме чудемась» — те важодема, вейсэ улема. Истя? — нерьгстызе кенерепакарьсэ бокас низэ. — Велувс прынек, текес.
— Тонь теке морот — важодема. Виде. Ансяк сэтьме чудемантень эряви нардев неже — эйкакшт. Сынтемест... — Виряз эзинзе прядо валонзо, чатьмонезевсь, ледсть мелезэнзэ Валдоня ды Лияна тейтерензэ, конатнень некшнесынзе пек чуросто ды конатне свал седейсэнзэть, сакшныть истят ёжоткак — прок кулость.
— Тонь вана те нежесь сяворсь... Мекс эзь лезда? — сезинзе арсеманзо Элювань пшкадемазо.
— Мекс, мерят? Тона нинть марто эрямодон содат, ёвтнинь а весть. Нежем нардев ульнесь, эйкакшон лангс пежеть пеняцямс. Нежесь а чумо. Монсь лавшолинь, монсь. Нейгак, содазь... Мезеяк а теят, авам истямокс чачтымим: потамосо эсь прянь идицякс. Арсинь, туян лиянень, лиянть кедьсэ эрьва чинь сёвномат а улить. Понган валдонь масторс. Бажамотнень келейть сёлмост! А стакаль неемс, мезес ветясамам кудонь кадомась. Зяроксть марсия: «Тосо вадря, косо минь арастяно». Арась, сестэ, тонь марто васень вастовомастонок, теде эзинь арсе.
— Янксят? — казямосто кевкстсь авась. — Кенкштне панжадот, а кирдян.
— А кирдят? Кирдят. Варштынь течп валске лангозот ды мерезевинь эсь пачкан: «Няка!» Кирдят, дугай, кирдят. Ков неи туян, сисем нень перть вейсэнь [40] эрямодо, важодемадо мейле?! Сисем иеть чинек-венек... Ней жо — ды те аволь васенцеде — «кенкштне панжадот».
— Сестэ чатьмонть!
— Таго сёвномас прынек...
Удалов кадовсь покш, лей чирева сравтневезь Веждейвелеськак.
Кинть кавто ёнга ожолдыть — таркань-таркань апак нуе, седе ламо копонясо — товсюронь, суронь, вишень умат. Умарьков. Самай нуемань-пивсэмань шка. Анокстамонь, таштамонь ков. Видемс стака, седеяк стака урядамс кастозенть. Тевтне кемексть ламолгадыть.
Апак учо Виряз атянь мельс ледсь тундонь, видема шкань чи. Уманзо видемстэ каятотсь велькссэнзэ менелень сэнь отьмастонть баягинень вайгель. Ль-ль-ль... — нурьгезь нурьгсть ванькс, сиянь жойть гайтне. Кепедизе — стувтынзе тевензэяк — прянзо, бажась неемс сэньстэнть кеняркстонть элякалиця нармунненть. Талай вансь. Окойники муизе. Оно ков кузи редямганзо, менель тёкшкес! «Ванодо, ванодо, косан», — яволявтнесь норовжорчось морынесэнзэ. Састыне, истя жо моразь, валгсь седе алов ды, зярдо моданть мештес кадовкшнось аламо, празь прась тикшесэ вельтязь маласо лей чирентень. Нармунненть кондят ломантнень ютксо тевтнеяк. Кузеват верев — кармпть ломанькс ловомот, мелеть ваномо, кунсоломот. Кие ломанькс а путсы Паксютычень? Элюваяк мик... Эно кода, сюпав. Эрьвась бажи савтомс тензэ. Кадоват алов — кияк а редятанзат. Кияк! Теяк виде: валгомскак эряви моразь.
Лишмесь сыргозтизе ветицянзо арсематнеде. Маризе, олякстомсть ведьметне, ды лиссь крандаз чаронь кикстнэстэ.
— Ков, ков?! — рангстась, мик лишмесь тандадсь, Элюва. — Каня а неят? Мезень кис кедьсэть ведьметне?
Виряз ноцковтызе вить ёнксонь ведьменть. Якстерть-тюжа Тештине паркстась ды луньк-луньк тусь ардозь. «Сестэль, атя, тундо, ней сёксень нувсемат, секень вант, ушодовить, варакань «ка-а-ардо» башка мезеяк а марят. Ютась тундось...» — поладовсть ледстнеманзо.
Пачкодсть Сэняж лейс. Ансяк, мерема, лемезэ лей. Чудикерькс. Сэдь вельксканзо арась. Чирензэ вандорат. Кись юты троксканзо сэдтемеяк. Ютамо таркадонть башка Сэняж а неявияк — чиреванзо каль куракшт.
Виряз лоткавтызе лишменть. Атякс, апак капша, састыне валгсь таркастонзо, олякстомтызе трокс [41] пикскенть ды нолдызе Тештинень симеме. Лишмесь симсь цёрсо, мерят, чи ды ве эзизь симде.
— Симемат сась? — пшкадсь Элюва поланстэнь.
— Нуртяк аламошка.
Авась штавтызе лагунонть. Таргизе потомксонть. Каясь кечинес ведне, копордась сонсь ды венстизе Вирязнэнь. Тона кечиненть чамдызе потмаксос.
— Та-а-антей ведеть, свал улевельгак истямо, — эзь арсеяк Виряз, кода скирдызе каваницянзо. — Мерть, кинек пелезэ удало.
— Тон седе эрязынестэ маштат?! Капшамс эряви. Мезень лезэсь чикуншкава самодонть? Чарак седе!
Виряз марикскак эзь тее. Учизе, зярдо Тештине прядсы симеманзо, кепединзе ажиятнень, сюлмизе трокс пикскенть, озась тарказонзо ды сыргасть седе тов.
Кинть кувалма раужолдыть теле лангс видематненень анокстазь модат, кува-кува сыреждить апак нуе сюронь умат. Седе тов, вить ды керш ёнга, ванстыть неть тюстнэнь вирень пирявкст. Курок сы сёксесь ды лексти лангозост ожо коштсо; лексти ды кайсевтьсынзе кизэнь мазычист.
— Таркатне кодат мазыйть! — сельмень сявадозь мерсь Впряз.
— Улевлинекак минь истят мазыйть, — пеняцязь, мезде-бути мелявтозь путсь валт Элюва. Теке басом чевтень кис шикадсь кутьмерензэ алов тикше сэльне, кепедизе чапан пенть ды нежедсь теезь «тодовонтень». Нолдызе мештезэнзэ прянзо ды снартнесь сутямомс.
Истя пачкодсть Пелевелес. Лемдезь истя а стяко. Вишкине вельть. Комсешка кудот. Эйстэнзэ саезь кадовить Кочкурвелес кавто-колмо вайгельпеть. Видеяк, куроксто вастовсть те покш веленть пекстневиця вальма прок удыця — кудонзо марто.
Пиргужтнэ састь шкастонзо. Келей совамо таркантень апак пачкоде — нурсемат, карусельть, налксемат.
Эрьмезьвелень «сельмень микшницятне» ютасть карусельтнень-мезтнень вакска, сайсть керш ёнов, тов, козонь лотксить лишмесэ сыцятне, косо човолось.
Базарось ансяк кармась совамо вийс. Морасть атякшт, парасть реветь, скалт, цяхасть лишметь. Косо-бути киштеме тердсь гармония. Микшницятнень вайгельдест сорнось базаронть велькссэ коштось. Эрьвась шнась эсь товаронзо. Кодамо кельсэ кортась ломанень те кашкиця, ламо вайгельсэ рангиця пизэсь, сонсь содась. Кедень кемть, понань кемть, панарт, понкст, книгат, ленгть, карть, почт, пангт, эскть... Мезе тесэ ансяк арась! Ванат — сельметь кадовить.
Пельсь Виряз, туиндерят, илизь кильде ят ломанть лишменть.
Текеде мелявтсь Трошаяк. Вастовсть, шумбракстнесть-тейсть ды прасть мельс ванстомс вейкень-вейкень полавтнезь. Троша те лувонть лиякстомтызе.
— Монень а мезть тува якамс, цёран якить. Секскак тезэнь кадован. Ютак азё.
Сась Элюва.
— Варштынь ланга-вакска. Шумбрат, Троша! Вантака, кода ладс лиси. Лишметь марто тон?
— Кода неят, — путсь вал Троша.
— Минь уш кортынек, — ёвтызе Виряз. — Адя ютатано.
Васня полатнить ютасть кудоютконь кедьёнксонь ды кедьгень куронтень. Эрявсть рамамс пицькат, сапонь, аламошка эскть.
— Зяро питнест вана нет пицькатнень? — ушодсь Элюва.
Ёвтызь.
— Вана нетнень?
Ёвтызь.
— Зяро пицькат те кувтынесэнть?
Ёвтызь.
— Тень эйсэ?
Ёвтызь. Казямо вайгельсэ.
— Зяро лиси ве сардыненть питнезэ?
— Ловинк.
— А вана те кувтань ве сардыненть зяро питнезэ?
— Саик ды ловик!
— Монень кемень кувтат.
— Конатнеде?
— Вана нетнеде.
Микшницясь ёвтызе питнест.
Ёвтызь, зяро пандома.
— Вай, вана нетне седе мазыйть! Эрде нетнень...
Окойники те товарось рамавсь. Истя жо кевкстнезь, ваннозь, безардемас пачколезь, рамасть сапонь, эскть.
Мольсть сюронь микшнема куронтень. Эйстэнзэ ламо.
— Зяро вешат? — пшкадсь Виряз товсюронь микшницянтень — ашназа тюс, кувака судо, ваньксстэ наразь чама бурина цёрантень.
— Кода теть меремс...
— Аламо, аламо, — тешкстызе Элюва. — Мекс истя, кода арсят?
— А мезть арсемс. Содасак тонсь, кодат тедеде товсюротне ульнесть — гуй а ютави, — ёвтызе мелензэ микшницясь.
— Эзик варчне Сурошов ливтемс? Тосо, келя, седе питней сюрось...
— Арась, тов эзинь пачколе.
Апак капша, ваннозь, ютасть розень микшнема таркантень. Тесэяк ули мезе саемс.
Элюва нерьгстызе ве кескавонтень, зярс нерьгставсь, кедьлапанзо. Пштистэ ды талай вансь коморсонзо эрьгана товтнень лангс. Каясь колмо-ниле пей лангс, арсезевсь. Аравтызе коморонзо судонзо алов: никсти — прянзо кепедьсы, никсти — таго кепедьсы. «Паро, мезеяк а мерят!» — тешкстызе эськанзо ды каинзе товтнень мекев кескавс. Нерьгстызе кедензэ лияс. Таго ваннось-никсесь. Меельцекс шождынестэ таргизе оймензэ ды мерсь:
— Ва-а-адря сюро ливтить! Зяро вешат?
Аволь сэрей, кокша пря, якстере чама алясь седеяк якстерьгадсь мельспародонть, шнамо валтнэде. Ёвтызе питненть.
— Аламо, цёра, аламо. Истямо товаронть кис... — эзинзе прядо валонзо Элюва, арсезевсь: «Моньгак а берянь розем, истямо питнеде, арсемскак а мезть, а максса».
Тоско жо, розень микшницянть вакссо, торговасть почтсо. Тесэ седе ламольть рамсицятнеде.
Элюва кевкстнесь-исковась, ваннось, пижнесь, чевелясь, пелькстнесь микшниця цёратнень марто. Виряз седе ламо чатьмонсь. Содась, рамамо низэ мезеяк а карми; сонензэ эрявить содамс питнетне. А вана салтозь куяронь партнень икеле пельчасонь перть аштемазо превс кодаяк эзь саеве. Эзть юта карень куронть вакскаяк. Тень мезе питнезэ, тонань? Те мекс истямо.
[44] ... тона? Вирязнэнь марявсь, пе а ули. Ютызь базаронть весе. Лотксесть, козонь варштамскак аволь эряво.
Окойники пачкодсть лоткамо тарказост. Троша шабраст чинезэяк арасель.
— Вай, те кода истя? — вайкснезевсь Элюва ды, теке нарвицька, кармась чарамо крандазонть перька. — Вадря куш мезеяк эзть сала. Кемть вана ломантнень лангс. Вантака, мезе теить!
— «Мезе теить»... Тонсь чумось — лытыть келеть лисемс, — «озавтызе» вайксницянть Виряз. — Мезе ней, чоп тонь учомс?
— «Чумось», «чумось», — ацирьгадсь авась пупсемань валтнэнь марязь. — Учомаль уш зярояк. Теня, адяка арбуз раматано, оно, овсе маласот.
Раужо, прок дёготь, менчевезь черь васолдонь цёратне тевень аразде автнесть арбузост вакссо кургт. Рамицятнеде аламольть.
Элюва рузкс кортамо эзь машто. Савсь атянстэнь кундамс тевентень.
— Арбузик нам.
— Катор?
— Ды вот этот, — венстизе кедензэ чопода-пиже, суликакс цитниця арбузонть пелев.
— Те вельть покш, — кардызе Элюва.
— Сэвеви, иля пеле.
— Покш, покш, — эсензэ содась авась. — Содат, зяро сти?
— Иезэнзэ весть. Иля уле зобнякс.
— Арась, арась, те а эряви, — эзь арсеяк потамо Элюва.
— Вон тот подай, — Виряз невтсь сурсо лия лангс. — Нет, нет, вон тот. Ага, этот.
Микшницясь путызе невтезенть онкстамс.
— Чытырь килограмм, дарагой, двести грамм.
Элюва а неемга шикадизе атянзо бокас:
— Каня а неят, кодамо покш? Седе вишкине саема. Седе аламо пандома. Адяка оно сень, шабранзо арбузтнэнь варштасынек. Паряк, сонзэ седе вадрят?
— Адя. Кочкак тонсь, — эзь кирдеве Виряз, кепететсть тортанзо.
— Монстемень теяк теть а тееви. Яла мон ды мон, — эзь кадово, пизякадсь Элюваяк.
— Взвесь вон тот, — пшкадсь Виряз атя муюков, чентязь чама тунь од цёрантень.
— Три с половиной кило.
— Те ков истямонть, мокшнатттканть? Те мезень арбуз?
— Ровно четыре кило двести грамм, — ёвтызе чентязь чамась.
— Мерть, кадык пельсы. Паряк, ярсамскак а маштови... — ледстизе безарькс кочксицясь.
Муюков микшницясь ливчанясто саизе арбузонть элезэнзэ ды пеельсэ пельсь варине, невтизе таргазь палнэнть.
— А туи. Аволь пек якстере. Лия кадык онксты, — таго эзь туе Элювань мельс.
Эзь кемевеяк: мезе эрявсь, сюк Инешкипазонтень, кочкавсь. Виряз кавто кедьсэ лепштизе ине рамавксонть мештезэнзэ. Элюва сорныця кедьсэ — ланга илязо максово — ловнынзе ярмактнень ды венстинзе микшницянтень. «Ван, илязан маняво!» Сыргасть лоткамо тарказост.
Виряз атя кильдизе Тештинень. Сэвтнизе, кавшакавтызе крандазсо тикшенть. Витнизе озамо таркаст.
— Ве тевем эзь тееве, эзинь вастово Паксютыч марто, — кортазевсь Элюва, седе ламо эсензэ кис, крандазс озамсто. — Эзинь — эзинь, мезе теят...
— Шумбратадо, эрзят! — теке маней чистэ пурьгине, ве ёндо каятотсь содавикс эчке вайгель. Авась кепедизе вановтонзо ды абунгадсь — эйстэст аволь васоло кияванть ардсь Паксютыч. Косоль, мекс эзь неяво базарсо, — эзь чарькодеве. Сон ахолдась кедьсэ ды лоткавтызе тарантасонзо, мурдась Пиргужтнэнь ёнов.
— Кода шумбрачись? Кодат тевтне? Базарось тусь мельс? — мизолксонь пачк, паро ёжосо пшкадсь Паксютыч ведьметнень кирдезь, тарантасстонзо валгомадо апак арсе. — Капшан, Элюва сазорнэм.
— Шумбрачи, Паксютыч! Сюконян валозот, — кенярдозь, цельця тейтерекс серьгедсь каршонзо Элюва, вановтозо педязь педясь ваксозост лоткицянть чачос. — Базарось базар, улест ансяк ярмакот, рамак, мезе мелезэть туи. Минь сакшнынек сюронь питнетнень содамга...
— Кодат? — каясь трокс вал тона.
— Товсюрось аволь питней. Ламо. Эйстэнзэ почтаськак... Монгак те таргостонть — Пазось максындеряй — пивсэман прядсынь, базардояк карман арсеме. Кадномс а мезть, питней-аволь — миема. — Кортась Элюва тевень содазь, сэтьместэ, прок умонь паро ялганзо марто.
— Зяро тонь пурнави? Зяро лангсо кучомс? — валонь апак ёмавтне, нурькинестэ ёвтызе рамамонь мелензэ Паксютыч.
— Сеске а ёвтави. Вана пивсэсынь...
— Истя улезэяк. Кучса.
Виряз эзь правто валгак. Кирди ведьметнень, анок сыргамо. «Зярс кармить лакштордомо?!» — велясь превсэнзэ.
— Илямизь чумондо, капшан. Но-о, Чентяй! — атясь нолдынзе ведьметнень, ды алашась ноцковтозь ноцковтызе тарантасонть — «экипажонть», кода пеедькшнезь мери Паксютыч. Мельганзо кепететсь челькень сув.
— Эрсить, вантака, истят тюнихат. Прок мода потсто лиссь. Вантака!
— Иля котно, — алгаст тикшень ацамсто, чапанонть келейстэ сравтнемстэ кардызе эриця ялганзо атясь, — озак седе парсте. Истят тамашат лиснесть мартон а весть.
— Кода?
— Истя. Арсезеват ломанденть, варштат удалов — сон палманькс ашти. Эрсесь тонь истя?
— Сеске а ледстяви, — мерсь авась.
Базаронь эрямось — нурькине эрямо. Пурнави, лаки-теи, ды велькссэнзэ шалтось, вант, ушоды энгамомо, куроксто срады допрок. Те пораванть, самай оймамо шкастонзо, Пиргужт сыргасть кудонь килангов.
— А маняват? — талай чатьмонезь ардомадо мейле атясь велявтызе прянзо ды пшкадсь нинстэнь. — Питнетне тундо ёнов куземе а кармить?
Чатьмонема.
— Те виде. Иляк стувтне лиянть: сюронь ванстомга кой-мезе эряви. Васняяк, паро утомт. Сынь монь... Вансынек. Паряк, видеяк, витневтьсынек? — колызе каштмолеманть Элюва.
— А берянь ули истяяк: пелешканзо сюронть миемс ней базарсо эли Паксютычнень, омбоце пельксэнть кирдемс тундос, — превть макссь Виряз атя.
— Тонськак а содат мезть кортат! Весе максса, видьмеде башка, Паксютычнень. Весе. Товнень пес. Кортазь.
— Тон прявтось, вант. Тунда, кизэнь ушодомга питнетне ялатеке кузить, — омбоцеде ледстизе Виряз.
— Тундос, атя, эрямс эряви. Истя?
— Лиякс тонь а эри...
Виряз содась, пелькстнемс, видеяк, те дошуз аванть марто а мезть. Кодат ильведькст иляст лисе, теи мерезенть ладсо. «Кшни», — яла мери сон эйстэдензэ. Кшни а кшни, сеедьстэ лисни мекевлангкак — [47] валонзо полавтсы кеменьксть: весть мери истя, мельганзо — лиякс.
— Каня а виде? — пштистэ, прок уро, пшкадсь атянстэнь. — Аламошка Эстенекак кадтано. Утомтнень эрявить анокстамс. А содат, зяро кескавонок?
— Арась.
— Истя арсиньгак. Тон мезеяк а содат, мезеяк теть а эряви.
Виряз чатьмонсь. «Ветердть, ветердть, сядоксть маринь неть валтнэнь», — ве ёжопоназояк эзь стя.
Прядовсть валонзо «ветердицянтькак».
Каштмолезь, чаротнень кортнемаст кунсолозь, пачкодсть Сэняж лейс. Виряз икеле ладсо симдизе Тештинень, ды поладызь кист седе тов, кудо малав. Перькаст некеть пиже-ожо ды раужо тюстнэ, сёксень ормасо токазь, пельтеме оланясэнь менелесь. Ней лия ёндо, кутьмерьс вансь якстере, прок ацирьгадозь, мадемадо арсиця чись.
— Хи-хи-хи, — апак учо сиянь горниповнекс чольдерьгадсь Элювань пейдемазо, — ледсть мелезэнь чияк, базаров ардомсто ёвтазь валот. Тон мерить: вечкеманть чадыведекс жойнемадонзо мейле вечкезь эрямонтень, ну, кода меремс, улезэ неже — эйкакш. Кортыть?
— Кортынь. Мейле мезе?..
— Мезеяк арась. Мон истяко, — ды таго муст-муст пейдезевсь. — Арсят, лия «неже» кодамояк а эряви?
— Кодамо?
— Я! Ды тонь дух чартьчить арась! Эрьга-эрьга, превтнень кильдить, — лепштясь Элюва.
— Мезде тон?
— Седе мон, Арсят, велькс потсо элякалематневтеме паро эрямо лиси? Явовомат а улить?
— А-а-а, тон оно мезде, — мизолдозь, прясонзо нулновтнезь, кувакасто таргинзе валтнэнь ветицясь; аламнеде, ансяк коензэ кис ильмештизе Тештинень ведьметнесэ. — Но-о-о, аволь ковгак — кудов ардтано!
«Кудов» валонть ёвтамсто Виряз маризе умонь пуворьксэвть. Кавксоце ие эри-ютавты Элювань кедьсэ. Маряви, умок уш тонадомаль — ловомальть сонзэ кудотнень-читнень эсензэкс. Эрямаль, прок эсеть кудосо. Зяро кедь вий путсь те юртонтень, зяро эрьва кодат майсемат ульнесть, паксянь-лугань зяро тевть теезь неть иетнень перть! Мезеяк эзь лезда. «Те аволь монь» валтнэ потстонзо кодаяк эзть нардаво. Свал мари эсь прянзо инжекс, зярдо а зярдо кадсы сон те пизэнть, каясы ойместэнзэ «аволь монь» кевенть. Кодамо илязо [48] уле од шказо, икелень нинзэ марто эрямозо, кудонть, косо чачсть-кассть эйкакшонзо, косо ютавтынзе эрямонь ламо иензэ, ловсь эсензэкс.
Кудов капшицятнень перька салава морась моронзо сёксенть пельде пешксесэ якиця кизэнь чись. Педе-пес апак уряда паксятнень велькска, сёлмосонзо чуросто ахолязь, велясь — чеерть мучкась — вадов. Эрьвань эсензэ мелявксонзо, эсензэ кизэ, весень вейке ансяк песь.