Якстере теште/1924/28/Весе эрзянь-мокшонь учителень промкс
| ←Течо велесэ | Якстере теште, № 28, 21 сентября 1924 г. редактор Глухов, Пётр Семёнович Весе эрзянь-мокшонь учителень промкс сёрмадызе Чесноков, Фёдор Маркелович |
Вейс пурнаводо→ |
| Якстере теште. Еженедельный орган Мордовской секции при Ц. К. Р. К. П. (б.). — № 28, 21 сентября 1924 г. — с. 2 |
| Весе эрзянь-мокшонь учителень промкс. |
Минек эрямо пингева эщо арасель вейкеяк истямо промкс.
Те промксонтень пурнавкшность учительть покш тевень тееме.
Сынь арсесть (думасть), кода седе курок ладямс парсте тонавтума тевенть эрзя-мокшо ютксо. Тевесь покш ды эрявикс.
Ваномс, кода мольсь роботась ды евтамс, кода эряви роботамс мейле. Вете чить роботась промксось. Ней сон евтызе эсинзэ думонзо, эсинзэ валонзо чопуда чинть марто бороцямонть кувалт. Пек стака тевесь ульнесь. Вейке кавто ломаннень сон а тееви ды а думави. Секс икелень роботыцетне учость пек те чинть эйсэ. Анцяк вейсэ роботазь те покш тевесь витеви.
| Васинь чись. |
Сисемеце сентябрянь чистэ кармасть промомо делегатнэ. Радувазь сречаясть эйсэст Московсо роботыцетне. Басинь чинть тейсть спектаколь. Налксизь пиесканть „А мон кедензэ палцинь“.
Морасть эрзень ды мокшонь морот. Промкшность Московсо эриця эрзетне. Кинь эзь ульне радувазь седеезэ! Марцесь ли кияк икеле пингева истят тевть? Анцяк ней советской властесь максь прават весе вишка народтнэнень. Кадык эрьва народось сонць эсинзэ кельсэ вити эрьва тевензэ эйсэ.
Покш празник чикс ульнесь васинь промксонь чись...
Кенярдозь кундасть тевень тееме. Ламо эрявсь прявь путомс. Тевесь покш ды эрявикс.
| Кода ащесть тонавтумань тевтне. |
Секе чинть чокшне Сайгушкин ялгась евтнинзе, кода ащесть ды мольсть тевтне. Стака ульнесь марямс, кода берянстэ эрзень-мокшонь ютксо бороцясть чопуда чинть марто.
Вейкеяк народ ютксо истя берянстэ а молить тевтне.
Весемеде кадовсть эрзетне-мокшотне. Аламо минек школанок, аламо тонавтыцянок. Сядо ломаньстэ комсь ломань анцяк маштыть ловномо, ды сетьнеяк берянстэ. Эрзень-мокшонь аватне седеньгак эрить чопуда чисэ. Сядосто анцяк вейке ава машты ловномо. Арасть эще минек эсинек кельсэ киниганок. Пек обежась эйсэнек седикелень инязоронь властесь. Эрзетнеде-мокшотьнеде весимезо малав кавто миллионт ломать. Школаст анцяк вете сядот, ды сетьнень эйстэ-як ламо а роботыть. Тонавтниця эйкакшт эйсэст аламо. Седеньгак аламо эрзень мокшонь учителенек. Зняро народ ютксо анцяк кавто сядот эрзень-мокшонь учитель. Покш школанок (II ступ.) анцяк кото, ды сетьнеяк койкак эрить. Педтехникумонок, косо анокстыть эрзень-мокшонь учительть, кавто (Петровскойсэ, Сарат. губ. ды Вишка Толкай велесэ). Эйсэст весимезэ тонавтнить колмошка сядо од ломать.
Вана кода ащи тевесь эрзя-мокшо ютксо. Кинь а калады седеезэ? Аламо школанок, аламо учителенек, арасть киниганок. Народ эрить чопуда чисэ, седе а ков. Вана мезе марясть васинь чинть промксцонть.
| Кие чумось. |
Эзь тандат промксось. Эсть новоль кеть пильк киньгак. Берянь тевенть эряви витемс. Промксось кармась думамо, кода парсте ладямс те покш тевенть, кода кармамс ливтеме чопуда чистэ эрзятнень-мокшотнень.
Ламо ульнесть кортамот ды севнумат кие чумось те тевсэнть? Аволь вейке, эли кавто ломать тесэ чумот. Чумось седикелень инязоронь властесь, кона эрьва мейсэ донясь вишка народтнэнь эйсэ.
Вана кие кадымизь минек чопуда чис, косто вейке кавто иес а лисеват. Пек покш корет нолдась попонь дурманось эрзень-мокшонь превтне эйс.
Ламо эряви путомс вий те дурманонть панемга.
Ламо эряви робота а максомс эйкакшнэнь (пакшатнень) те дурмансонть заразямс.
| Эрзень-мокшонь чопуда чись — попонь кором. |
Анцяк эрзя велева (кода мерсь Васильев ялгась) попне муить эстест кором. Эрзень-мокшонь чопуда чисэ сынь трить пря. Анцяк эрзя-мокшо велева эрцить минень-сюнонь попонь чудат, пазават ды месть. Лия народ ютксо сынст уш истя а кемсызь. Ламо кармасть фатямо те манчимантень. Минь эрзят-мокшот эщо удотано. Эрьзя-мокшо велева нейгак эщо появакшныть мень инязоронь тейтерть, мень инязоронь роднят. Сынь манчить аватнень эйсэ, пурныть кодст ды эрьва мезе, туить лия велев. Эрзя-мокшо велева попось эще виев. Сонзэ улить тува помогицянзо сыре тейтерть-монашкат, конат нузялдыть роботамост, якить анцяк поминкава ды трескить. Нижгородской эрзя велева пек эйстэст ламо. Лиясто велесэнть кавксошка сядо. Цела саранчань армия! Неть весе севдядызь! Истят тевть неят анцяк эрзя велесэ. Вана кодат чопудат минек эрзя велетьне. Аламо минек велесэ газетэнь ловныцянок, аламо ловнума кудонок ды велева роботыцянок.
Аволь седе лучистэ евтнизь роботаст таркава роботыцетне. Истя жо мольсть берянстэ тевест. Анцяк Саратовской ды Пензенской губернятне ютксо седе ладязь тевесь.
Тува нолдыть газет эсист кельсэ. Эрзетне-мокшотне аламонь аламонь тонадсть ловномо газет, кармасть сермадомо эсист нужадо сынцист газетс.
| Промксось евтызе валонзо. |
Тонавтома тевесь эряви виелгавтомс. Коданя мольсь роботась, истя минь васов а пачкотянок. Минь те шкас парсте эзинек сода тевенек, кона ащи минек ланксо. Эрявить пурнамс паро роботник центрас, конат ветявольть тевенть эйсэ, ды невтевельть ки таркава роботыценень. Амаксомс пекснемс школатнень, конань эйсэ тонавтнить эрзят мокшот. Анокстамс седе курок эрзень-мокшонь учительть. Виевгавтомс педтехникумтнень, нетнеде башка теемс отделеният рузонь педтехникумга. Неть весе можна ловномс промксонь постановлениятнень эйстэ.
| Эрзень ды мокшонь келенть кувалт. |
Весе промксось мерсь: анцяк эсинек кельсэ минь паньсынек чопуда чинть велестэ. Анцяк эсиник келенть кувалт кона миненек парсте чарькодеви минь пачкотянок весе народонь комунас. Анцяк тетянзо аванзо чарькодевме кельсэ пакшась парсте тонады эрьва паро тевс. Анцяк эрзень ды мокшонь кельсэ минь анокстатано минек эйкакшнэнь эйстэ паро комунист, икелень эрямо чинь теицят. Истя мерьдяно аволь анцяк минь, истя корты коммунистической партиесь.
Школава кармамс тонавтомо эрзень ды мокшонь кельсэ. Анокстамс седе курок паро кинигат эсинек кельсэ.
Эрзень коренной кортамокс саемс Алатырской ды Ардатовской эрзень кортамонть. Мокшонь — Спасской, Краснослободской. Центрас пурнамс комиссия, кона карми тонавтомо эрзень-мокшонь кортамонть эйсэ. Седе курок печатамс словарь, анокстамс граматика. Промксось евтызе валонзо. Тевесь ушодозь, анцяк весеменень эряви кундамс теемензэ. Шкась а учи. Минь истякак кадовинек весемеде удалов.
Улеме карми автономия, сестэ седеяк парсте ладясынек тевенть, седе курок паньцынек эрзянь-мокшонь велестэ чопуда чинть.
Кемдяно, сы иенть омбоце промксось улеме карми миньцинек автономной областьсэ.
Ялгат, мирем кундатано чопуда чинть марто бороцямо. Вейсэ минь покш пандо сяворьдятано.
Тевс!!!
Ф. Чесноков.
 
|
This work is in the public domain in the United States because it was first published outside the United States prior to January 1, 1929. Other jurisdictions have other rules. Also note that this work may not be in the public domain in the 9th Circuit if it was published after July 1, 1909, unless the author is known to have died in 1953 or earlier (more than 70 years ago).[1]
This work might not be in the public domain outside the United States and should not be transferred to a Wikisource language subdomain (or as a file it should not be migrated to the Wikimedia Commons) that excludes pre-1929 works copyrighted at home. Данная работа, впервые изданная до 1929 года, находится в общественном достоянии по законодательству США, и может быть опубликована здесь, в мультиязычной Викитеке. Но эта работа не может быть опубликована в национальной Викитеке, которая должна подчиняться законодательству России, т. к. работы этого автора (за исключением изданных до 7 ноября 1917 года) пока не вышли в общественное достояние в России. Этот автор умер в 1938 году и был посмертно реабилитирован в 1957 году, соответственно эта работа выйдет в России в общественное достояние в 2028 году.
The author died in 1938, so this work is also in the public domain in countries and areas (outside Russia) where the copyright term is the author's life plus 80 years or less. |