Якстере теште/1924/28/Течо велесэ

←Советэнь масторга

Якстере теште, № 28, 21 сентября 1924 г. редактор Глухов, Пётр Семёнович Течо велесэ сёрмадызе В. Иркаев

Весе эрзянь-мокшонь учителень промкс→

Якстере теште. Еженедельный орган Мордовской секции при Ц. К. Р. К. П. (б.). — № 28, 21 сентября 1924 г. — с. 2

 

[ 2 ]

Течо  велесэ

 

Велень хозяйствась касы.

Анцяк сынь тей Московов. Ульнинь Пензенской губернясо, Саранской уездсэ. Ульнинь покш и вишка эрзень велесэ. Кортьнинь ламо пуромкска, ламо эрьзень ячейкава. И мон монцинь сельмсэ неия, кода веле паркстомсь. Велень хозяйствась касы аволь валцо — тевсэ. Весе велень народось корты, кода бу седе курок теемс парьсте велень хозяйстванть. Ощо ламо улить ломать, конат сеицтэ кувсить ташто эрямоньть кис, но только кувсить. Истятак велеть понгонесть, косо ощо ламо аэрявикс тефть тейни народось. Самогондо сими, попоньть светойкс прими, сэредимадо пиципалакст светямсто сезьнить лецямс и т. д. Мон ней кой месть мерян, мезе велесэ од, мезе ташто.

Весе велетнева ошо лаксесь кирьди колмо сюронь видимат (трехполка). Модась соказь авуль парьсте. Сех ламо видить розь, пинеме и проса. Лия сюро пек аламо. Тедиде видиманть седе пек ламо вицьть ютась иетьнен коряс. Тень эйсэ помогась кой кува государствась, максь меля видемс вицьть.

Тедиде сюронь чачумась мелень коньдямо, только яровой сюротьне седе береть.

Тунда ульнесь коське шкась, а розь кенеримадо мейле тусть пиземеть и якшамот. Тень кувалт авуль пек парсте чачсь сюроськак.

 

Эрявить агрономт.

Велей агрономт понгонить пек чуросто, кой-кува сетыки якить, а косо дух а появакшнить. Велисэ народось мери, пек эряволь прибавамс агрономт, если сынь сакшновольть бу, то ве велесэяк авуль кадовольть трехполкат. Сюродо башка велисэ пек седе ламо теевсть скотинат мелень иетнень коряс, скалт и тувот. Тикше народось почти дух а видни авуль модань аразьде, а секс а видни, што кинь пельдеяк а марить, кодамо эйстэнзэ пользась. Велетьнень эзга кадозь племакс парт скотинат и велень народось думи, кода бу больше розводямс паро скотинань плема. Велен агрономт апачкулить — пек беренстэ тевесь ащи самонть марто алашасо асыть кувать — машина васоло. Велень народ весе ве вальгейсэ корты, кода бу седе курок велей понговольть плуг и сеилкат. Чуросто агрономонь сакшнумась кармафты велень скотинаньтень ащемеде розь и пинеме олго ланксо и начко постилка ланксо удомо, секс и берень плема появи.

 

Велень культурась тоже касы.

Тедиде мелень коряс пек седе ламо появасть велисэ мекшт (нешк). Медесь тосо пек питьней. Те максы возможность завудямс седе ламо нешк.

 

Модасо пользовамонть кувалт.

Велева модань явшимась ней моли дух апак ранга. Модась сатны доволь. Ламо велень народ корты, кода бу роботамс ве таркасо и модась керямс вейс. Те тевесь течомс апак тее секс, мекс яла кияк а толкувасы — арась агроном.

 

Кармасть тейнеме кооперативт.

Кооперативт кармасть тедиде седе ламо панжовомо эрзень велева, но арасть дух велесэ ярмак народоньть. Те тевесь витемс можна. Ярмак арасть — ули сюро, но арасть парт роботьникть. Правдуй, велень учитель ефни кода эряви теемс, но пек а капши седе вадрясто помогамс те тевеньть эйсэ. Седе живстэ ози од народось-комсомол. Атетьненень мельц паро маряви те тевесь и од ломатне эрьва косо ащить сех икеле.

 

Школава учить эрзянь кельсэ тонафтуманть.

Школа марто теди тефне седе парсте молить. Мелень иетьне лацо арасть рангумат велесэ, а макетам рость школас. Учительтне тоже седе кармасть народоньть ютск човарявомо. Пек помогасть учительтьненень политической курст, конань тейнизь уездной городга. Школасо книгат ловныть истят, конатнэсэ ламо сермадозь велень эрямодо. Те покш шага теезь велень школасо.

Эрьва эрьзень велестэ маринь истя: мекс минек эрзень школатнева апутьнить эрзень учительть. Ламо велеть теде хлопочесть, но уездэ васов неть хлопотне эсть пачкуле. Эрзень ават кортыть: кучинь, кучинь тейтерькам тонафнеме амоли, мери: пувамак а молян. Мекс мерян? Да рузкс амаштан кортамо и те кортамоньть марят эрьва эрзень велестэ, пельвелень курксто. Тень кувалт велень тейтерькат почти дух арасть школасо. Те тевеньть эйстэ авуль думамс, но теемс пек давно эряволь.

Ловнума кудот почти эрьва велесэ улить. Кой-кона велетьне ланга сайнезь шефстват.

 

Беряньстэ роботыть комитетнэ взаимопомощень.

Велень взаимопощень комитетнэ роботыть пек беренстэ. Ве таркань сокамо велева пек аламо алашат. Алашафтомо ломатьнень модась алаша мартотьнень коряс пек седе поздасто видневи. Секс сынст эрьва иене берень урожаест. Добровольной сокицят алашафтомотненень аламо.

 

Мельц паро тев.

Ве эрзень велесэ, Куриновасо, кавксо месецьть кода панжозь крестьянской кудо. Кудось кафто этайжсэ. Эйсэнзэ 600 книгат. Выписывают газет „Беднота“, „крестьянской“, „Якстере теште“, „Од веле“, „Завод и Пашня“ и проч. Ютко шкане, тельня, пешксе кудось народто. Ловныть только кандонь газет. Те тевенть эйсэ сех пек роботы комсомол. Паро тевде паро и ловномс. Кие още эрзя ютксо панчсть истямо кудо. Сермат.

В.  Иркаев.