Святое Евангелие (эрзянь)/В/Иоаннонь/07

[ 246 ]

Глава 7.

¹Теде мейле Іисус якась Галилеява. Ведь Сонзэ Іудеява арасель мельзэ якамс: Іудейтьне вешнесть Сонзэ маштомонзо. ²Малав пачколиль Іудейтьнень шалагань тейнима праздникест. ³Братонзо мерьсть Тензэ: лисьть тестэ да тук Іудеяв, штобу тонавтницят-как неевлезь Тонть тейма тевтнень. ⁴Ведь кі-як истямо арась, кона аволь тейть-бу тевсэнзэ салава, а сонсь вешневель-бу прянзо а содавтомс. Теиньдерят Тон истят тевть, невтик Эсь прят ломатьненень. ⁵Ведь Сонзэ братонзо-як эсть кемть Тензэ. ⁶Тень каршо Іисус мерьсь тенст: Монь шкам ощо эзь сак, а тынеҥк эрьва знярдо шка. ⁷Тынь ломатьненень анеймакс а теевдядо, а Монь сынь анейсамизь: ведь Мон тенст кортан сынст апарт тевдест. ⁸Тынь азёдо те праздникстень, а Мон а молян те праздникстень: Монь шкам эзь топодть ощо. ⁹Тень тенст мерезь, кадовсь Галилеяс. ¹⁰А кода састь братонзо, сестэ Сон-гак сась праздникстень, аволь неямга, а салава лацо. ¹¹Еврейтьне вешнесть Эснэнзэ праздникстэнть да кортасть: косо Сон? ¹²Ламо кортамот ульнесьть Эстэдензэ ломатьнень ютксо-як: конат кортасть: Сон паро; а ліят кортасть: арась, Сон аньсяк маньчи ломатьнень. ¹³Аньсяк, Іудейтьнеде пелезь, кі-як яв эзь корта Эстедензэ.

[ 247 ] ¹⁴Праздниксть пелензэ шкане совась Іисус церькувастень да тонавсь. ¹⁵Дивасть Іудейтьне, мерезь: кода Сон апак тонавтле содасазо Писаніянть? ¹⁶Іисус каршост мерьсь: Монь тонавтумась аволь Моньсинь, а Монь Кучицянть. ¹⁷Кинь ули мельзэ Сонзэ олянть теемс, се содасазо: Пазонь пельде те тонавтумась или Мон Эсь пельдень кортан. ¹⁸Кортыцясь эсь пельдензэ, эсьтензэ вешни слава, а кона вешни Кучицянзо славанть, се видесь, сень эйсэ аволь виде арась. ¹⁹Эзь макст-ли теҥк Моисей закон? аньсяк кі-як тыҥк ютксто законсть кувалт а теи. Мезень кис тынь Монь маштомон вешнитядо? ²⁰Народсь мерьсь каршонзо: аволь шайтян-ли Эйсэть: ки вешни Тоньть маштомот. ²¹Іисус нень каршо мерьсь тенст: ве тев Мон теинь да весе тынь диватадо. ²²Моисей макссь теҥк керявтума (те койсь аньсяк аволь Моисеень пельде, а тетятьнень пельде) да тынь субута чине-як ломаненьть керятадо. ²³Моисеень законсть а коламонь кис саиньдеряй ломаньсь субута чине керявтума. Монь лаҥгс мейсь кежіявтлитядо сеньгис, што Мон субута чине весе ломаньсть шумбракс теія. ²⁴Илядо судя лаҥгс ванозь, судядо виде судсо. ²⁵Сестэ конат-конат Іерусалимень эряцятнэде кортасть: Аволь Те-ли, Конань Эснэ маштомс вешнить? ²⁶Вана Сон наяв корты, да мезе-як Тензэ а мерить: эсть содак-ли прявтнэ, што Сон алкукс Христозось? ²⁷Аньсяк минь содасынек Сонзэ, костонь Сон, а знярдо сы Христозось, кі-як а карми содамо, костонь Сон. ²⁸Іисус, церькувасонть тонавтомсто, серьгедезь, мерьсь: тынь Монь содасамизь, содасыҥк [ 248 ]сень-гак, костонян Мон, — Мон эсь пельдень эзинь сак, виде Монь Кучицясь, Конань тынь а здасыҥк. ²⁹Мон содаса Сонзэ, ведь Мон Сонзэ пельде (сынь), Сон Монь кучимем. ³⁰Сестэ сынь вешнесть Сонзэ кундамс, аньсяк кі-як лаҥгозонзо кедь эзь путт: ведь Сонзэ шказо ощо эзь сак. ³¹Ламо ломатьнень эйстэ кемсть Сонензэ да кортасть: знярдо Христозось сы, ара седе ламо чудат теи, зняро Те тейсь? ³²Маризь фарисейтьне Эстэдензэ народсть ютксо истя кортамонть да кучть сынь да архерейтьне-як служительть Сонзэ кундамо. ³³А Іисус мерьсь тенст: ощо аволь куватьс кадовсь Тень тыҥк марто улемс; туян Моньсинь Кучицястень. ³⁴Карматадо вешнемень да а муйсамизь; да косо улян Мон, тозо тынь а савдадо. ³⁵Іудейтьне кортасть эсь ютковаст: ков Сонзэ мельзэ молемс, мик минь а муйсынек Сонзэ? арась-ли Сонзэ мельзэ молемс сравтлезь еллитнэнень, еллитнэнь тонавтомо? ³⁶месть не валтнэ, конатьнень Сон ёвтыньзе: карматадо Монь вешнемень да а муйсамизь да косо улян Мон, тозо тынь а савтадо?

³⁷Праздникень остатка покш чистэньть Іисус стясь да, серьгедезь, мерьсь: кинь симезэ сась — сазо Монень да симезэ. ³⁸Ки Монень кеми, сень, кода сёрмадозь Писаніясо, потстонзо живой ведень лейть чудьме кармить. ³⁹Истя Сон ёвтась Духонть кувалма, Кона саймаль Сонензэ кемицятьненень: ведь сынст лаҥгсо арасель ощо Святой Духсь: сестэ ощо Іисус апак шнавтоль. ⁴⁰Ламо народсть ютксто не валтнэнь марязь, кортасть: те алкукс пророк; ⁴¹ліятьне кортасть: те Христос; а [ 249 ]конат-конат кортасть: ара Галилеясто сакшны Христос? ⁴²Апак ёвтак-ли Писаніясонть, што Христозось сы Давидэнь родсто, Вифлеемстэ, косто ульнесь Давид. ⁴³Истя Сонзэ кувалма народсьть ютксо ульнесь пелькстамо. ⁴⁴Конань-конань сынст ютксто ульнесь мелест Сонзэ кундамс, аньсяк кі-як лаҥгозонзо эзь путт кедь. ⁴⁵Кода састь архіерейтненень да фарисейтненень служительтьне: сынь мерьсть тенст: мейсь эзиҥк ветяк Сонзэ? ⁴⁶Служительтне мерьсть каршост: знярдо-як ломань истя эзь кортакшнок, кода Те Ломансь. ⁴⁷Фарисейтьне мерьсть тенст: аразик тынь-гак манявиде? ⁴⁸Ара кемсь Тензэ кі-як прявтнэнь да фарисейтнень эйстэ? ⁴⁹А те народсь, кона азды закон — сюдозь сон. ⁵⁰Эстэдест, Никодим, кона сакшнось Тензэ веть, мерьсь тенст: ⁵¹Ара минек законнок суди ломаньсэ, васнят апак кулцонок сонзэ да апак содак, месть сон теи? ⁵²Тень каршо мерьсть тензэ: тон-гак аволь Галилеястоят-ли? Содык (парьсте) да нейсак, што Галилеясто пророк а сакшны. ⁵³Мейле срадьсть весе кудоваст.