Пици-палакст/Эфигения

From Wikisource
Jump to navigation Jump to search
[ 70 ]
ЭФИГЕНИЯ


М
ЕНЕЛЬСТЭНТЬ ПРОК дына кочом ваны ковось. Морянть трокс таргавсь ашо струна. Цют-цют цивтёрды. Почти морянть велькссэ — кевень пант. Аштить орькс-овтокс. Пряваст — тия-тува, прок пона клокт — чувтынеть.

Минь аштинек покш скала ланксо. Сэрезэ — кавто сядошка сажеть. Те скалось пандотне эйстэ ашти васоло, сонзэ прок кияк нарошной вачкизе морянть вельксэс. Ламо савкшны кирьдемс те скалантень: благой варматне сезнить прянзо, морясь шли-нарды алксонзо.

Монь ялгам — татаронь пастух Абдул. Абдулонь — кодгемень иензэ. Чамазо скаланть понас паншсь: тюжа, сормсезь. Чись эйсэнзэ пидесь эсьтензе, вармась порнесь — эсьтензэ. Ламо кой мезе печксь Абдулонь прява: иень перть, чинек-венек ёвтнемс — а ёвтневить, кавто-колмо кинигас сёрмадомс — а сёрмадовить, пель иень перть кемень ломаннень моразь — а моравить. Истя Абдул корты эсь эйстэнзэ.

Абдулонь кавто цёранзо: вейке мулла — светой ды „учоной“ ломань, омбоцесь — сюпав: кавто козейканзо, виноградонь ды лия фруктань покш садозо, ламо скотинанзо. Кавонест цёратне тертнизь эрямо, сыре ловажанзо арьсить оймавтомо. Эзь моле Абдул цёратненень. Пек уш а вечкеви тензэ сюпав-чись эрямось: сюпав ломань уйни паро-чи поцо, и яла тензэ аламо. Жадной пек сюпав ломанесь. Сон, Абдул, шачсь пандо юткс ревень стада пес. Кайсь пантнэ ланксо стада удало. Весе эрямозо ютась пандо ланксо, паксясо ды вирьсэ. Тусь Абдулонь мельс те эрямось. А полавцы Абдул мезеяк ланкс те эрямонть. Кулы, нать, Абдул пандо ланкс эли вирь пулос. Пек паро истямо эрямось. Истя Абдул корты эсь эрямодонзо.

[ 71 ] Абдул тейсь скала ланкс тол-пандя. Весе пингензэ Абдул эризе тол-пандя вакссо. Вейке час а эряви Абдул толтомо. Толось сонензэ — тетя, ава, брат, родня. Толось Абдулонь кортамо ломанезэ; толонтень Абдул ёвтни весе горянзо, апаро-чинзэ ды радостензэ.

Абдул прядо-пилькс пешксе эрьва мень историядо, ёвтнимадо ды бобаскадо. Сонзэ койсэ ёвкснэ ды легендатне — весе видеть. Аволь маньшимат.

Тол-пандясь куроксто курвайсь. Коське таратнэ, конатнень Абдул пурнызе скаланть ланксто, цяторсо кармасть паломо. Абдул сялгинзе сельмензэ тол-пандянтень. Сельмензэ Абдулонь вишкинеть, аламодо косойть. Ваныть лангозот прок плетень варява.

Абдул корты апак капша. Эрьва валонть буто порезь-пори:

— Тон, цёра, кортат: легендатне весе — мазый ёвкст, мазы но чаво валт. Одат эщо, секс истя кортат. Неень од ломатне весе истят. Куть иля ёвтнеяк тест мезеяк. Пек уш кунсолыть кинигатнень. Кевкстемсдеряй, мезень кинигатнесэ парось?.. Мезеньгак арась. Кодамояк ломань орши лангозонзо мазы одижат, прязонзо путы паро шляпа, судонзо ланкс понгавты сельмукшт, тонавтозь, мерят, и давай кинигань сёрмадомо! Тозонь месть понксь тапари. Те а истя, тона а истя, тень вана эряви теемс истя... Тон ловнок не кинигатнень ды кемть эйсэст. Мон зярдояк кинига эзинь сайне кедезэнь, но яла теке содан зняро эрьва мень историят — комсь кинигас авольть сёрмадовт.

Не историятнень мон неинь-маринь аволь кинигасто, жив ломанень курксто пачкоцть монень. Сынь — аволь чаво думавкст. Сынь весе листь эсинек эрямостонть.

Абдул лоткась аламос ды кармась витнеме толонть. Мон кургонь автезь кунсолынь Абдулонь. Пелинь ёвтамо кодамояк вал, пелинь — Абдул кежиявты ды лотки кортамодо.

— И мерян теть, цёра, мон кода шачинь — зярдояк кинига эзинь сайне кедезэнь, но содан ламо эрьва мень историят. Вана минь аштитяно тонть марто покш скала ланксо... Кода тонть койсэ: те скалась косто появась тезэнь морянть вельксэс? а?

[ 72 ] Абдул кепедизе прянзо, керш сельмензэ мейсь-бути конизе, витенть — монь ланкс каизе. Ве курго уголозо цют-цют пеець. Учось — месть мон отвечинь. Мон тензэ отвечинь, кода маштынь. Абдул раказевсь:

— Хе-Хе-Хе! Мон истя думиньгак! Тынк, кинигань ломатнень, ответэнк вейке: пантнэ теевсть сестэ, кода модась кармась кельмеме ды сормсевеме, скалатне моря берёкс теевсть секс, што морясь шли пантнэнь алксост, пантнэ каладыть ды теевить скалат...

— Аволь истя ашти тевесь, цёра! Те скаланть ули эсинзэ историязо. Астяк лемезэ „Эфигения“. Кунсолок, месть мон теть ёвтнян. Кунсолок парынестэ ды пря потмозот вачкить не валтнэнь. Ошов молиньдерят, ёвтнить сынст тынк учоной ломатненень: вана месть, мерть, монень кортась Абдул, кона кодгемень ие уш эри мастор ланксо, колияк эзь варчне кинигас — и ламо соды...

...Морянть ёндо пувась свежа вармине. Цют-цют лыкостызе толонть, прок тандавтнесь эйсэнзэ мацтямосо, свежа коштсонзо окатинзе минек чаматнень — и ливтясь пантнэ пряв. Алонок — морясь састо лакась, прок сеель кискань каршо моткоць.

Абдул озадо ульнесь. Мейле — маць керш боканзо ланкс, овси толпандянть чирес. Прянзо нежедизе керш кедензэ ланкс. Таргизе сумкастонзо пипканзо, мартонзо мешоксо табак. Курвастизе пипканть тонол-пекшсэ, мейсь бути кувать лангозон вансь — ды кармась ёвтнеме.

— Умонь те шкась, знярдо Крыменть ланксо покшось ульнесь хан — Мустафа Керим. Кодат ульнесть те ханонть сюпав-чинзэ — кельсэ а ёвтневить, перасо а сёрмадовить. Морястонть песокось а ловнови, — истяжо эсть ловнокшно Мустафань ярмаконзо; менельстэнть тештне а цётавить — истяжо эсть цётавкшно Мустафань алмазонзо ды жемчугонзо. Кудонзо Мустафань олажазельть сиясо ды сырьнесэ, чинь каршо сынь сыреждильть павань толгакс.

Мустафань ульнесть сядо нинзэ (козяйконзо). Весе светэнть келес пурнакшнынзе сынст. Иневедень (морянь) томбальде усксть тензэ чивалдодо мазый тейтерть. Эзь жаля ярмаконть лангозост Мустафа. Эрясть нитне башка кудосо, симсть-ярсасть сырьнень вакансо, ланксост [ 73 ]кантлесть жемчуг поцо одижат. Эйсэст эрьва валське экшелясть пси ловсосо: теласт улест ашот ды чевть.

Кежей ды виев ульнесь Мустафа. Ай, виев! Масторонзо ванстась покш войска — конница. Эх, конницась ульнесь! Алашатне прок пустынясо левть. Эсть пеле а толдо, а ветьте, а ломаньде, а шайтяндо. Пакся варманть сельмензэ сиядыльть лангозост. Кода туильть сынь ардомо паксянь-пандонь трокс, вармась малав а кенериль мельгаст. Вана кодамоль Мустафань конницазо. Да. Вейкеяк инязор, кодамояк князь эзь кирть Мустафань каршо. Прок толдо пелильть эйстэнзэ весе шабрань князтне. Весе стараясть дружнасто эрямо мартонзо, каясть тензэ эрьва иене покш каявкс ярмаксо и скотинасо. Вана кодамоль Мустафа-Керим.

Сюпаволь Мустафа-Керим. Но сонензэ сех питнеель весе сюпав-чидензэ питнеель — тейтерьзэ Эфигения. Масторонть ланксо арасель сондензэ мазый тейтерь — ды а улияк. Монь сыре кельсэнть а ёвтневи Эфигениянь мазы-чизэ: чамазо, мерят, крусталень, кургинезэ прок пеште лукшке, турвинеизэ прок теезь ансяк палсемс, черензэ — смоль раужот, кочкаряс, сельмензэ — менельсэ тешть.

Мустафа сроясь Эфигениянень башка кудо. Ушо ёндо сырежди сия, потмо ёндо палы сырьне, кияксось ацазь ковёрсо, стенатнева поволезь эрьва мень тамашат. Мезде симсь-ярсась Эфигения... а думавияк те пингень превсэ. Ансяк нармунень ловсо арасель столензэ ланксо. Истямо таркасо кайсь ды теевсь мако цецякс Эфигения. Кода сон лисиль ушов, туиль садгант якамо — весе цецятне тензэ сюконильть, нармутне морыльть сех мазы морот, вармась налксиль черензэ марто, чись палсиль чаманзо эйсэ.

Пек вечкилизе тейтеренть Мустафа. Кода ансяк эзь кольневте эйсэнзэ. Эфигениянь эрьгензэ, сурксонзо, котанзо ды платиянзо ульнесть вачказь колмо сядо горобиява. Платиятне месть ульнесть! Вейкень ланкс можналь рамамс тыньк Москов ошонть пелензэ. Вана кодамоль Мустафань тейтерьзэ Эфигения.

Эрясь Эфигения пекстань нармунькс. Оймезэ ульнесь ветьте ванькс: од цёрань сельме эщо эссе пице [ 74 ]ёжонзо, вечкимань валт эзизь качакавтне седеензэ. Ванькске ульнесь Эфигения, прок райсэ гурия...

...Таго варма ковол ютась ланганок. Седе виев. Монь прястон картузом цют эссе сала, тол пандясь секень вант мади. Абдул курок каясь лангозонзо тарат. Толось мекев вельмась, весёласто кармась цятордомо, буто варманть дразни. Минек толонть ланкс косто бути вачкотецть кавто кедь-немилявт, велявцть-тейсть велькссэнек — ёматоцть. Ковось састо уйсь менельганть чивалгума ёнов. Ансяк кавто чувтонь сэрь аштесь морянть велькссэ. Абдул яла ёвтни, мерят прок кинигасто ловны:

— Лиссь, цёра, истямо тев, кона саизе Эфигениянь оймензэ. Куть Эфигения ковгак эзь лисне, кинеяк прянзо эзь невтне, но нармутне ды вармась кандызь сонзэ славанзо масторонь келес. Кармасть Эфигениядо эрьва косо кортамо. Ве странник ладясь истямо моро:

— Покш ды келей минек масторось. Эрить ланксонзо зняро ломать, конат колияк а лововить. Ломатнень кис пек мелявты Аллах. Но сех пек мелявты сон Мустафа Керимень кис: макссь тензэ ламо сюпав-чи; ванстыть эйсэнзэ ламо верной салдат, вечкить эйсэнзэ сядо мазый козейкат. Но сех покш казьне Мустафанень — аллах макссь тейтерь, конань лемезэ Эфигения. Пек мазы те тейтересь: кода сырьги моданть ланга — мерят, лебедь уи; кода варшты лангозот — буто чись эжди; кода карми кортамо, — прок чудеркс чольни. Ломань кельсэ а морави Эфигениянь мазы-чизэ...

Мазыстэ морась странникесь. Кунсолыть атят ды бабат — дивадо пешкедить, кунсолыть од цёрат — седеест кившкаить-коськенить, кунсолыть од тейтерьть — стака тошнас прыть — сельмест сиядыть.

Странникень моронть маризе весть урус-од цёра Махмуд. Те цёрась истямоль: сон а повнясы козонь шачсь, кить тетянзо-авонзо. Кортнесть эйстэнзэ: буто сон кода шачсь, пелезэ ульнесь черь-поцо, карксамо виц. Тетянзо-аванзо тандацть истямо эйкакштонть ды ёртызь вирь пулос. Эйкакшонть муизе верьгиз-авака, конань левксэнзэ охотник кундынзе. Кортыть, буто те цёранть саизе верьгизэсь, кандызе норазонзо ды кармась трямонзо эсь ловсосонзо. Те цёрась эрясь верьгизэнть марто сисемь иеть, и лиссь эйстэнзэ пеле-ломань, пеле-зверь. [ 75 ]Мейле верьгизэнть маштызь. Цёрась кадовсь урозокс. Сонзэ кундызь вирьстэнть и ускизь велев. Кувать сон эзь тонадо лома ютксо эрямо. Пельсь эйстэст. Вансь яла пиже виренть ланкс. Мейле — тонаць. Стувтызе зверь ютксо эрямонзо. Теевсь эйстэнзэ истямо мазы ды шумбра цёра — а ёвтавияк! Истямо те цёранть историязо.

Кода сон маризе странникенть моронзо, курвайсь чокшнэнь зорякс. Кундызе странникенть лавтомодо ды мери:

— Покштяй! Пек тусь мелезэнь морот, курвастик седеем... Толкувик монень, кода муемс Эфигениянь. Молян чиявтомонзо... Кулан эли эрян — Эфигениянь сайса козейкакс...

Варштась лангозонзо странникесь и мизолк пейдезевсь.

— Эх, цёра, цёра! Нать превстэ лисеме кармить, коли истят валт лисить куркстот. Тонеть ли думамс Эфигениядо! Сонзэ чиявтыксэлизь туркань инязорось — Мустафа-Керим эзь кортаяк мартонзо. Кучнесь „покш кудат“ монголонь князесь — Мустафа-Керим позоризе нищейсэ, „покш кудатнень“ ланкс кисканзо узавтынзе... Тонеть ли думамс теде мейле Эфигениядо! Эх, цёра, цёра...

Махмуд нолдызе прянзо ды тусь велестэнть. Ков тусь — киненьгак эзь ёвта. Кияк эссе кевксть. Махмуд киненьгак эзинзе ёвтне поцо валонзо. Махмуд тусь Эфигениянь вешнеме.

Кува якась Махмуд, месть ютасть пряванзо ки ланксо — кияк а соды. Соды народ ансяк седе, кода сон муизе Эфигениянь. Астяк Махмуд эрясь вирьсэ сисемь иеть верьгиз марто, тонаць бойкасто чийнеме, пандо ды чувто прява кузнеме, скокаеме.

Учизе Махмуд венть самонзо. Куйсь сэрей чувто пряс, тосто кирнавць стенанть ланкс ды истя валксь кардазонтень. Тосо се шкане кияк арасель. Стражась весе удыль. Муизе Махмуд Эфигениянь кудонть. Совась. Нянькатне удыльть. Састо ютась Махмуд ютковаст, совась Эфигениянь комнатантень. Эфигения эщо эзь мадне удомо. Кодак неизе Махмудонь — лондаскаць, прок тарканзо пачк тусь: и тандаць, и радувась. Цёрась пек мазы. Эфигения тетядонзо башка цёра эзь некшнэ... [ 76 ]Апак фатя сырьгойсь седеезэ ды кармась прок молуткасо чавомо.

Кувать вансть карадо-каршо: Махмуд — кенкш ланксто, Эфигения — таркастонть. Седеест керьмандавсть вейс валтомо. Махмуд сырьгась икелев, Эфигения стясь каршозонзо. Кеместэ-кеместэ кутмурдасть. Турваст вейс васоцть.

Истя Махмуд муизе Эфигениянь. Колмо недлят сон эрясь Эфигениянь комнотасонть. Неть колмо недлятне ютасть мазы онкс. Содась Махмуд: Мустафа а макссы сонензэ Эфигениянь. Сынь кармасть арьсеме, кода оргодемс.

„Берянесь сы сестэ, коёндо овсе а учат“, — истя корты минек вал-меревтесь. Эзь лиссть Махмудонь койсэ. Весть Мустафань тошна саизе, мольсь Эфигениянень тошнанзо ютавтомо. Се шкане самай Махмуд марто Эфигеният налксильть спальнясонть, прок вишка эйкакшт. Эсть думаяк Мустафань самодонзо. Зярдояк сон чокшнэ позда эзь сакшно Эфигениянень: шайтян кандызе се шкане.

Варштась Мустафа лангозост — весе ожолгаць. Сельмензэяк тетькинзе. Думась ли сон — тейтерезэ маньши эйсэнзэ. Арась кенкшенть ланкс, серьгедизе стражанть. Махмудонь каизь кевень подвалс, пекстызь кемень панжума экшс, Эфигениянь ванстамо арасть кавто-сят салдат. Валське Мустафа пурнась совет. Ёвтнизе, мезе несь ды вейшсь советэнть кецтэ превть, кодамо наказания максомс чумотненень. Ламо кортасть старейшинатне. Мейле макссть наказания: Махмудонь содомс алашань пулос и нолдамс паксянь-пандонь трокс, Эфигениянь пекстамс пандо поц.

Стясь вейке сыре мудрец ды мери:

— Кунсолодо месть кортан. Зря тынь максыде истямо наказания. Зря. Махмуд — цёрась аволь простой. Астяк сонзэ рунгозо карксамо виц черь поцо, астяк сон сисемь иеть потясь верьгизэнь ловсо. Сонзэ аллах шачума чистэнзэ теизе часливой ломанекс. Простой ломань аволь эрявт верьгиз марто, аволь совавт минек крепостентень, аволь манявт тензэ Эфигения. Махмудонь кучизе миненек сонсь аллах эрямонок мазылгавтомо. Махмуд Эфигениянь сужоноезэ. Кемеде монь валтнэнень. Максынк тензэ Эфигениянь. Пародо башка мезеяк а ули. Бути машцынек Махмудонь, паро а нейдяно весе. Минек масторось розуряви и Эфигениянь сайсы эстензэ аллах.

[ 77 ] Истя кортась мудрецэсь. Эзизь кемть валонзо. Махмудонь сюлмизь дикой алашань пулос ды нолдызь паксянь-пандонь трокс. Сезневсь сон пансонь-панкс. Эфигениянь пекстызь пещерас и кенкшнэнь ланкс цепсэ сюлмасть кавто левть.

Мудрецэсь видеть кортась. Куроксто сырьгасть лангозонок война марто кавто инязорт: туркань ды монголиянь. Морточкань пес розоризь Мустафань... Эсинзэ маштызь.

— Эфигения истяк и кулось пещерантень? — кевкстия Абдулонь.

— Самай виев боень шкасто кепетець покш вихерь, пещеранть кенкшнэ ёртовсть петлясто, вихересь каподизе Эфигениянь и кандызе морянть вельксэс... Эфигениянь оймензэ саизе аллах, а рунгозо прась масторов ды теевсь скалакс. Самай те скалась, кона ланксо минь тонть марто аштитяно...

Вот и весе историясь, цёра. Кунсоломс эряви, месть кортыть сыре ломать. Куть тон тонавтозят, превеят, но сыре ломать эряви кунсоломс. Сынь парсте содасызь эрямо ладонть. Берянь превс а тонавттадызь.

Абдул прядызе ёвтниманзо. Ковось валксь морянтень. Чопулгаць. Чи лисима ёндо сырьгасть пельть. Вармась яла уставась. Морясь кармась бушувамо. Волнатне кежейстэ чожность берёксонть. Абдул вансь се таркантень, козонь ковось валксь, и мейсь-бути мерсь:

— Ломанеськак истя: эри, эри — кулы. Ковонть лацо ёмавты. Курок стувцызь.

* * *

Легендась весе. Истя ли ёвтнизе сонзэ Абдул — тевесь аволь сень эйсэ. Те легенданть кода а кода улить исторической корёнонзо. Грекнень исторической литературасонтькак Эфигениянь скаладонть сёрмадозь знярыя. Крымень ханстванть пинкстэ кодамо-бути Эфигения ульнесь. Ансяк кортыть эйстэнзэ аволь вейкецтэ. Грекне эсь койсэст, крымень татартнэ таго эсь койсэсть.

Но кода иляст корта — Абдулонь легендазо аволь берянь: мазыстэ ёвтни Абдул, ули мезе кунсоломс, ансяк кинигатнень ды сынст сёрмадыцятнень кувалт сон зря кортась.