Пици-палакст/Манявсть

by Дуняшин, Алексей Васильевич

←Обь-леенть чиресэ

Манявсть  (1930)  by Дуняшин, Алексей Васильевич

Эфигения→

Пици-палакст. Ёвтнимат ды фельетонт. СССР-энь Наротнэнь Центрань Издательствась. Москов, 1930. — с. 67—69

[ 67 ]

МАНЯВСТЬ

В

АГОН № 2, купэ — 6. Эйсэнзэ арттано ниленек. Алсе полкатнесэ мон и вейке Динамо (Московсо те заводось) завоцто робочей. Сыре уш. Ведьгемень ветешка иесэ. Черензэ аламодо седойть. Чамазо пек сормсезь. Кирьгазо якстере, санов. Пек ламо а корты, ваны коня алга. Сразу неяви: те ломанесь ламо нужа несь. Верьсе полкатнесэ — вить кедь ёнсенть ланксо — армянин, кершенть ланксо — рузонь атя. Армянинэсь ды робочеесь кодак Московсто туинек, истяк мацть: рузонь атясь валксь верьде, озась ваксозон ды ушоць кортамот. Васня кортамотне лац эсть моле: атясь капшазь ёвтнизе, сон Рязанской уездэнь эриця, якась Московов модань тевень коряс, пек уш кери эйсэст модань аразесь, велесэст пурнавсь артель, хлопочить од паксяв туеме. Мейле монь кевкстимем:

— Тон, цёрка, месть Московсонть тейникшнят?

Мерян — тонавтнян.

— А! Тон тонавтнят! Студентат, значит... Паро тевесь, цёра. Кодамо должность получат тонавтнимат прядомодо мейле? Небось, дохтур кармат улеме?..

Мон толковия тензэ: анокстан, мерян, эсь пря журналистэкс, школанть прядомодо мейле карман робутамо газетсэ.

— Учоной ломатнень мон вечксынь... — састо кармась кортамо атясь. — Сынст удемест валдот, сельмест аволь чопудат... Но яла тек монь ламо кежем учоной ломатне ланксо.

— Мекс истя?

— Вана мекс, цёра: минь чопуда ломать, эрямо а машттано, пек ламо эрямсто манявксонок... но минь не манявкснэ кис апек чумотано, астяк минь чопуда [ 68 ]ломать... Ну, кода учоной ломатне манявить — сестэ тарка-эзем а муян эстень...

— А чаркодян мекс-бути валозот, покштяй.

— Нама а чаркодят... тынь, ломатне учонойдядо, косто уш миненек тынк превтнень саемс... Вана ёвтнемсдеряй теть вейке история, сестэ чаркодевлить...

Газетс эряволь сёрмадомс те историянть, ну, ды аразикс тынь сёрмацынк, небось сезьган-варака вейкень-вейкень сельме а таргить...

— Зря истя кортат, покштяй, — мерян тензэ, — тон васня ёвтник те историянть, мейле уш карматанок кортамо лиякс...

— Ну эно ёвтниса, коли пек мелеть ули кунсоломс. Минек велесэ ули коператив. Эсть моле эйсэнзэ тевтне: кодамо шайтян а путыть заведущеекс — растрата теи. Пильге ланксто прась велень народось: а добарявить ярмакс! Колмо иес кото сядошка целковой ливтясть варма мельга. Коперативесь кулома киява якась. Мейле путынек паро заведующей Охримень Ванькань. Те ломаненть истямо эрямонь историязо: 1915-це иестэ саизь германской войнав. Исяк эзь ульне фронтсо — понксь Германияв пленс. Сась пленстэ 1919-це иестэ. Велесэнть кудонзо-чинзэ весе розорявсть. Семиязо пельс вачо. Пель ие эрясь кудосо — саизь Якстере армияв. Тосо колмо иеть „чукась“. Сась мейле кудов и ведь-тол поцо кармась робутамо, кудонзо-чинзэ аламодо стявтынзе пильге ланкс... Сэтьмель ульнесь цёрась, ломань марто эрямо майшь, ломанень обидямо эзь вечке...

Меля сёксня (1926) минь сонзэ кочкинек кооперативс заведующейкс. Сразу невтлизе прянзо тевень содыця ломанькс, коперациянок квельмась, появась ламо эрявикс тавар. Таргинек ойменек шождынестэ, кармикне пек надиямо Ванька ланксо. — Те уш а манясамизь, а ёмавтнесынзе ярмаконок... — кортнитяно эсь юткованок...

...Поездэсь пачкоць кодамо бути станцас. Весе народось каявсь кенкшентень, капшить рамамо ярсамопель. Ансяк минь атянть марто эзинек стя таркастонок. Монь мелем ульнесь марямс историянть, атянтень охоталь ёвтнемс.

...И вот, цёрам, лись вейке амазый тев: сась ошсто ревизия марто мень бути комиссия. Ваннызь Ванькань [ 69 ]таваронзо, ловизь кассасто ярмаконзо — мусть асатыкст кото сят целковой. Сёрмацть акт и тевенть макссызь суц. Минь весе кеденек вачкодинек: эзь кемевть кода бути, што Ванька зняро ярмакт ютавць эсь лангозонзо... Кавто чиде мейле велеванть сраць стака куля: Охремень Ванька прянзо повизе. Чиинек кудозонзо — алкукс: латало ашти понгавтовозь паймесэ, сельмензэ велявтозь мекевланк, келезэ лаужашка ливтезь, бокав нурьги.

— Мень тамашадо истя прянзо повизе? — думатано, — эли виде-паро ютавтынзе эсь лангозонзо зняро ярмаконть?..

— Кавто-колмо чиде мейле пачкоць те кулясь ошов, тосто сась лия комиссия. И мезе лиссь, цёрам! Кода те комиссиясь одов ловинзе ярмакнэнь, тевесь лиякс пурдась: растратась весемезэ ансяк кодгемень трёшник. Косто икелень комиссияст саизе знярошка цифранть — азё вешник! Кода теде марясь минек народось, цють эзизь машт омбоце комиссиянть... Нама, не ломатнень чумост арасть, чумотне сеть, конат сакшность икеле...

... Атясь лоткась аламос ёвтнимадо. Нардызе судонзо, сельксь масторов ды мерсь судонзо пачк:

— Ней чаркодить монь валозон? Содасак, мекс мон кежиявтынь учоной ломатнень ланкс?.. Акода а кежиявтомс... мон истя думан: тон ломанесь тонавтозят, тонеть макссть покш тев, тон сонзэ парсте теик... парсте теик, аволь кода понксь, мельде валдо; ошонь ломатне варштасть оно тевенть ланкс ве сельме крайсэ — и ёмавтызь ломаненть. Цела семия кадовсь нужасо пиштеме пингень эрямс... Истя а лади тейнемс...

... Поездэсь арць Рязанень станцас. Атянтень тезэ валгомка. Туемстэ кедем кеместэ сювордызе ды мерсь:

— Прощай, цёра, пасиба теть паро валот кис... А те историянть иляк стувт, сёрмадык газец... Жаль пек цёрась, амезень кис ёмась.

Шкась — кавто часто пеле веде мейле. Вагонсонть весе лоск удыть. Ансяк мон а удан. Сельмень икеле — латалкс, тосо — паймесэ повазь Охремень Ванька. Пря поцон сялгозь атянть валонзо.

— Ошонь ломатне варштасть тевенть ланкс сельме крайсэ — и ёмавтызь ломаненть амезень кис...