Пици-палакст/Парсте морат, аздан козонь озат

From Wikisource
Jump to navigation Jump to search
Парсте морат, аздан козонь озат  (1926) 
by Дуняшин, Алексей Васильевич
Пици-палакст. Ёвтнимат ды фельетонт. СССР-энь Наротнэнь Центрань Издательствась. Москов, 1930. — с. 78—80
[ 78 ]
ПАРСТЕ МОРАТ, АЗДАН КОЗОНЬ ОЗАТ


В
ЕЙКЕ РУЗ ялга монь марто спорясь — улить ли минек касыця робутникенек, конат икеле-пелев маштовольть робутамо центрасо.

— Тынь, эрзят, ёмань-арань ломать, — мери тень рузонь ялгась. — Тынк велетнесэ арась вейкеяк од ломань, конань эйстэ лисевель паро роботник. Кить тынк роботникенк? — И сон кармась сурсонзо ловномо. — Кунсолок: Миронов — вейке, Окинк — кавто, Бажанов — колмо, Глухов — нилеце, Данилов — ветеце.

Вот весе тынк роботникенк: друк сынст весе ве чистэ стака орма сайсынзе, мейле месть карматадо тейнеме, а? Ведь мейле тынь пачкоттядо минек валмеревтентень: „пекстык лавкат“. Истя аволь?

Рузонь ялгась лоткась кортамодо, сялгизе конязон керш сельмензэ ды састыне, ве турва уголосонть, кармась пейдеме.

Мон, кувать апак дума, мерян тензэ:

— Эх, ялгай, астяк нать тон рузонь велесэ шачить-касать, чаво веца-ямдо ярсыть — эрзянь народонть а содасак.

Эрзятнень пря поцост аволь сыре грацень удемть — сынст прясо паро ломанень превть...

Рузонь ялгась вансь лангозон пштистэ. Турванзо месть бути мемецть. Фатинь: сон кортамо думи, но мон тензэ кортамо оля эзинь макст.

— Тон тесэ лецнить Мироновонь, Бажановонь ды лия ялгат.

Тон мерят — неень роботникнень куломодо мейле а кадовить роботникенек... А содат тон кискань пулояк! Минек улить велетне эйсэ истят од роботникть, конатнень куть нейке озавтыть Луначарскоень таркас...

[ 79 ] — Иля лаборт месть а эрявить! — кежейстэ мери рузось. — Ки не валтнэнь кемсынзе? Ёвтак тень куть ве ломань истямо! Сельмень лисест, — бути а маньшат!

И мон рузонь ялгантень ёвтнинь истямо история:

Саратовонь губернясо, Петровскоень уездсэ ули Савка веле. Народось те велесэнть чопуда — прок сёксень пиземев ве.

Эрьва чине симить самагондо, остатка эрямо чист максызь попонтень, тонавтнеме тевень коряс зярдояк а думситькак, сёрмас содыцят колмо ломать.

Те народонть ютксо шачсь-кайсь эрьксэ гогакс Головин Саня. Паро цёрась Головин Саня: эйкакш марто — эйкакш, ава марто — ава, атя марто — атя. Сонзэ валонзо эрьва козой ладить. Не паро кулятне Головинэнь ланга пачкоцть Петровскоень УОНО-с и сонзэ кучизь Саратовов тонавтнеме ликбезэнь курсс.

— Головин ялгась тонавтнесь Саратовсо кавто ковт и сась кудов удостоверения марто, конасо ульнесь сёрмадозь: „окончил двухмесячные курсы ликбеза и направляется по месту жительства на культурно-просветительную работу...“ Радувасть од цёратне, эрьгацть од тейтертнеяк, мик атятнеяк мельс паросо аштесть: Головин Саня сась мекев велев, карми ливтемест чопуда-чистэнть и ветямост паро эрямос...

И кармась Головин Саня „робутамо“...

Кодак сы чокшнэсь, сайсынзе гармонянзо, туи ульцяв. Косояк сими самогондо паметэнзэ маштомс и, бути тейтерь вакс а понги, уды косояк забор ало. Истя и робуты: вень-перть ирецтэ гармоня марто яки, чинь-чоп уды. Бути кияк кевксцы, мекс а робуты культпросветсэ — сон истя мери:

— Мон, ялгай, кавто ковт тонавтнинь — сизинь... ней оймсян.

Ва уш омбоце ков кода Головин оймси: чинь-чоп уды, кеверкшни похмелиясо, вень перть яки ульцява, и гармониясо моры. Нать те аволь паро роботник? Нать Луначарскоень те ломанесь а полавцы?

А тон мерят минек арасть касыця роботникенек...

[ 80 ] — Да Монь валон майшть, — мери рузонь ялгась. — Ней ансяк фатинь — алац думинь эрзянь нароттонть. Ансяк оно мезе, ялгай, минек рузонь народонть ули пек паро вал-меревтезэ, кона Головин Санянень лади:

„Парсте морат — ды аздан козонь озат“.

Москов. 1926 ие.