Пици-палакст/"Активист"
| ←Коногон ацирьгали | „Активист“ (1930) by |
Колмоцесь курок кенери→ |
| Пици-палакст. Ёвтнимат ды фельетонт. СССР-энь Наротнэнь Центрань Издательствась. Москов, 1930. — с. 116—119 |
„АКТИВИСТ“
Пшти Ортя-атянь келезэ. И косто сон зняро валтнэнь саи? Спорямо мартонзо иля пеце. А фатяткак — салатанзат. Весть вейке щоголь ломань виздилгавтыксэлиссе:
— Тонть, келя, Ортялеляй, шапкат умок уш калмо лангов ваны... Од рамамаль, ломанесь — содазь кодамат...
Ортя-атя варштась лангозонзо керш сельме крайсэнзэ ды пеензэ пачк, прок пси вецэ окатизе:
— Шапкась, келя, кодамояк моли... шапканть ало улест...
Прок, ай, локшосо керизе не валтнэсэ щоголенть. Куркакс якстерьгаць щоголесь ды седе курок шлявсь вакстонзо. Ки марто иля снарто Ортя-атядо кортамо, сяк мери теть:
— Ортя-атя? Те ломанесь прок роща ало гуй — апак фатя пупатанзат.
Ламо кой месть ёвтамальть Ортя-атянь пшти кельдензэ, но саты текеяк.
Ортя-атя парсте содасы эрямо ладонть: неень шкатне ванат кодат тусть, пек пштистэ эряви кирдемс эсь прянть, кармат пилень нолдазь эрямо — кадоват сех удалов, эрьва кодамо нолго туло ласте озы лангозот.
Ортя-атянь вайгелезэ эчке — бас. Кода лиясто сими аламодо ды серьгеди мазы моро, прок од орта панжови, вальма сленикатне мик кармить зэрнеме — истямо вайгелезэ Ортя-атянь.
[ 117 ] Ортя-атядо истя кортыть: ломанесь келя, сон удемев салава саи эйсэть, прок галанкань угар.
Сави ютавтомс меньгак кампания. Сельсоветэсь икелейгак промкс пурны. Велень народось содазь кода ваны кампаниятне ланкс. Сех беряньстэ ваны сон эрьва мень каявкснэ ланкс.
Те тевсэнть вана минек Ортя-атянь питне-пезэ арась. Лиясто председателесь кирьга парензэ разди пижни:
— Ялгат! Чаркодинк эсь превсэнк: минек государствась бедной, эрятано эсь вийсэнек, каявкстомо хозяйстванок а кастави...
Пек лиясто пижни председателесь, косто-косто мик „ава лем“ марто, яла теке народось каеягакс ашти. А согласи. Кодак сти Ортя-атя — тевесь лиякс туи. Ортя-атя машты ко ёндо пупамс народонть. Сон кузи столанкс, сормасы керш сельмензэ ды карми:
— Тынь, атят, ломатьтядо?
— Ломатьтянок, — серьгедить каршозонзо.
— Советской властенть признаёте?
— Признаём!
— Советской властесь мелявты кисэнк?
— Мелявты!
— Бояронь модатнень сокатадо?
— Сокатано!
— Лугасо ды вирьсэ пользуватадо?
— Пользуватано!
И карми и карми Ортя-атя. Оймень таргамо оля а максы народонтень:
— Питне панттадо бояронь паро-читнень кис?
— Арась!
— Урядникень ногайка вижны велькссэнк?
— Арась!
— Подушноень кис остатка скотинанк миить?
— А миить, Ортемий Петрович!
— Эно мень апаро орма тенк эряви?
Народось сразу општ моли. Прок талакады. Но Ортя-атя содасы месть тейнемс. Сонензэ те самой эряви.
— Школ эряви миненек?
— Эряви! — сеери народось.
— Нардомонть эряви витнемс?
— Эряви!
[ 118 ] — Велева ды паксява сэтьне эрявить витнемс?
— Эрявить!
— Косто саемс ярмак не тевтненень?
— Народось карми човонензэ раздеме. Виде-паро, косто саемс ярмак?
Ортя-атя таго:
— Значит, атят, ярмакось эряви ламо, саемс акосто. Значит, атят, председателесь, Иван Захарыч, астяко пурнымизь: самообложениянть ютавтомс эряви.
Истя вана апак фатя вети народонть паро тевс минек Ортя-атянок. И кодамо тев илязо ульть: заём-ли, налог-ли — Ортя-атя сэрензэ путы сынст ланкс.
Можна меремс апак манявт: седе ламо истят ломатнеде минек эрзя-мокшонь велетнева, седе курок бу...
* * *
Кодамо тев лиссь! Кодамо тев лиссь! Потмот секень вант калады. Течи молян веле-ютков, каршозон понксь Ортя-атя. Кода, ай, варштынь чаманзо ланкс, седеем карксамом виц прась. Истямо чама кода шачинь эзинь нее, прок букань максо. Здорувинь мартонзо. Эзь варштаяк ёнон.
Ансяк вельсовэтсэ маринь, кодамо тамашась лиссь Ортя-атянь марто. Тердизь сонзэ течи промкс кудов ды мерить:
— Тон, Ортемий Петрович, ломанесь передовоят... тон, келя, минек активестэнек...
Ортянь мельс паро: мыст-мыст пейди.
— Тонеть, келя, Ортемий Петрович, эрьва тевсэ пример невтема, тон — ломанесь эриксат: кото алашат, ниле скалот, сюронтькак байтяк видят, эрямо-чинь коряс пазось эзинзеть обидя.
Ортя-атя прок пиштяка ашти киякс куншкасо, а чарькоди, мейсь корты нетнеде председателесь.
— Тон, Ортемий Петрович, — таго корты председателесь, — аволь аламо агитировить эрьва мень каявксонь кис, ней минь карматано ютавтомо самообложения и заёмонь явшеме...
Ортя-атянь сельмензэ рестазь ракакс кармасть якстерьгадомо. Седеезэ кармась артнеме потмованзо.
[ 119 ] — Минь, Ортемий Петрович, тонть ланкс путынек а покш разверстка!
— Разверстка? Монь ланкс? Покш?
— Аволь пек покш, Ортемий Петрович, кеветее целковойть самообложения ды арьситянок заёмгак сядо целковойшка саят... те тонеть овси аволь стака...
— Монь пельде каявкст! — Ортя-атя кармась кирномо: — монь кецтэ ярмак! Надо вана сэвинк! — и председателесь эзь фатяяк, кода судонзо алов токась Ортя-атянь бабань пештесь.
— Истя местнят, Ортемий Петрович, — тандадозь мери председателесь.
Ортя атя прок превстэ лиссь.
— Подлец! Сволоч! Месть истя тынь тейнитядо? Мон тынк кис зняро кирьга парем сезнян, тынк кис яла народонть тердян эрьва мень налогонь пандомо, тень кис монь ланкс каявкст... Подлецтадо тынь!
— Ортемий Петрович, эряви жо народонтень пример невтемс. Карминьдерятано тонть кондят сюпавтнэнь вакска ютамост, мейле минек питненек синдень грош карми улеме. Минь тонть, Ортемий Петрович, вечктядызь, но мезе саимканть — сайсынек кецтэть. Тон активистат, тень ланкс мельс апаросо иля аште...
— Мон... мон... моданть пачк туеде весе властенк ды порятканк марто! Грабительдядо тынь — аволь лият кить!... — И Ортя-атянь секе неевтезэ промкс кудостонть.
* * *
Истя вана кулось Ортя-атясо эриця активистэсь. Ней велень промкснэ эрить седе сэтьметь, но седе деловойть. Ортя-атянь кияк а лецни.
Ортя-атя аволь ськамонзо. Истят „активистнэде“ ламо эрзя-мокшонь велетнева. Кельсэнть сынь советэнь властенть кис оймест путыть, кельсэст сынь беднойтнень братост лацо „вечксызь“, кельсэст сынь сиянь-сырьнень панить вечкить; кельсэст сынь течи-ки сроявольть социализма, ансяк сынтемест, ансяк сынст кадовлизь те тевстэнть ве ёнов, авольть меша тенст сюпалгадомо. Токасызь — кежиявтыть.